Bratsk

Bratsk
Братск
Lidnanznam;	Flag;
Valdkund	Venäma
Eläjiden lugu (2017)	231,602 ristitud
Pind	428 km²
Pämez'	Sergei Serebrennikov; (2005−2010,; sügüz'ku 2014—)
Telefonkod	+7−3953-xxx-xxx
Avtokod	38, 85, 138
Aigvö	UTC+8 (MSK+5)

Bratskan administrativižed rajonad:
Padunan rajon Oigedrandaline rajon Keskuzrajon

Bratsk (ven.: Братск) om Venäman lidn da lidnümbrik Irkutskan agjan keskuzpalan päivlaskmas. Se om agjan kahtenz' surtte lidn i koumanz' surtte lidnümbrik, mugažo Bratskan rajonan administrativine keskuz (ei mülü sihe).

Istorii[redaktiruida | redaktiruida purde]

Enzne Bratskan lidnuz (ven.: Братский острог) oli tetab vspäi 1631 Padunan kos'kenno Angar-jogen randal, alištui Jeniseiskan lidnusele. Vl 1954 nevondkundaline tobmuz päti sauda järedad gidroelektrostancijad kos'ken rajonas, i sirtihe enamba sadad eländpunktoid täutmaha vezivaradint, sidä kesken Bratsk-žilod-ki. Nügüdläižen eländpunktan aluz om pandud vn 1955 12. päiväl tal'vkud radnikžiloiden ühtištusel, nimitihe rajonan Bratsk-žilo-keskusen mödhe. Lidnan rajonad oma erigoittud taigmecan saril tähäsai.

Vll 1954−1961 saudihe padoseinäd da GES:ad, vozil 1961−1967 pästtihe töhö GES:an agregatoid da täuttihe Bratskan vezivaradint (169 km³, kahtenz' surtte mail'mas). Bratsk šingotase äisarakoižeks keskuseks, energetikal i alüminijantegimel, mecan ümbriradmižel.

Geografijan andmused[redaktiruida | redaktiruida purde]

Lidn sijadase Angar-jogen Bratskan i Ust'-Ilimskan vezivaradimiden randoil, 296..618 m korktusil, 450 m ü.m.t. keskmäižel korktusel. Matkad Irkutskhasai om 460 km suvhe-suvipäivnouzmha orhal, 618 km avtotedme vai 983 km raudtedme. Lähembaine lidn om Vihorevk 10 km päivlaskmha orhal Bratskan röunaspäi, 43 km avtotedme (lidnan keskusespäi) vai 30 km raudtedme (Bratsk-stancijaspäi).

Bratsk om lidnümbrikon üks'jäine eländpunkt. Lidnan koume rajonad ei olgoi municipaližikš ühtnikoikš, no eriližed administrativižed komitetad ohjatas niil.

Eläjad[redaktiruida | redaktiruida purde]

Vn 2010 Venäman rahvahanlugemižen mödhe eläjiden lugu oli 246 319 ristitud. Kaikiš suremb ristitišt oli 289 tuhad eläjid vll 1991−1993, se poleni eländpunktoiden erištundan tagut.

Professionaližen opendusen aluzkundad: Bratskan valdkundaline universitet, 4 tehnikumad i 5 kolledžad.

Ižanduz[redaktiruida | redaktiruida purde]

Bratsk šingotase elektroenergetikal, alüminijantegimel, raudühthesuladusiden tegimel, cellülozbumagaižel tegimištol, sauvondmaterialiden edheotandoil (pilindmaterialad, faner, raudbeton, metalližkonstrukcijad, keradajad pertid) i sömtegimištol (leib, jomižed), mugažo lämbituzmašiništon edheotand radab.

Avtobusad, trolleibusad da taksid oma kundaližeks transportaks lidnas, mugažo jogistancii radab kezaaigan. Avtoümbärte mäneb lidnan päivlaskmaižen i pohjoižen röunanno. Rahvahidenkeskeine soda- da civiline Bratsk-lendimport (BTK / БРС) sijadase Bratskan rajonan territorijal, 3 km pohjoižröunaspäi, tehtas reisid Venäman lähembaižihe järedoihe lidnoihe i Moskvha.

Galerei[redaktiruida | redaktiruida purde]

Lidnan Duman i administracijan sauvuz (2017)
Muštnik Ivan Naimušinale (GES:an ezmäine pämez')
Mikoi-arhangelan jumalanpert' Angaran küläs, vn 2016 nägu
Bratskan alüminijantegim vl 2017 (RUSAL Bratsk)
Bratskan gidroelektrostancijan padosein vl 2012, nägunke Energetik-mikrorajonha
Diabazkar'jer läz GES:ad vl 2005
Bratskan valdkundaline universitet, 3. korpus (2010)
Čomamahtoiden pert'kulu (2010)
Bratskan dramteatr (2017)
Bratsk-lendimportan sauvuz vl 2012

Irdkosketused[redaktiruida | redaktiruida purde]

Bratsk Vikiaitas

	Irkutskan agjan lidnad
	Alaudinsk \| Alzamai \| Angarsk \| Baikal'sk \| Birüsinsk \| Bodaibo \| Bratsk \| Čerömhovo \| Irkutsk \| Kirensk \| Sajansk \| Sibirin Usol'je \| Slüdänk \| Svirsk \| Šelehov \| Zim \| Železnogorsk Ilimal \| Taišet \| Tulun \| Ust'-Ilimsk \| Ust'-Kut \| Vihorevk