Čerömhovo (lidn)

Čerömhovo
Черемхово
Lidnanznam;	Flag;
Valdkund	Venäma
Eläjiden lugu (2025)	52,879 ristitud
Pind	113,99 km²
Pämez'	Vadim Semönov; (tal'vku 2005—)
Telefonkod	+7−39 546-xx-xxx
Avtokod	38, 85, 138
Aigvö	UTC+8 (MSK+5)

Čerömhovo (ven.: Черемхо́во [tɕɪrʲɪmˈxovə], burät.: Арангата) om Venäman lidn da lidnümbrik Irkutskan agjan suves. Se om agjan kudenz' lidn eläjiden lugun mödhe, mugažo Čerömhovon rajonan administrativižeks keskuseks, ei mülü rajonha.

Istorii

Eländpunktan aluz om pandud vl 1772 kuti Čeremhovskoje-žilo (ven.: село Черемховское) Moskvan traktal. Vspäi 1896 zavottihe kivihilen samišt kaivuzil i Transsib läbiti žilod. Čerömhovo sai lidnan statusad vn 1917 3(16). päiväl kezakud.

Čerömhovo šingotase kivihilen samižel (avoin mahtuz) da küllästamižel, mehanižel tegimel, sauvondmaterialiden edheotandoil (kudomatomad materialad, tal'kan i dolomitan samine, pilindmaterialad), kebnal tegimištol (omblendfabrik i mebel'fabrik), mugažo leibkombinat radab.

Geografijan andmused

Lidn sijadase ümbärdajan rajonan pohjoižpäivnouzmaižes čogas, penen Čeremšank-jogen randoil (ven.: Черемшанка, Angar-jogen hura ližajogi), 560 m ü.m.t. keskmäižel korktusel.

Matkad Irkutskhasai om 125 km suvipäivnouzmha orhal vai 145 km «Sibir'»-avtotedme (R-255). Lähembaine lidn om Svirsk vižtoštkümne kilometrad päivnouzmha orhal. «Sibir'»-trass ümbärdab lidnad suvipäivlaskmaspäi vides kilometras.

Klimat om terav kontinentaline. Vilukun lämuz om −19,8 C°. Ekstremum om +36 C° (heinku). Paneb sadegid 325..425 mm vodes. Voib olda manrehkaidusid seičemehe..kaheshasai ballad.

Tobmuz

Čerömhovo om lidnümbrikon üks'jäižeks eländpunktaks. Kaik ühesa žilod mülüdas lidnha, ned sijadasoiš nelläs..seičemes kilometras.

Lidnümbrikon tobmuden pämez' om mer (Administracijan pämez'). Natal'ja Morozova radab lidnan Duman ezimehen vn 2024 sulakuspäi, oli sil-žo radnikusel reduku 2020 — heinku 2023 pordol. Edeližed Duman ezimehed oma Oleg Rovenskii (heinku 2023 — sulaku 2024), Sergei Besedin (radoi vn 2020 redukuhusai).

Eläjad

Vn 2010 Venäman rahvahanlugemižen mödhe lidnan eläjiden lugu oli 52 647 ristitud, vn 2021 — 53 958 ristitud. Kaik 51 230 ristitud elihe lidnas vl 2017. Kaikiš suremb lidnan ristitišt oli 124 tuhad eläjid vl 1956.

Ortodoksižen hristanuskondan nell' pühäpertid^[1] oma saudud lidnas: ph. Mikulai-čudonsädajan jumalanpert' (om udessündutadud 2000-nzil vozil), ph. Sofronii-episkopan puine jumalanpert' (letihe vll 2013−2021), kaks' časounäd. Islaman pühäpert' om avaitud vspäi 2008.

Openduz

Lapsiden opendusen aluzkundad oma nell'toštkümne nomeruidud päivkodid (nomer 1..4, 7, 12, 14, 16, 24, 26, 27, 29, 41, 43), augotižškol (nomer 32), kahesa keskškolad (nomer 1, 3, 4, 6, 8, 9, 16, 22), avoin (aterjoiden) škol (nomer 5), licei, kaks' speciališt (korrekcišt) školad (nomer 1 i 2), laps'aigan da norišton pert', muzikškol, kaks' čomamahtošt školad (nomer 1 i 2), lapsiden da norišton sportškol.

Čerömhovon tegimištoližen industrijan da holitusen tehnikum^[2], medicinine kolledž^[3], kaivuztehnine kolledž^[4] i pedagogine kolledž^[5] oma lidnan professionaližen opendusen aluzkundoikš.

Galerei

Korrekcine aluzškol-internat (2013, ende škol nomer 4)
Kivihilen samine Čerömhovonno vl 2001
Torguindkeskused Nekrasovan irdal (2016)
Šahtör-kul'turkeskuz (2018, «Kaivai»)

Homaičendad

Irdkosketused

Čerömhovo (lidn) Vikiaitas

	Irkutskan agjan lidnad
	Alaudinsk \| Alzamai \| Angarsk \| Baikal'sk \| Birüsinsk \| Bodaibo \| Bratsk \| Čerömhovo \| Irkutsk \| Kirensk \| Sajansk \| Sibirin Usol'je \| Slüdänk \| Svirsk \| Šelehov \| Zim \| Železnogorsk Ilimal \| Taišet \| Tulun \| Ust'-Ilimsk \| Ust'-Kut \| Vihorevk

[1] Čerömhovon pühäpertid sobory.ru-saital. (ven.)

[2] Čerömhovon tegimištoližen industrijan da holitusen tehnikuman sait (чтприс38.рф). (ven.)

[3] Čerömhovon medkolledžan sait (chermed.ucoz.ru). (ven.)

[4] Čerömhovon kaivuztehnižen kolledžan sait (chgtk.ru). (ven.)

[5] Čerömhovon pedagogižen kolledžan sait (чпк.образование38.рф). (ven.)

[1]

[2]

[3]

[4]

[5]