Bodaibo (lidn)

Bodaibo
Бодайбо
	Lidnanznam;
Valdkund	Venäma
Eläjiden lugu (2020)	11,982 ristitud
Pind	11 km²
Pämez'	Aleksei Botvin; (reduku 2022—)
Telefonkod	+7−39 561-xx-xxx
Avtokod	38, 85, 138
Aigvö	UTC+8 (MSK+5)

Bodaibo (ven.: Бодайбо́, jakut.: Бодойбо) om Venäman lidn da lidnankund Irkutskan agjan pohjoižpäivnouzmas. Se om Bodaibon rajonan administrativine keskuz, mülüb rajonha vspäi 2010.

Istorii

Eländpunktan aluz om pandud vl 1864 samha kuldad kuti Bodaibon rezidencii (ven.: Бодайбинская резиденция) — jüguiden varažom. Nimitihe Bodaibo-jogen mödhe (vai ven. Бодайбинка, 98 km pitte, lankteb Vitimha). Bodaibon alangišt oli kuldan samižen päsijaks avoinuden mahtusel. Žilo sai lidnan statusad nügüdläiženke nimenke vl 1903, mülüi Jakutskan gubernijha. Vll 1864−1967 kaidraižuine raudte oli olmas pohjoižpäivnouzmha, kuldan samižen žiloidennoks, avtote om saudud sen sijas.

Bodaibo šingotase Mamakanan GES:al, kuldan sezonižen samižen edheotandoil, jogiportal i sömtegimištol (lihan i leibän edheotandad).

Geografijan andmused

Lidn sijadase Vitim-jogen oiktal randal (ven.: Витим, Lenan oigedpol'ne bassein), 280 m ü.m.t. keskmäižel korktusel. Matkad Irkutskhasai om 883 km suvipäivlaskmha orhal vai 1435 km avtotedme. Lähembaižed lidnad oma Lensk 321 km pohjoižhe orhal i Severobaikal'sk 386 km suvipäivnouzmha orhal vai 627 km avtol. Lähembaine raudtestancii om BAM:an Taksimo suvhe, ühtenzoittas avtotel 240 km pitte, avtotesild Vitiman kal't om sauvomas vodele 2025. Voib sadas Irkutskhasai regionaližen lendimportan kal't (ODO / БДБ, ühesa reisad nedališ).

Klimat om terav kontinentaline. Tal'v om vilu, lämuz voib sadas +35 Cel'sijan gradushasai kaiken kezan aigan. Voden keskmäine lämuz om −5,1 C°, heinkun +17,9 C°, vilukun — −29,9 C°. Ekstremumad oma −55,1 C° i +39,6 C°. Paneb sadegid 465 mm vodes, enamba kezakus-elokus (67..84 mm kus).

Tobmuz

Nerpo-žilo (6 rist. vl 2017) mülüb lidnankundha Bodaibon ližaks. Lidnankundan pind — 26 708,85 km².

Edeline lidnan pämez' (lidnankundan Administracijan pämez') om Aleksandr Dubkov (reduku 2012 — reduku 2022). Lidnankundan Duman ezimez' om Andrei Dudarik vn 2019 sulakuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 15 340 ristitud, lidnankundan — 15 358 ristitud. Kaik 13 104 ristitud elihe lidnas vl 2017. Kaikiš suremb lidnan ristitišt oli 18 226 eläjad vl 1959 i 21 700 eläjad vl 1992. Ristitišt poleneb kacmata kuldan samižen ližadushe.

Ortodoksižen hristanuskondan puine Raštvoiden jumalanpert'^[1] om letud vl 1876.

Bodaibon kaivuztehnikum^[2] om lidnan professionaližen opendusen aluzkundaks.

Galerei

Bodaibon rajonan administracijan sauvuz (2007)
Muštnik i muštlaudad Suren sodan vägimehile, vn 2016 nägu
«Lenzoloto»-kompanijan kontor vl 2010
Keskškol nomer 1 (2007)
Bodaibo-lendimportan ühthine nägu vl 2006

Homaičendad

↑ Bodaibon pühäpertid sobory.ru-saital. (ven.)
↑ Bodaibon kaivuztehnikuman sait (bgtobrazovanie38.ru). (ven.)

Irdkosketused

Bodaibon municipaližen ühtnikan oficialine sait (uprava-bodaibo.ru). (ven.)

Bodaibo (lidn) Vikiaitas

	Irkutskan agjan lidnad
	Alaudinsk \| Alzamai \| Angarsk \| Baikal'sk \| Birüsinsk \| Bodaibo \| Bratsk \| Čerömhovo \| Irkutsk \| Kirensk \| Sajansk \| Sibirin Usol'je \| Slüdänk \| Svirsk \| Šelehov \| Zim \| Železnogorsk Ilimal \| Taišet \| Tulun \| Ust'-Ilimsk \| Ust'-Kut \| Vihorevk

[1] Bodaibon pühäpertid sobory.ru-saital. (ven.)

[2] Bodaibon kaivuztehnikuman sait (bgtobrazovanie38.ru). (ven.)

[1]

[2]