Min'jar

Min'jar
Миньяр
Lidnanznam;	Flag;
Valdkund	Venäma
Eläjiden lugu (2023)	8,364 ristitud
Pind	12 km²
Pämez'	Güzel' Sibagatulina; (keväz'ku 2017—)
Telefonkod	+7−35 159-xx-xxx
Avtokod	74, 174
Aigvö	UTC+5 (MSK+2)

Min'jar (ven.: Минья́р, tot.: Меңъяр, bašk.: Минйәр) om Venäman lidn da lidnankund Čeläbinskan agjan päivlaskmaižes sarakos. Mülüb Ašan rajonha, sen kaikiš penemb lidn koumespäi.

Istorii

Eländpunktan aluz om pandud vl 1771 kuti žilo sauvomha da holitamha Min'jaran raudantegint. Se radaškanzi vl 1784, nimitihe jogen mödhe. Vl 1901 raudtegim pästli lehtezraudad päpaloin, jarmank radoi. Radnikžilo sai lidnan statusad vn 1943 14. päiväl semendkud.

Min'jar šingotase šebnän samižel i šebnäntegimel, vanundtermižel tegimel (teraraudlent)^[1], mägisuksiden keskusel (koume libutint).

Geografijan andmused

Lidn sijadase rajonan keskuzpalas, Suviuralan päivlaskmaižil pautkil, Sim-jogen alangištos (bašk.: Эҫем 239 km pitte, Kaman hurapol'ne bassein). Min'jar vedase pidust' jogen molembid randoid läz seičemed kilometrad, seižub 165 m ü.m.t. keskmäižel korktusel. Min'jar-jogi (42 km pitte) lankteb Simha oiktalpäi Min'jaran uitos-vezivaradimes, se om saudud lidnan pohjoižpäivnouzmas.

Matkad Čeläbinskhasai om 350 km päivnouzmha avtotedme vai 357 km raudtedme, Uf-lidnhasai — 125 km päivlaskmha-suvipäivlaskmha avtotedme. Lähembaižed lidnad oma Aš-rajonkeskuz 19 km suvipäivlaskmha orhal, 23 km avtotel vai raudtel, i Sim-lidn 13 km suvipäivnouzmha orhal vai 24 km avtotedme.

«Čeläbinsk — Uf»-avtote (M5-trass) mäneb kahesa kilometrad suvhe lidnaspäi. Min'jar-stancii radab «Čeläbinsk — Uf»-raudtel vspäi 1890.

Tobmuz

Volkovo-žilo (111 rist. vl 2017) mülüb lidnankundha Min'jaran ližaks. Lidnankundan pind — 420,7 km².

Lidnankundan tobmuden pämez' om sen Administracijan pämez'. Edeline Administracijan pämez' om Jevgenii Seredov, radoi vn 2017 keväz'kuhusai. Lidnan Deputatoiden nevondkundan ezimez' om Larisa Koltunenko vn 2020 redukuspäi. Edeližed nevondkundan ezimehed oma Ol'ga Čistäkova (keväz'ku 2017 — reduku 2020), Güzel' Sibagatulina (tal'vku 2015 — keväz'ku 2017).

Eläjad

Vl 1939 radnikžilon ristitišt oli 9 800 eläjad. Vn 2010 Venäman rahvahanlugemižen mödhe lidnan eläjiden lugu oli 10 194 ristitud, lidnankundan — 10 324 ristitud, rajonan kudendez. Vn 2021 rahvahanlugemižen mödhe lidnan ristitišt oli 8 500 eläjad. Kaik 9 342 ristitud elihe lidnas i 9 453 ristitud kaikes lidnankundas vl 2017. Kaikiš suremb lidnan ristitišt oli 15..16 tuhad eläjid vll 1959−1967 (16 tuh. rist. vl 1967).

Rahvahad (2010): venälaižed — 73,1 %, totarlaižed — 13,7 %, baškiralaižed — 9,5 %, čuvašalaižed — 1,1 %, toižed rahvahad — 2,3 %.

Ortodoksižen hristanuskondan Jumalanmaman Tulendan Pühäpert'he jumalanpert'^[2] om kaičenus lidnas, pühäpert' om saudud vll 1795−1819. Islaman mahallä-mečet' nomer 363 om avaitud lidnas.

Professionaližen opendusen aluzkund om Ašan industrialižen tehnikuman Min'jaran filial.

Galerei

Jumalanmaman Tulendan Pühäpert'he jumalanpert', vn 2011 nägu
Lidnan kall'od i uit vn 2012 heinkus
Avtotesildad lidnan uitos päliči vl 2017
Mürk Krasnai-kall' i raudte lidnan röunal (2011)
Min'jar-raudtestancii vl 2022

Homaičendad

↑ Min'jaran vanundtermižen tegimen sait (mptz.ru). (ven.)
↑ Min'jaran pühäpertid sobory.ru-saital. (ven.)

Irdkosketused

Lidnankundan oficialine sait (миньяр74.рф). (ven.)

Min'jar Vikiaitas

	Čeläbinskan agjan lidnad
	Aš \| Bakal \| Čebarkul' \| Čeläbinsk \| Jemanželinsk \| Jurüzan' \| Karabaš \| Kartali \| Kasli \| Katav-Ivanovsk \| Kištim \| Kopeisk \| Korkino \| Kus \| Magnitogorsk \| Miass \| Min'jar \| Näzepetrovsk \| Ozörsk \| Plast \| Satk \| Sim \| Snežinsk \| Suviural'sk \| Zlatoust \| Troick \| Tröhgornii \| Ust'-Katav \| Üläufalei \| Üläural'sk

[1] Min'jaran vanundtermižen tegimen sait (mptz.ru). (ven.)

[2] Min'jaran pühäpertid sobory.ru-saital. (ven.)

[1]

[2]