Černähovsk

Černähovsk
Черняховск

Lidnanznam	Flag
Valdkund	Venäma
Eläjiden lugu (2020)	35,398 ristitud
Pind	58 km²
Pämez'	Oleg Lucuk (sügüz'ku 2015—)
Telefonkod	+7−40 141-xx-xxx
Avtokod	39, 91
Aigvö	UTC+2 (MSK−1)

Černähovsk (ven.: Черняхо́вск, saks.: Tschernjachowsk, pol'š.: Czerniachowsk / Wystruć, litv.: Įsrutis / Černiachovskas; edel 1946. vot — saks.: Insterburg, ven.: И́нстербург) om Venäman lidn Kaliningradan agjan keskuzpalan päivnouzmas. Se om agjan koumanz' lidn eläjiden lugun mödhe, Černähovskan lidnümbrikon administrativine keskuz.

Istorii

Eländpunktan aluz om pandud prussijalaižiden Unsatrapis-žilon sijas kuti Tevtonan ordenan Insterburg-zamk-varmitez vl 1336, lopihe sen sauvomišt vl 1390. Zamkan jändused oma olmas muzejaks. Žilo lidnusenno sai lidnan oiktusid vn 1583 10. päiväl redukud. Vspäi 1860 om raudtesol'meks, «Berlin — Kaunas»-jono läbiti lidnad. Suren sodan aigan vn 1944 elokus lidn alištui Suren Britanijan il'mvägiden bombardiruindale, i vn 1945 21.-22. päivil vilukud Rusked Armii anasti lidnad. Nimitihe Koumanden Vaugedvenäman frontan Ivan Černähovskii-käsknikan kanzannimen mödhe.

Černähovsk šingotase koditehnikan tegimel, sömtegimištol (konservtegim, konjaktegim, vintegim), mugažo mebel'edheotand i kombisötken tegim ratas.

Geografijan andmused

Lidn sijadase Instruč- i Angrap- (ven.: Анграпа) jogiden ühthejoksmusen Pregolikš randoil, 30 m ü.m.t. keskmäižel korktusel. Matkad Kaliningradhasai om 84 km päivlaskmha orhal, 88 km avtotedme vai raudtedme. Lähembaižed lidnad oma Gusev 27 km päivnouzmha kaikil teil i Ozörsk 29 km suvipäivnouzmha orhal vai 33 km avtol.

Kaik 100 žilod da üks' raudtestancii mülüdas lidnümbrikho Černähovskan ližaks. Lidnümbrikon pind — 1285,75 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 40 449 ristitud, lidnümbrikon (edel 2016. vot — rajonan) koume nelländest. Kaikiš suremb lidnan ristitišt oli 43 620 eläjad vl 1939 i 43..44 tuh. eläjid vll 1998−2003 (44 323 rist. vl 2002). Kaik 36 423 eläjad oli lidnas vl 2017.

Rahvahad (lidnan eläjad, enamba 0,4 % vl 2010, ozutadud rahvahudenke): venälaižed — 86,4 %, ukrainalaižed — 4,5 %, vaugedvenälaižed — 3,4 %, saksalaižed — 1,1 %, litvalaižed — 0,9 %, armenijalaižed — 0,7 %, totarlaižed — 0,5 %, čiganalaižed — 0,5 %, pol'šanmalaižed — 0,4 %, toižed rahvahad — 1,6 %.

Ortodoksižen hristanuskondan koume pühäpertid oma avaitud lidnas: Mikoi-arhangelan jumalanpert', ph. Sergii Radonežalaižen jumalanpert' (saudihe vll 2009−2014), časoun'. Katoline pühäpert' om olmas.

Pedagogine kolledž om lidnan professionaližen opendusen aluzkundaks.

Galerei

• 
  Administrativine sauvuz (2017), enččen Insterburg-lidnan administracijan pert'
• 
  Ph. Mikoi-arhangelan jumalanpert' (vspäi 1992 — ortodoksine hristanuskond), vn 2018 nägu
• 
  Ph. Bruno Kverfurtalaižen katoline jumalanpert', vn 2014 nägu
• 
  Keskškol nomer 6 (2018)
• 
  Černähovsk-päraudtestancijan sauvuz vl 2017

Irdkosketused

• Lidnümbrikon tobmuden aluzkundoiden oficialine sait (inster39.ru). (ven.)