Sojärven rajon

Sojärven rajon
Суоярвский район (ven.)
Suojärven piiri (suom.)
Suojärven kunta (livv.)

Znam	Flag
Valdkund	Venäma
Administrativine keskuz	Sojärv (lidn)
Eläjiden lugu (2023)	12,418 ristitud
Pind	13,713,72 km²

Sojärven rajon (ven.: Суоя́рвский райо́н, suom.: Suojärven piiri, livv.: Suojärven kunta) om municipaline ühtnik Karjalan Tazovaldkundas, Venälaižes Federacijas.

Administrativine keskuz om Sojärv-lidn. Siš eläb rajonan ristitišton viž ühesandest.

Istorii

Rajon om sätud vn 1940 heinkus enččel Suomenman territorijal, anttihe sidä Tal'vsodan jäl'ghe. Sojärv-žilo kändihe lidnaks da rajonan keskuseks.

Vozil 1941−1944 Suomenman sodaväged oliba rajonas.

Vspäi 1957 enččen Petrovskan rajonan territorii om jagadud Sojärven da Kondopogan rajoniden keskes. Vl 1964 anttihe Veškelican küläkundad rajonha Änižröunan rajonaspäi. Vl 1982 sijatihe Gumarinon küläkundad rajonha Medvežjegorskan rajonaspäi.

Geografijan andmused

Sojärven rajon om Karjalan Tazovaldkundan suvipäivlaskmaine taho. Pind — 13 731 nellikkilometrad (koumanz' sija tazovaldkundas 18:späi).

Om röunoid Suomenmanke da Karjalan Tazovaldkundan kudenke rajonanke:

• päivnouzmmas Kondopogan rajonanke;
• suvipäivnouzmas Präžan rahvahaliženke rajonanke;
• suvipäivlaskmas Pit'krandan i Sortavalan rajonidenke;
• päivlaskmas Suomenman Pohjoižkarjal-agjanke;
• pohjoižes Mujezerskijan rajonanke;
• pohjoižpäivnouzmas Medvežjegorskan rajonanke.

Kaik om 1800 järved da 490 pen't joged rajonan territorijas. Joged mülüdas Atlantižen valdmeren basseinha. Znamasižed järved oma Sojärv (58,6 km²), Salonjärv (46 km²) da Loimolanjärv (20,7 km²).

Londuseližed varad oma turbaz, nikel', sauvondmaterialad (ozrikkivi, rusked mramor, gabrodiabaz, saved, letked, gravii), pirit, mec, kala, reskvezi.

Vspäi 2005 rajonan territorii jagase videks municipaližeks ühtnikaks: üks' lidnankund da nell' küläkundad.

Eläjad

Vn 2002 Venäman rahvahanlugemižen mödhe rajonan eläjiden lugu oli 24 028 ristitud, vn 2010 — 18 814 ristitud, vn 2021 — 13 078 ristitud.

Kaik om 27 eländpunktad rajonas (vl 2005), niiden kesken üks' lidn, 18 külänvuittušt žilod, kaks' raudtestancijad kaikenaigaiženke ristitištonke da kuz' küläd.

Toižed znamasižed eländpunktad oma Porosjärv-žilo (2,6 tuh. rist. vl 2013) da Naistenjärv-žilo (1,2 tuh. rist. vl 2013).

Irdkosketused

• Sojärven rajonan oficialine sait (suojarvi.ru). (venäkelel)
• Sojärven rajon Karjalan Tazovaldkundan oficialižel gov.karelia.ru-saital. (venäkelel)