Kondopogan rajon

Kondopogan rajon
Кондопожский район (ven.)
Kontupohjan piiri (suom.)

Znam	Flag
Valdkund	Venäma
Administrativine keskuz	Kondopog
Eläjiden lugu (2016)	37,958 ristitud
Pind	5,951,48 km²

Kondopogan rajon (ven.: Кондопо́жский райо́н, suom.: Kontupohjan piiri) om Venälaižen Federacijan Karjalan Tazovaldkundan municipaline ühtnik.

Administrativine keskuz om Kondopog-lidn (mülüb rajonha vspäi 2005). Siš eläb rajonan ristitišton nell' videndest.

Istorii

Rajon om sädud vl 1927, elokun 29. päivän VCIK:an käskön mödhe. Kondopog-radnikžilo kändihe sen keskuseks.

Vspäi 1941 (reduku) vhesai 1944 (kezaku) Suomenman sodaväged oliba rajonas.

Sodan jäl'ghe udessündutihe rajonan ižandust. Sid' se eli lujas diversifikacijas läbi.

Geografijan andmused

Kondopogan rajon om Karjalan Tazovaldkundan suvine taho. Pind — 5 951,48 nellikkilometrad (üks'toštkümnenz' sija tazovaldkundas 18:späi), saum vezid om videndez-nelländez. Mec (pedai, kuz') kazvab territorijan enambuses (enamba 70 %).

Om röunoid Karjalan Tazovaldkundan nellänke rajonanke:

• pohjoižes da päivnouzmas Medvežjegorskan rajonanke;
• suves Änižröunan rajonanke da Präžan rahvahaliženke rajonanke;
• päivlaskmas Sojärven rajonanke.

Joged mülüdas Atlantižen valdmeren basseinha. Änine lainištab rajonan päivnouzmaižid randoid. Kivač-vezilanktend sijadase rajonas.

Klimat om ven pehmed. Heinkun keskmäine lämuz om +16,4 C°, vilukun −10,9 C°.

Londuseližed varad oma titankivend, sauvondmaterialad (rugižkivi, ozrikkivi, diabaz, šungit, porfirit, lete), dolomit, mec, kala, reskvezi, gidroenergii.

Vspäi 2005 rajonan territorii jagase ühesaks municipaližeks ühtnikaks: üks' lidnankund da kahesa küläkundad.

Eläjad

Vn 2002 Venäman rahvahanlugemižen mödhe rajonan eläjiden lugu oli 9 719 ristitud (44 582 Kondopoganke), vl 2010 — 41 114 ristitud (8 127 Kondopogata).

Kaik om 78 eländpunktad rajonas (vl 2005), niiden kesken üks' lidn, 13 žilod, nell' žilod raudtestancijanno da 60 küläd.

Toižed znamasižed eländpunktad oma Kendjärvi-žilo (1,5 tuh. rist. vl 2013), Jänišpol'-žilo (1,1 tuh. rist. vl 2013) da Hirvas-žilo (1,0 tuh. rist. vl 2013).

Irdkosketused

• Kondopogan rajonan oficialine sait (amsu.kondopoga.ru). (ven.)
• Kondopogan rajon Karjalan Tazovaldkundan oficialižel gov.karelia.ru-saital. (ven.)