Železnogorsk Ilimal

Železnogorsk Ilimal
Железногорск-Илимский
	Lidnanznam;
Valdkund	Venäma
Eläjiden lugu (2021)	21,621 ristitud
Pind	102 km²
Pämez'	Pavel Berezovskii; (reduku 2022—)
Telefonkod	+7−39 566-xx-xxx
Avtokod	38, 85, 138
Aigvö	UTC+8 (MSK+5)

Železnogorsk Ilimal (ven.: Железного́рск-Или́мский) om Venäman lidn da lidnankund Irkutskan agjan keskuzpalas. Om Alailiman rajonan administrativižeks keskuseks, mülüb sihe.

Istorii

Eländpunktan aluz om pandud vl 1948 kuti Koršunih-žilo (ven.: Коршуниха) sauvomha küllästamižfabrikad raudkivendon ühtennimiženno löudmižsijanno, nimi om ottud Iliman ližajogespäi. Nevondkundaline ohjastuz planirui sidä valdkundan metallurgijan koumanden bazan palaks. Vl 1958 udesnimitihe žilod Železnogorsk-radnikžiloks. Se sai lidnan statusad vn 1965 20. sügüz'kud udenke nügüdläiženke nimenke erištamha toižiš Železnogorsk-lidnoišpäi.

Istorine Ilimsk-lidn sijazihe koumekümnes kilometras lidnaspäi, amuižel tarabošsijal Angaran i Lenan basseinoiden keskes, se om upotadud Ust'-Ilimskan vezivaradimen täutmižen aigan.

Železnogorsk Ilimal šingotase raudkivendon Koršunihan küllästamižfabrikal^[1] (radab vspäi 1965), raudten edheotandoil (vedimdepo), lämuzelektrokeskusel (ven.: ИТЭЦ-16), mecan ümbriradmižel pilindmaterialoihe.

Geografijan andmused

Lidn sijadase rajonan suves, Leniž-Angaran mägitazangištol, Koršunih-jogen randal (Iliman oiged ližajogi), kuz'toštkümnes kilometras Iliman randaspäi, 430 m ü.m.t. keskmäižel korktusel.

Koršuniha-Angarskai-raudtestancii radab vspäi 1958. Matkad Irkutskhasai om 477 km suvhe orhal, 850 km avtotedme vai 1220 km raudtedme. Lähembaine lidn om Ust'-Kut sada kilometrad päivnouzmha orhal, 150 km avtotedme vai raudtedme.

Klimat om terav kontinentaline. Voden keskmäine lämuz om +0,2 C°, heinkun +18,4 C°, vilukun −17,2 C°. Paneb sadegid 500 mm vodes.

Tobmuz

Železnogorsk Ilimal om lidnankundan üks'jäižeks eländpunktaks. Lidnankundan pind — 496,89 km².

Lidnankundan tobmuden pämez' om sen Administracijan pämez'. Edeline lidnan Administracijan pämez' om Aleksei Kozlov (sügüz'ku 2017 — reduku 2022). Lidnan Dum om likvidacijan pordhal vn 2025 redukuspäi, Nikita Naida om likvidacižen laudkundan ezimehen. Duman ezimehed oliba Igor' Taranük (reduku 2022 — reduku 2025), Aleksandr Zaidulin (reduku 2017 — reduku 2022), Aleksandr Rusanov (radoi vn 2017 redukuhusai).

Eläjad

Vn 2010 Venäman rahvahanlugemižen mödhe lidnan eläjiden lugu oli 26 079 ristitud, rajonan läz pol't, vn 2021 — 21 621 ristitud. Kaik 23 643 ristitud elihe lidnas vl 2017. Nevondkundaližen aigan planiruihe, miše 45 tuhad ristituid linneb eläda lidnas. Kaikiš suremb lidnan ristitišt oli 33 700 eläjid vl 1996.

Ortodoksižen hristanuskondan kaks' pühäpertid^[2] oma avaitud lidnas: Jumalanmaman Kazanin jumalaižen jumalanpert' i Eläban Eziauguižen Stroican jumalanpert' (om saudud vll 2001−2007).

Openduz

Lapsiden opendusen aluzkundad oma kuz' nimitadud päivkodid, Lesnaja skazka-augotižškol-päivkodi («Mecsarn»), viž keskškolad (nomer 1..5), lapsiden da norišton sädamižen šingotesen keskuz G. I. Zamaratskijan nimed, čomamahtoiden škol, lapsiden da norišton sportškol.

Železnogorskan Ilimal professionaline kolledž^[3] om lidnan professionaližen opendusen aluzkundaks.

Galerei

Koršunihan kar'jer (2011)
Lapsiden läžundkodinno (2014)

Homaičendad

Irdkosketused

Lidnankundan tobmuden aluzkundoiden oficialine sait (zhel-ilimskoe.mo38.ru). (ven.)

Železnogorsk Ilimal Vikiaitas

	Irkutskan agjan lidnad
	Alaudinsk \| Alzamai \| Angarsk \| Baikal'sk \| Birüsinsk \| Bodaibo \| Bratsk \| Čerömhovo \| Irkutsk \| Kirensk \| Sajansk \| Sibirin Usol'je \| Slüdänk \| Svirsk \| Šelehov \| Zim \| Železnogorsk Ilimal \| Taišet \| Tulun \| Ust'-Ilimsk \| Ust'-Kut \| Vihorevk

[1] Koršunihan küllästamižfabrik mechel.ru-saital. (ven.) (angl.)

[2] Železnogorskan Ilimal pühäpertid sobory.ru-saital. (ven.)

[3] Železnogorskan Ilimal professionaližen kolledžan sait (пкжи.образование38.рф). (ven.)

[1]

[2]

[3]