Alzamai

Alzamai
Алзамай

Lidnanznam	Flag
Valdkund	Venäma
Eläjiden lugu (2021)	5,373 ristitud
Pind	50,33 km²
Pämez'	Aleksandr Lebedev (tal'vku 2005—)
Telefonkod	+7−39 557-xx-xxx
Avtokod	38, 85, 138
Aigvö	UTC+8 (MSK+5)

Alzamai (ven.: Алзама́й) om Venäman lidn da lidnankund Irkutskan agjan päivlaskmas. Se om Alaudinskan rajonan kahtenz' lidn da eländpunkt eläjiden lugun mödhe.

Istorii

Eländpunktan aluz om pandud raudtestancijaks Transsibal i žiloks senno vl 1897, nimitihe stancijad Alzamai-žilon mödhe seičemes kilometras (nüg. Vanh Alzamai-žilo, 261 rist. vl 2012). 1920-nzil vozil saudihe vedimdepod, špaloiden ceh i himižmecedheotand radaškanziba. Suren sodan aigan vl 1942 sirtihe žilho kärauzimiden tegint Dnepropetrovskaspäi (nüg. kohendamiž-mehanine tegim), i vl 1943 kätihe Alzamaid radnikžiloks. Vll 1945−1959 oli Alzamain rajonan keskuseks. Radnikžilo sai lidnan statusad vn 1955 semendkul. Vhesai 2005 alištui Alaudinsk-lidnan tobmudele oikti.

Alzamai šingotase raudten edheotandoil, elektrodoiden pästandal.

Geografijan andmused

Alaudinskan rajonan sijaduz agjas vl 2011

Lidn sijadase rajonan pohjoižes, Toporok-jogen hural randal tobjimalaz (Angar-jogen hurapol'ne bassein), Päivnouzmaižen Sajanan ezimägištol, 300 m ü.m.t. keskmäižel korktusel.

Matkad Irkutskhasai om 515 km suvipäivnouzmha orhal, 600 km «Sibir'»-trassadme (R-255) vai Transsib-raudtedme, rajonan Alaudinsk-keskushesai om 76 km suvhe orhal vai 91 km avtol. Lähembaine lidn om Taišet kuz'kümnes kilometras lodeheze orhal, 69 km «Sibir'»-avtotel vai Transsibal.

Tobmuz

Alzamai om lidnankundan üks'jäižeks eländpunktaks.

Lidnankundan tobmuden pämez' om sen Administracijan pämez'. Lidnan Administracijan pämez' om Aleksandr Lebedev vn 2005 tal'vkuspäi (municipaližen ühtnikan alusenpanendan aigaspäi). Lidnan Dum kogoneb kümnes ühtnijaspäi, sen ezimez' om Dmitrii Šabanov vn 2021 redukuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 6 730 ristitud, vn 2021 — 5 373 ristitud. Kaik 6 040 eläjad oli lidnas vl 2017. Kaikiš suremb lidnan ristitišt oli 13 060 eläjad vl 1959.

Ortodoksižen hristanuskondan Jumalanmaman «Pölištunuziden aznoičend»-jumalaižen loičendpert' om avaitud vspäi 1997. Ph. Innokentii Irkutalaižen puine pühäpert' om saudud vll 2013−2024.

Lapsiden opendusen aluzkundad oma lidnan päivkodi i augotižškol-päivkodi nomer 16, aluzškol nomer 2, kaks' keskškolad (nomer 3 i 5), lapsiden sädamižen pert', čomamahtoiden škol, Alaudinskan sportškolan filial. Professionaližen opendusen aluzkundad ratas lähembaižiš lidnoiš.

Galerei

• 
  Vezičuhunduz (2011)
• 
  Počtan ofis vl 2020 (indeks 665160)
• 
  Počtan sauvuz vl 2020 (indeks 665161)
• 
  Alzamai-päraudtestancii vl 2013
• 
  Alzamai-päraudtestancijan toine sauvuz (2013)

Irdkosketused

• Lidnan municipaližen ühtnikan oficialine portal (alzamai.ru). (ven.)