Vihorevk

Vihorevk
Вихоревка

Flag
Valdkund	Venäma
Eläjiden lugu (2021)	21,719 ristitud
Pind	15 km²
Pämez'	Aleksandr Makarov (sügüz'ku 2025—)
Telefonkod	+7−3953-xxx-xxx
Avtokod	38, 85, 138
Aigvö	UTC+8 (MSK+5)

Vihorevk (ven.: Вихоревка [ˈvʲixərʲɪfkə]) om Venäman lidn da lidnankund Irkutskan agjan keskuzpalan päivlaskmas. Se om Bratskan päivlaskmaine ezilidn, Bratskan rajonan üks'jäine lidn.

Istorii

Eländpunktan aluz om pandud vl 1947 sauvomha «Taišet — Len»-raudted, nimitihe jogen mödhe. Kävutihe ottud plenha verazmalaižiden töid. Radnikžilo sai lidnan statusad vl 1966.

Vihorevk šingotase raudten edheotandoil (kaks' vedimdepod, vagondepo, raudten distancii, kohenduzedheotandad) i mecan varhapanendal da ümbriradmižel. Kaks' penitenciarišt aluzkundad oma lidnas.

Geografijan andmused

Bratskan rajonan sijaduz agjas vn 2011 kartal

Lidn sijadase rajonan keskuzpalan pohjoižes, Vihorev-jogen hural randal (ven.: Вихорева 236 km pitte, Angar-jogen hurapol'ne bassein), Vihorev-jogen da sen Ub'-ližajogen keskes, 365 m ü.m.t. keskmäižel korktusel.

Matkad Irkutskhasai om 472 km suvipäivnouzmha-suvhe orhal, 600 km avtotedme vai 916 km raudtedme. Lähembaine lidn om Bratsk kümnes kilometras päivnouzmha orhal sen röunhasai, 43 km avtotedme (Bratskan keskuzpalhasai) vai 30 km raudtedme (Bratsk-stancijhasai).

Tobmuz

Vihorevk om lidnankundan üks'jäižeks eländpunktaks. Lidnankundan pind — 1 325,87 km².

Lidnankundan tobmuden pämez' om sen Administracijan pämez'. Edeližed lidnan Administracijan pämehed oma Galina Dudareva (vn 2025 uhoku-sügüz'ku), Nikolai Družinin (reduku 2017 — uhoku 2025). Lidnan Duman ezimez' om Lilija Remizova vn 2017 redukuspäi. Edeližed Duman ezimehed oma Jelena Jasinskaja (tal'vku 2015 — reduku 2017), Anželika Nazimova (radoi vn 2015 tal'vkuhusai).

Eläjad

Vn 2010 Venäman rahvahanlugemižen mödhe lidnan eläjiden lugu oli 22 520 ristitud, rajonan kaks' videndest, vn 2021 — 21 719 ristitud. Kaik 21 279 ristitud elihe lidnas vl 2017. Kaikiš suremb lidnan ristitišt oli enamba 24 tuhad eläjid vll 1992−2009 (24 800 eläjad vll 2005−2006).

Ortodoksižen hristanuskondan viž pühäpertid oma avaitud lidnas: ph. Mikulai-čudonsädajan pühäpert' (om saudud vll 1994−1997), Mikulai II-carin-moknikan pühäpert' i koume časounäd.

Openduz

Lapsiden opendusen aluzkundad oma seičeme nimitadud päivkodid, nell' keskškolad (nomer 1, 2, 10, 101), specialine (korrekcine) škol, lapsiden sädamižen pert', čomamahtoiden škol, rajonan sportškol.

Bratskan professionaližen tehnikuman Vihorevkan filial om lidnan professionaližen opendusen aluzkundaks.

Galerei

• 
  Muštnik Jeniseiskan Vihor' Savin-sur'oigenuden oiktastuseks, om pandud vl 2015
• 
  Puruvedim-muštnik vn 2020 elokus
• 
  Vihorevk-päraudtestancijan sauvuz vl 2018

Irdkosketused

• Lidnankundan tobmuden aluzkundoiden oficialine portal (admvih.ru). (ven.)