Angarsk

Angarsk
Ангарск

Lidnanznam	Flag
Valdkund	Venäma
Eläjiden lugu (2025)	216,973 ristitud
Pind	294 km²
Pämez'	Sergei Petrov (semendku 2015—)
Telefonkod	+7−3955-xxx-xxx
Avtokod	38, 85, 138
Aigvö	UTC+8 (MSK+5)

Angarsk (ven.: Анга́рск) om Venäman lidn da lidnümbrik Irkutskan agjan suves. Se om agjan kahtenz' surtte lidnümbrik i koumanz' surtte lidn, Irkutskan lodehline ezilidn.

Istorii

Eländpunktan aluz om pandud Transsibal Maisk-radnikžiloks vl 1946 pästmaha nozolad poltust kivivoišpäi saksan reparacijan mašiništol. Angarsk sai lidnan statusad vn 1951 30. päiväl semendkud, nimitihe jogen mödhe. Šingotihe himižen sarakon keskuseks, vn 1959 rahvahanlugemine fiksirui 134 390 eläjad. Vll 1993−1997 Angarskan rajon oli olmas. Sädihe lidnümbrikod vl 2015 lidnaspäi enččenke rajonanke.

Angarsk šingotase kivivoihimižen i himižen sarakon tegimil (poltuz, voi, voižimed, heretused, bazižed substancijad), elektrolizan kombinatal (uranan küllästamine, katalizatorad), sauvondmaterialiden edheotandoil (cement, gazbeton, torved, metalližkonstrukcijad) i sömtegimištol.

Geografijan andmused

Enččen Angarskan rajonan sijaduz agjas vn 2011 kartal

Lidn sijadase Angar- i Kitoi-jogiden keskes i niiden ühthejoksmusenno. Angar jokseb päivnouzmaižeks röunaks (ven.: Ангара, hura rand), Kitoi om päivlaskmaižeks röunaks (ven.: Кито́й 316 km pitte, burät.: Хүти гол, jogen oiged rand), 425 m ü.m.t. keskmäižel korktusel. Voib nähta Päivnouzmaižen Sajanan Kitoin Gol'cad-mägisel'gad poudal päiväl.

Matkad Irkutskan röunhasai om kümne kilometrad suvipäivnouzmha orhal. Toižed lähembaižed lidnad oma Šelehov 25 km suvhe orhal i Sibirin Usol'je kaks'kümne kilometrad lodeheze orhal.

Tobmuz

Lidnanvuitte Meget-žilo (8 918 rist. vl 2014, tel Irkutskannoks), seičeme žilod, koume küläd da kaks' zajimkad mülüdas lidnümbrikho Angarskan ližaks. Lidnümbrikon pind — 1 150 km².

Lidnümbrikon tobmuden pämez' om sen mer (Administracijan pämez'). Sergei Petrov om meran radnikusel vn 2015 semendkuspäi (uden ümbrikon alusenpanendan aigaspäi). Lidnan Duman ezimez' om Aleksandr Gorodskoi vn 2015 semendkuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 233 567 ristitud, vn 2021 — 221 296 ristitud. Kaik 226 374 eläjad oli lidnas i 238 508 eläjad kaikes lidnümbrikos vl 2017. Kaikiš suremb lidnan ristitišt oli enamba 260 tuhad eläjid vll 1987−2001 (269 000 eläjid vll 1991−1993).

Ortodoksižen hristanuskondan Eläban Eziauguižen Stroican päjumalanpert' (om saudud vll 1995−2006), Jumalanmaman pühän Emäganpäivän jumalanpert' i časoun' oma saudud lidnas. Protestantizman jumalanpertid oma letud. Islaman «Al' Furkan»-pühäpert' om avaitud.

Lapsiden opendusen aluzkundad oma päivkodid, keskškolad.

Transport

Avtobusad, tramvaid, ezilidnelektrojonused (viž stancijad) da taksid oma kundaližeks transportaks lidnas.

Lähembaine lendimport sijadase Irkutskas.

Galerei

• 
  Muštnik oigetud katargha politižile türmatud mehile (2019)
• 
  Eläban Eziauguižen Stroican päjumalanpert', vn 2012 nägu
• 
  Angarskan valdkundaline tehnine universitet (2011, ende akademii)
• 
  «Neftehimik»-kul'turkeskuz (2019, Kivivoihimik)
• 
  «Jermak»-sportkeskusen Sur' Aren (2012)
• 
  Praznuičend Angarskas (2001). Lidnan počtamt om tagamal huralpäi
• 
  Angarsk-päraudtestancijan sauvuz vl 2011

Irdkosketused

• Lidnan Duman oficialine sait (duma-angarsk.ru). (ven.)
• Lidnan Administracijan oficialine sait (angarsk-adm.ru). (ven.)