Polessk

Polessk
Полесск

Lidnanznam
Valdkund	Venäma
Eläjiden lugu (2023)	6,954 ristitud
Pind	11 km²
Pämez'	Jurii Krasnopörov (reduku 2020—)
Telefonkod	+7−40 158-xx-xxx
Avtokod	39, 91
Aigvö	UTC+2 (MSK−1)

Polessk (ven.: Поле́сск, saks.: Polessk, litv.: Labguva / Poleskas, pol'š.: Polessk / Labiawa; edel 1946. vot Labiau) om Venäman lidn Kaliningradan agjan keskuzpalan lodehes. Se om Polesskan ümbrikon (edel 2022. vot — lidnümbrikon) administrativine keskuz da pala.

Istorii

Eländpunkt mainitase ezmäižen kerdan kuti Labagov vl 1249. Se sai lidnan oiktusid vn 1642 28. päiväl kezakud. Suren sodan aigan Rusked Armii anasti lidnad vn 1945 23. päiväl vilukud. Udesnimitihe NSTÜ:n vägimehen Sergei Poleckii-polknikan muštoks i ümbärdajan mectahondan tagut.

Polessk om maižanduzrajonan keskuseks, šingotase sömtegimišton edheotandoil: kalakonservtegim i kaks' sagudentegint, mugažo kombisötken tegim radab.

Geografijan andmused

Municipaližen ümbrikon sijaduz agjas vn 2010 kartal

Lidn sijadase ümbrikon lodehes, Deim-jogen da kanalan hural randal (ven.: Де́йма 37 km pitte, Pregolin oiged ratud hijam), koumes kilometras suvhe Baltijan meren Kuršan lahtespäi, koume metrad ü.m.t. keskmäižel korktusel.

Matkad Kaliningradhasai om nell'kümne kuz' kilometrad suvipäivlaskmha raudtel vai avtol. Lähembaine lidn om Gvardeisk 24 km suvhe orhal vai 28 km avtotedme. Polessk-päraudtestancijan sauvuz om sätud vl 1889, stancii radab Kaliningrad — Sovetsk-jonol elektrojonusiden i jüguiden täht.

Tobmuz

Lidnan sijaduz rajonas (2011)

Vll 2008−2016 Polesskan lidnankund oli olmas, se mülüti kaht pen't žilod lidnan ližaks.

Edeline municipaližen ühtnikan pämez' (deputatoiden nevondkundan ezimez') om Aleksei Museičuk (kezaku 2016 — reduku 2020).

Eläjad

Vn 2010 Venäman rahvahanlugemižen mödhe lidnan eläjiden lugu oli 7 581 ristitud, ümbrikon (vll 2008−2016 — rajonan) kaks' videndest, vn 2021 — 6 926 ristitud. Kaik 7 041 eläjad oli lidnas vl 2017. Kaikiš suremb lidnan ristitišt oli läz 7 600 eläjad vll 2002−2011 (7 681 rist. vl 2002).

Rahvahad (lidnan eläjad, enamba 0,4 % vl 2010, ozutadud rahvahudenke): venälaižed — 88,7 %, vaugedvenälaižed — 2,7 %, ukrainalaižed — 2,3 %, armenijalaižed — 1,2 %, litvalaižed — 1,0 %, saksalaižed — 0,8 %, totarlaižed — 0,5 %, čiganalaižed — 0,5 %, mordvinalaižed — 0,5 %, toižed rahvahad — 1,8 %.

Ortodoksižen hristanuskondan Kaiken Venäman Tihon-patriarhan jumalanpert' om letud vodele 2007.

Lapsiden opendusen aluzkundad oma severz'-se päivkodid, keskškol, lapsiden sädamižen pert', muzikškol, lapsiden da norišton sportškol. Sauvondan da proftehnologijoiden kolledž om lidnan professionaližen opendusen aluzkundaks, sen toine palakund sijadase Gur'jevsk-lidnas.

Galerei

• 
  Labiau-zamk jogen vastrandaspäi, 2011
• 
  Deim-jogi lidnas, vn 2016 nägu
• 
  Vanh kändab sild vl 2011, om rekonstruiruidud vll 2001−2002
• 
  Ehtal'ne nägu lidnha (2016)

Irdkosketused

• Municipaližen ümbrikon tobmuden aluzkundoiden oficialine sait (polessk.gov39.ru). (ven.)
• Polesskan ümbrik Kaliningradan agjan ohjastusen gov39.ru-saital. (ven.)