Balabanovo

Balabanovo
Балабаново
Lidnanznam;	Flag;
Valdkund	Venäma
Eläjiden lugu (2023)	30,194 ristitud
Pind	17,85 km²
Pämez'	Irina Nikiforenko; (reduku 2019—)
Telefonkod	+7−48 438-xx-xxx
Avtokod	40
Aigvö	UTC+3 (MSK+0)

Balabanovo (ven.: Балаба́ново) om Venäman lidn da lidnankund Kalugan agjan pohjoižpäivnouzmas. Se om Borovskan rajonan kaikiš suremb lidn koumespäi, Obninskan pohjoine ezilidn.

Istorii

Eländpunkt mainitase ezmäižen kerdan vl 1584 vai vl 1613 kuti Bolobonovo-külä i sen lähine Jerohino-külä. Šingotaškanzihe raudten sauvondan jäl'ghe vll 1896−1898. Kätihe lidnanvuiččeks žiloks vl 1935. Toižen mail'man sodan aigan lidn oli okkupiruidud nacistoil (21. reduku 1941 — 28. tal'vku 1941). Vn 1972 kezakun 12. päiväspäi om lidnan statusanke. Balabanovo-1-sodalidnut mülüb lidnha vn 2007 kezakuspäi.

Balabanovo šingotase sauvondmaterialiden pästandal (keramine apakut; «Plitspičprom:an» (enččel virifabrik) puižed apakod, pilindmaterialad, brus da pertid sišpäi^[1]; «Ruukki»-kompanijan metalližkonstrukcijad), bumagpakuitesen tegimel («Stora Enso»), sömtegimištol (maidtegim, leibtegesed), suksiden fabrikal^[2]. Punümbriradajan tegimišton tedoinstitut radab. Läz kümned sodapalakundad seištas lidnas ümbri.

Geografijan andmused

Lidn sijadase rajonan päivnouzmaiženno röunanno, 160 m ü.m.t. keskmäižel korktusel. Istj-jogen oiged rand (ven.: Истья 56 km pitte, Okan hurapol'ne bassein) om lidnan pohjoižröunaks. Matkad Moskvan agjhasai om kahesa kilometrad pohjoižhe i pohjoižpäivnouzmha orhal. Matkad Kalughasai om 79 km suvhe orhal, 87 km avtotel vai raudtel. Lähembaižed lidnad oma Borovsk-rajonankeskuz ühesas kilometras päivlaskmha orhal vai 12 km avtotedme, Jermolino koumes kilometras päivlaskmha orhal vai kudes kilometras avtotedme, i Obninsk vides kilometras suvhe orhal vai teidme.

Balabanovo-raudtestancii radab lidnan keskuses vspäi 1899 «Moskv — Bränsk»-keskustal. «Moskv — Bränsk»-avtote (M3-trass) läbitab lidnan päivnouzmašt palad, Sur' Moskvan avtorengaz (A-108) ristikoičeb lidnan päivnouzmaspäi päivlaskmha.

Tobmuz

Balabanovo om lidnankundan üks'jäižeks eländpunktaks. Lidnankundan pind — 17,85 km², sidä kesken pertišt otab läz kümned nellikkilometrad.

Lidnankundan tobmuden pämez' om sen Duman ezimez'. Edeline lidnan pämez' om Sergei Sudakov, radoi vn 2019 redukuhusai. Lidnan Administracijan pämez' om Sergei Galkin vn 2018 redukuspäi. Edeline Administracijan pämez' om Väčeslav Parfenov (semendku 2016 — reduku 2018).

Eläjad

Vl 1939 žilon ristitišt oli 2 632 eläjad. Kaik 25 752 eläjad oli lidnas vl 2017. Kaikiš suremb lidnan ristitišt om nügüd' i oli 25..26 tuhad eläjid vll 2010−2020 (26 337 rist. vl 2010 Venäman rahvahanlugemižen mödhe), rajonan kaks' videndest.

Rahvahad (2010): venälaižed — 88,3 %, ukrainalaižed — 2,9 %, uzbekad — 1,8 %, armenijalaižed — 1,2 %, totarlaižed — 1,0 %, toižed rahvahad — 4,8 %.

Ortodoksižen hristanuskondan kaks' jumalanpertid^[3] oma saudud lidnas: ph. Joann Kronštadtalaižen (1994) i puine Jumalanmaman «Arvokahašti olda»-jumalaižen (letihe vll 2015−2016).

Professionaližen opendusen aluzkundad oma privatine Nügüd'aigaine gumanitarine kolledž^[4] i Moskvan pedagogižen valdkundaližen universitetan filial.

Galerei

Toižen mail'man sodan Velleskaum läz školad (2015)
Kundaline kül'bet' vl 2010
Lidnan kul'turkeskuz (2023, om saudud vl 1957)
Balabanovo-raudtestancii vl 2010

Homaičendad

Irdkosketused

Lidnankundan tobmuden sait (balabanovo-r40.gosweb.gosuslugi.ru) i sen versii edel vn 2023 elokud (admbalabanovo.ru). (ven.)

Balabanovo Vikiaitas

	Kalugan agjan lidnad
	Balabanovo \| Belousovo \| Borovsk \| Jermolino \| Juhnov \| Kalug \| Kirov \| Kondrovo \| Kozel'sk \| Kremönki \| Lüdinovo \| Malojaroslavec \| Medin' \| Meščovsk \| Mosal'sk \| Obninsk \| Sosenskii \| Spas-Demensk \| Suhiniči \| Žizdr \| Žukov \| Tarus

[1] Kalugan äiprofil'žen punümbriradajan «Sojuz-centr»-kombinatan sait (pspcom.ru). (ven.)

[2] «Centr sportivnih tehnologii»-kompanijan sait (stc-ski.ru). (ven.) (angl.)

[3] Balabanovon pühäpertid sobory.ru-saital. (ven.)

[4] Nügüd'aigaižen gumanitarižen kolledžan sait (college-balabanovo.ru). (ven.)

[1]

[2]

[3]

[4]