Mujezerskijan rajon

Mujezerskijan rajon
Муезерский район (ven.)
Mujejärven piiri (suom.)

Znam
Valdkund	Venäma
Administrativine keskuz	Mujezerskii
Eläjiden lugu (2023)	7,903 ristitud
Pind	17,660,27 km²

Mujezerskijan rajon (ven.: Муезе́рский райо́н, suom.: Mujejärven piiri) om municipaline ühtnik Karjalan Tazovaldkundas, Venälaižes Federacijas.

Administrativine keskuz om lidnanvuitte Mujezerskii-žilo.

Istorii

Vn 1966 tal'vkun 30. päiväl rajonan aluz om pandud VNFST:n Ülembaižen Nevondkundan prezidiuman käskön mödhe, sil aigal ühtištadihe enččen Rugjärven rajonan territorijad (oli anttud Segežan rajonha) Rebolin rajonanke. Mujezerskii-žilo kändihe sen administrativižeks keskuseks.

Geografijan andmused

Mujezerskijan rajon om Karjalan Tazovaldkundan päivlaskmaine taho. Pind — 17 660 nellikkilometrad (kahtenz' sija tazovaldkundas 18:späi).

Om röunoid Karjalan Tazovaldkundan kudenke rajonanke, mugažo Suomenmanke:

• päivnouzmas Segežan da Medvežjegorskan rajonidenke;
• suves Sojärven rajonanke;
• päivlaskmas Suomenman Pohjoižkarjal- da Kainu-agjoidenke;
• pohjoižes Kostamukšan lidnümbrikonke da Kalevalan rahvahaliženke rajonanke;
• pohjoižpäivnouzmas Belomorskan rajonanke.

Päivlaskmkarjalaine ülüz läbitab rajonad. Se om erigoitai pird Atlantižen valdmeren da Vauktan meren basseinoiden keskes. Joged oma kos'kekahad, Čirka-Kemin da Sunan joginiškad jokstas rajonaspäi.

Klimat om ven pehmed. Heinkun keskmäine lämuz om +15,7 C°, vilukun −11,9 C°.

Londuseližed varad oma mec, kala, reskvezi.

Vspäi 2005 rajonan territorii jagase kahesaks municipaližeks ühtnikaks: üks' lidnankund da seičeme küläkundad.

Eläjad

Vn 2002 Venäman rahvahanlugemižen mödhe rajonan eläjiden lugu oli 16 556 ristitud, vl 2010 — 12 236 ristitud, vl 2021 — 8 258 ristitud.

Kaik om 24 eländpunktad rajonas (vl 2005), niiden kesken üks' lidnanvuitte žilo, kümne külänvuittušt žilod, kuz' raudtestancijad da seičeme küläd.

Toižed znamasižed eländpunktad oma Ledmajärv-žilo (2,1 tuh. rist. vl 2013), Sukkajärv-žilo (1,1 tuh. rist. vl 2013) da Lenderi-1-stancii (1,0 tuh. rist. vl 2013).

Rahvahad (enamba 0,4 % vn 2002 Venäman rahvahanlugemižen mödhe): venälaižed — 58,0 %, vaugedvenälaižed — 18,0 %, karjalaižed — 13,0 %, ukrainalaižed — 4,4 %, suomalaižed — 1,7 %, pol'šanmalaižed — 1,3 %, čuvašalaižed — 0,9 %, litvalaižed — 0,7 %, totarlaižed — 0,4 %, toižed rahvahad — 1,5 %, rahvahuden ozutandata — 0,1 %.

Vl 2002 kaik 27 vepsläšt eli rajonas (0,16 % sen ristitištospäi).

Ižanduz

Rajonan ižandusen päsarakod oma mecan varhapanend, pumaterialan ümbriradmine, raudtetransport, kalankazvatuz, mecmarjoiden varhapanend.

Irdkosketused

• Mujezerskijan rajonan oficialine sait (muezersky.ru). (ven.)
• Mujezerskijan rajon Karjalan Tazovaldkundan oficialižel gov.karelia.ru-saital. (ven.) (angl.) (suom.)