Snežinsk

Snežinsk
Снежинск

Lidnanznam	Flag
Valdkund	Venäma
Eläjiden lugu (2023)	50,717 ristitud
Pind	35 km²
Pämez'	Andrei Pul'nikov (sulaku 2022—)
Telefonkod	+7−35 146-xx-xxx
Avtokod	74, 174
Aigvö	UTC+5 (MSK+2)

Snežinsk (ven.: Сне́жинск, mugažo totaran i baškiran kelil) om Venäman sauptud lidn Čeläbinskan agjan pohjoižes. Se om Snežinskan lidnümbrikon administrativine keskuz.

Istorii

Eländpunktan aluz om pandud vl 1955 kuti Eländžilo nomer 2 (ven.: Жилой посёлок № 2) tedoidamha da sädamha südäitukuižšlibakoid. Se sai lidnan statusad vn 1957 23. päiväl semendkud Kasli-2-nimitusenke. Nimitihe lidnad Čeläbinsk-50 vll 1959−1966, Čeläbinsk-70 vll 1966−1993. Vspäi 1993 lidn om olmas nügüdläiženke nimenke oficialižikš. Sen perimetr kaičese seičemel ambundpalakundal.

Snežinsk šingotase Venäman südäitukuižkeskusel — tehnižen fizikan tedoinstitutal (läz 9 tuhad radnikoid), elektroladimiden tegimel, sauvondmaterialiden pästandal (keramine ozrikkivi, betonantegim), maižandusen abuedheotandal.

Geografijan andmused

Snežinskan lidnümbrikon sijaduz agjas vn 2008 kartal, om znamoitud IX-lugul

Lidn sijadase ümbrikon pohjoižpalas, Keskuralan päivnouzmaižel ezimägištol, 270 m ü.m.t. keskmäižel korktusel. Sinar-järv (ven.: Сина́ра, 24 km²) om lidnan pohjoižrandaks, Silač-järv — suvirandaks (bašk.: Илашты, ven.: Сила́ч, 18 km²).

Matkad Sverdlovskan agjahasai om seičemetoštkümne kilometrad pohjoižhe orhal, Čeläbinskhasai om 111 km suvipäivnouzmha-suvhe orhal vai 128 km avtotel. Lähembaine lidn om Kasli 22 km suvhe orhal vai 27 km avtotedme.

Lidn ühtenzoitase kümnekilometrižel sarakol «Jekaterinburg — Čeläbinsk»-avtotenke. Avtonomine raudte radab Snežinskas tegimišton täht.

Tobmuz

Lähine Randžilo (ven.: Ближний Береговой, 275 rist. vl 2010) i Klüči-külä (101 rist. vl 2010) mülüdas lidnümbrikho Snežinskan ližaks. Lidnümbrikon pind — 357,36 km².

Lidnümbrikon tobmuden pämez' om sen Administracijan pämez', edel vn 2017 sulakud Deputatoiden suiman ezimez' oli lidnümbrikon pämehen. Edeližed lidnan Administracijan pämehed oma Igor' Saprikin (Игорь Сапрыкин, tal'vku 2015 — sulaku 2022) i Vadim Abakulov (radoi vn 2015 tal'vkuhusai). Lidnümbrikon Deputatoiden suiman ezimez' om Aleksei Remezov vn 2020 redukuspäi. Edeližed lidnan suiman ezimehed oma Oleg Karpov (kül'mku 2016 — reduku 2020), Anatolii Timošenkov (2012 — kül'mku 2016). Oliba lidnan pämehikš mugažo: Mihail Železnov (keväz'ku 2005 — 2012), Anatolii Oplančuk (1996 — keväz'ku 2005), Vladimir Ščukin (1991−1996).

Eläjad

Vn 2010 Venäman rahvahanlugemižen mödhe lidnan eläjiden lugu oli 48 810 ristitud, lidnümbrikon — 49 186 ristitud, vn 2021 lidnan — 50 619 ristitud. Kaik 50 759 eläjad oli lidnas i 51 113 eläjad kaikes lidnümbrikos vl 2017. Vspäi 1996 lidnan ristitišt vajehtase 48..50 tuhad eläjad röunoiš (50 500 rist. vll 2003−2005, 50 759 rist. vl 2017), kaikiš suremb ristitišt om nügüd'.

Rahvahad (2010): venälaižed — 90,4 %, totarlaižed — 3,6 %, baškiralaižed — 2,9 %, ukrainalaižed — 1,6 %, toižed rahvahad — 1,5 %.

Ortodoksižen hristanuskondan viž pühäpertid oma saudud lidnas: koume jumalanpertid, kodijumalanpert', puine časoun'. Islaman kaks' mahallä-mečetid oma avaitud lidnümbrikos: nomer 2196 (lidnas) i 2463 (Klüči-küläs).

Openduz

Lapsiden opendusen aluzkundad oma kaks'kümne nomeruidud päivkodid (nomer 1..4, 6, 12, 13, 15, 18, 20, 21, 23..31), kuz' keskškolad (nomer 117, 121, 122, 125, 126, 135), gimnazii nomer 127, specialine (korrekcine) škol-internat nomer 128, armotomiden lapsiden kodi, lapsiden da norišton sädamižen pert'kulu V.M. Komarovan nimed, muzikškol P.I. Čaikovskijan nimed, čomamahtoine škol, Olimpija-sportškol.

Professionaližen opendusen aluzkundad oma: keskopendusen — Ozörskan tehnižen kolledžan Snežinskan filial, üläopendusen om Snežinskan fiziž-tehnine institut — Nacionaližen MIFI-südäitukuižtedoiduzkeskusen filial (MIFI-6).

Galerei

• 
  Lidnümbrikon administracijan sauvuz Leninan torgul (2014)
• 
  Jumalanmaman «Deržavnai»-jumalaižen časoun', vn 2014 nägu
• 
  Venäman südäitukuižkeskuz — tehnižen fizikan tedoinstitut vl 2017 (ohjastusen sauvuz)
• 
  Lapsiden muzikškol (2017)
• 
  Snežinskan fiziž-tehnine institut (vl 2009 akademii oli)

Irdkosketused

• Lidnümbrikon oficialine sait (snzadm.ru). (ven.) (+ äikel'ne avtomatine känduz)
• Lidnümbrikon Deputatoiden suiman sait (sd.snzadm.ru). (ven.)