Kropotkin (lidn)

Kropotkin
Кропоткин

Lidnanznam	Flag
Valdkund	Venäma
Eläjiden lugu (2025)	73,854 ristitud
Pind	98,70 km²
Pämez'	Vladimir Jelisejev (tal'vku 2009—)
Telefonkod	+7−86 138-xx-xxx
Avtokod	23, 93, 123
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Kropotkin (ven.: Кропо́ткин) om Venäman lidn da lidnankund Krasnodaran randan päivnouzmas. Se om randan kudenz' lidn eläjiden lugun mödhe, Kavkazskajan rajonan administrativine keskuz da pala vn 2008 elokuspäi.

Istorii

Eländpunktan aluz om pandud vl 1879 kuti Romanovskii-futor Rostovan kozakoiden-alusenpanijoiden Romanovskai-stanican mödhe. Futor sai lidnan statusad vn 1921 4. päiväl uhokud, nimitihe nügüdläižikš Petr Kropotkin-tedomehen da revolücioneran-anarhistan kanzannimen mödhe.

Kropotkin šingotase sömtegimišton keskuseks sijaližel torhudel (pühävoin koume tegint, maidtegim, oluden tegim), gofrokartonan fabrikal, mašiništon sauvomha veimid tegimel i sauvondmaterialiden pästandan edheotandoil, mugažo Venäman Prezidentan ohjandusen simvolikan fabrik radab lidnas.

Geografijan andmused

Kavkazskajan rajonan sijaduz randas vn 2012 kartal

Lidn sijadase rajonan suviröunanno, Kuban-jogen oiktal korktal randal, 80 m ü.m.t. keskmäižel korktusel.

Matkad Krasnodarhasai om 130 km suvipäivlaskmha orhal vai 145 km avtotedme. Lähembaine lidn om Gul'keviči vides kilometras suvipäivnouzmha. Kavkazskai-raudtestancii (ven.: Кавказская) om «Rostov — Vladikavkaz»-keskustal, nece raudte ristikoičeb «Krasnodar — Mihailovsk — Elist»-raudtejonod lidnas. «Kavkaz»-avtote läbitab lidnad.

Tobmuz

Kropotkin om lidnankundan üks'jäižeks eländpunktaks.

Lidnankundan tobmuden pämez' om sen Administracijan pämez'. Vladimir Jelisejev radab lidnan Administracijan pämehen vn 2009 tal'vkuspäi. Lidnan Nevondkundan ezimez' om Sergei Mihailük vn 2012 kül'mkuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 80 765 ristitud, rajonan kaks' koumandest, vn 2021 — 75 858 ristitud. Kaik 79 152 eläjad oli lidnas vl 2017. Kaikiš suremb ristitišt oli 82 800 eläjad vll 2000−2001.

Rahvahad (enamba 1 % vl 2010): venälaižed — 92,4 %, armenijalaižed — 3,8 %, ukrainalaižed — 1,0 %, toižed rahvahad — 2,1%, rahvahuden ozutandata — 0,7 %.

Ortodoksižen hristanuskondan Jumalanmaman Katken päjumalanpert' i severz'-se jumalanpertid oma avaitud lidnas.

Openduz

Lapsiden opendusen aluzkundad oma kuz'toštkümne nomeruidud päivkodid (nomer 1..9, 11, 12, 14..18), aluzškol nomer 1, kümne keskškolad (nomer 1, 2, 4..7, 11, 16, 17, 44), kaks' liceid (nomer 3 i 45), Kropotkinan kozakoiden kadetkorpus G.N. Trošev-sodamehen nimed, školanirdpol'žen radon keskuz, kaks' muzikškolad (nomer 1 G.V. Sviridovan nimed i nomer 2), čomamahtoine škol, viž nimitadud sportškolad (Junost' «Nor'aig», «Olimp», Smena «Vajehtuz», Sodružestvo «Ühtištuz», «Spartak»), noriden naturalistoiden stancii.

Kropotkinan medicinine kolledž, tehnologijoiden da raudtetransportan tehnikum i privatine juridine tehnikum oma lidnan professionaližen opendusen aluzkundoikš.

Galerei

• 
  Lidnan kodirandantedištandmuzei (2021)
• 
  Jumalanmaman Katken päjumalanpert', vn 2016 nägu
• 
  Kul'turan da lebun puišton tulend vl 2020
• 
  Kul'turkeskuz (2021)
• 
  Kavkazskai-päraudtestancijan sauvuz da torg senno vl 2021

Irdkosketused

• Lidnankundan tobmuden aluzkundoiden oficialine sait (gorod-kropotkin.ru). (ven.)