Zim

Zim
Зима

Lidnanznam	Flag
Valdkund	Venäma
Eläjiden lugu (2021)	30,640 ristitud
Pind	52,85 km²
Pämez'	Andrei Konovalov (sulaku 2016—)
Telefonkod	+7−39 554-xx-xxx
Avtokod	38, 85, 138
Aigvö	UTC+8 (MSK+5)

Zim (ven.: Зима́, burät.: Зэмэ хото) om Venäman lidn da lidnümbrik Irkutskan agjan suves. Om Ziman rajonan administrativižeks keskuseks mugažo, ei mülü sihe.

Istorii

Eländpunkt mainitase ezmäižen kerdan vl 1739 Milleran «Matkan ümbrikirjutand Jeniseiskaspäi Irkutskhasai»-käzikirjuteses kuti Mironovo vai Ziman tal'vdundsija (ven.: Зиминское зимовье), nimitihe Zim-jogen mödhe (ven.: Зима, burät.: Зэмэ), nimituz om burätan augotižlibundanke. Alusenpanendan oficialine voz' praznuičendan täht — 1743. Šingotaškanzihe Moskvan traktan sauvomiženke vspäi 1772, ehtatimenno Okanjoges päliči. Vl 1891 Transsib läbiti žilod, sätihe Zim-raudtestancijad. Žilo sai lidnan statusad vl 1922. Vspäi 1963 alištub agjan tobmudele oikti.

Zim-lidn šingotase raudten edheotandoil (vedimdepo, vagondepo, raudten distancii) da mecan ümbriradmižel pilindmaterialoihe (enamba mi 30 edheotandad). Ende gidrolizan tegim, kanifolin ekstrakcijan tegim, mecanpunümbriradai kombinat i raudbetontegesiden tegim oliba mugažo. Lähižed Ziman himine tegim (nüg. «Sajanskhimplast») i Okinskaja-lidnfabrik (Uhtui-žilo) oma registriruidud toižiš municipalitetoiš.

Geografijan andmused

Ziman rajonan sijaduz agjas vn 2011 kartal

Lidn sijadase ümbärdajan rajonan keskuzpalan pohjoižpäivnouzmas, Okanjogen hural randal (lankteb Bratskan vezivaradimhe, Angaran hurapol'ne bassein, ven.: Ока, burät.: Аха гол) da sen Zim-ližajogen sun randoil, 450 m ü.m.t. keskmäižel korktusel.

Matkad Irkutskhasai om 235 km suvipäivnouzmha orhal, 265 km avtotedme vai raudtedme. Lähembaine lidn om Sajansk kaks'kümne üks' kilometr pohjoižhe orhal, 24 km avtotedme vai Okan mödvedhe. Voib olda manrehkaidusid kudhe ballhasai (12:späi), om igähižen rougun linzoid lidnan territorijal.

Tobmuz

Zim om lidnümbrikon üks'jäižeks eländpunktaks.

Lidnümbrikon tobmuden pämez' om sen mer (Administracijan pämez'). Andrei Konovalov om meran radnikusel vn 2016 sulakuspäi. Edeline mer om Vladimir Trubnikov, radoi vn 2016 sulakuhusai. Lidnan Duman ezimez' om Natal'ja Derevägina vn 2024 kül'mkuspäi. Edeližed lidnan Duman ezimehed oma Galina Polinceva (Галина Полынцева) i Lüdmila Avhadeeva, hö radoiba edel vn 2024 kül'mkud.

Eläjad

Vn 2010 Venäman rahvahanlugemižen mödhe lidnan eläjiden lugu oli 32 508 ristitud, vn 2021 — 30 640 ristitud. Kaik 31 229 ristitud elihe lidnas vl 2017. Kaikiš suremb lidnan ristitišt oli 48 097 eläjid vl 1979.

Ortodoksižen hristanuskondan kaks' pühäpertid oma avaitud lidnas: ph. Mikulai-čudonsädajan i Eläban Eziauguižen Stroican jumalanpertid.

Openduz

Lapsiden opendusen aluzkundad oma kahesa nomeruidud päivkodid (nomer 4, 10, 14..16, 56, 171, 212), augotižškol-päivkodi nomer 11, seičeme keskškolad (nomer 1, 5, 7..10, 26), licei, korrekcine škol, lapsiden da norišton sädamižen pert', muzikškol, lapsiden da norišton sportškol.

Ziman raudtetehnikum om lidnan professionaližen opendusen aluzkundaks.

Galerei

• 
  Vezičuhunduz (2014)
• 
  VL22m-692-elektrovedim (2007)
• 
  Zim-päraudtestancijan sauvuz vl 2016

Irdkosketused

• Lidnan tobmuden aluzkundoiden oficialine sait (zimadm.ru). (ven.)