Birüsinsk

Birüsinsk
Бирюсинск

Lidnanznam	Flag
Valdkund	Venäma
Eläjiden lugu (2021)	8,632 ristitud
Pind	23,07 km²
Pämez'	Andrei Kovpinec (kül'mku 2014—)
Telefonkod	+7−39 563-xx-xxx
Avtokod	38, 85, 138
Aigvö	UTC+8 (MSK+5)

Birüsinsk (ven.: Бирюси́нск) om Venäman lidn da lidnankund Irkutskan agjan päivlaskmas. Se om Taišetan rajonan kahtenz' lidn da eländpunkt eläjiden lugun mödhe, Taišetan päivlaskmaine ezilidn.

Istorii

Eländpunktan aluz om pandud Transsiban Sujetih-raudtesarakoks (ven.: разъезд Суетиха) vl 1897. Saudaškanzihe žilod senno vl 1899. Vl 1929 mecpilindtegim radaškanzi. Kätihe radnikžiloks vl 1934. Vspäi 1952 gidrolizan tegim radoi, pästi etilspirtad da sötmižsepad vhesai 2005. Sujetih sai lidnan statusad nügüdläiženke nimenke vn 1967 11. päiväl semendkud, nimitihe jogen mödhe. Vhesai 2007 alištui Taišet-lidnan tobmudele oikti.

Birüsinsk šingotase mecan varhapanendal da pilindal, meblin tehmižel i leibänproduktoiden edheotandal.

Geografijan andmused

Lidn sijadase Birüs (On)-jogen oiktal randal (Angaran hurapol'ne bassein), 300 m ü.m.t. keskmäižel korktusel.

Matkad Irkutskhasai om 586 km suvipäivlaskmha orhal, 691 km «Sibir'»-trassadme (R-255) vai 682 km Transsib-raudtedme. Lähembaine lidn om Taišet 13 km päivnouzmha orhal, «Sibir'»-avtotel vai Transsibal.

Tobmuz

Birüsinsk om lidnankundan üks'jäižeks eländpunktaks.

Lidnankundan tobmuden pämez' om sen Administracijan pämez'. Lidnan Duman ezimez' om Lüdmila Banadiseva (Людмила Банадысева) vn 2014 kezakuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 8 981 ristitud, rajonan ühesandez. Kaik 8 477 eläjad oli lidnas vl 2017. Kaikiš suremb lidnan ristitišt oli 13 461 eläjad vl 1970.

Ortodoksižen hristanuskondan kaks' pühäpertid oma saudud i avaitud lidnas: Sündun Eläbzdusen pühäpert' (om saudud vll 1998−2010) i Pühän Innokentii-irkutalaižen jumalanpert' (vspäi 1958).

Lapsiden opendusen aluzkundad oma severz'-se päivkodid, kaks' keskškolad (nomer 6 i 16), čomamahtoiden škol, sportškol. Professionaližen opendusen aluzkundad ratas lähembaižiš lidnoiš.

Irdkosketused

• Lidnan municipaližen ühtnikan oficialine sait (biryusinskmo.ru). (ven.)