Očor

Očor
Очёр

	Flag
Valdkund	Venäma
Eläjiden lugu (2023)	14,294 ristitud
Pind	37,99 km²
Pämez'	Aleksandr Labutin (sügüz'ku 2013—)
Telefonkod	+7−34 278-xx-xxx
Avtokod	59, 81, 159
Aigvö	UTC+5 (MSK+2)

Očor (ven.: Очёр, perm. komi: Ошшор кар) om Venäman lidn Permin randan suvipäivlaskmas. Se om Očoran ümbrikon (vhesai 2025 lidnümbrikon, edel 2019. vot — rajonan) administrativižeks keskuseks da palaks.

Istorii

Eländpunktan aluz om pandud vl 1759 kuti Stroganovad-torgovanoiden Očoran raudtegim, nimitihe jogen mödhe. Vspäi 1918 Očoran mašiništonsauvondtegim radab sen alusel, ende tegi bul'dozeroid, torvenpanijoid, pästab štangoid-pompid, mugažo valamiž-mehanine ceh om olmas. Žilo sai lidnan statusad vl 1950.

Lidnan toižed sarakod oma mecan ümbriradmine (pilindmaterialad, mebel') i sömtegimišt (maidtegim, leibkombinat, alkogolitomiden jomižiden tegim). Pen' Očoran GES radab (0,4 MVt vägevudenke).

Geografijan andmused

Očoran ümbrikon sijaduz randas vn 2010 kartal

Lidn sijadase ümbrikon päivnouzman keskuzpalas, Očor-jogen keskjoksmusen randoil (82 km pitte, Kaman oiged ližajogi), 150 m ü.m.t. keskmäižel korktusel.

Matkad Permihesai om ühesakümne kaks' kilometrad päivnouzmha orhal vai 110 km avtotedme. Lähembaine lidn da raudtestancii om Vereščagino 21 km pohjoižhe orhal vai 25 km avtotedme.

Očor oli lidnankundan üks'jäižeks eländpunktaks. Lidnankund oli vll 2004−2019.

Eläjad

Vn 2010 Venäman rahvahanlugemižen mödhe lidnan eläjiden lugu oli 14 238 ristitud, vn 2021 — 14 385 ristitud. Kaik 14 240 eläjad oli lidnas vl 2017. Kaikiš suremb lidnan ristitišt oli 16 400 eläjad vl 1989.

Ortodoksižen hristanuskondan kaks' jumalanpertid oma kaičenus i avaitud lidnas: Mikoi-arhangelan (om saudud vll 1830−1835) i vanhuskolaižiden Jumalanmaman Emäganpäivän (om saudud vl 1911 vai sen möhemba) jumalanpertid.

Lapsiden opendusen aluzkundad oma päivkodid, keskškolad. Stroganovan kolledž om lidnan professionaližen opendusen aluzkundaks.

Galerei

• 
  Rajonan administracijan üks' sauvusišpäi (kuvan keskuses, 2020)
• 
  Mikoi-arhangelan jumalanpert', vn 2014 nägu
• 
  Jumalanmaman Emäganpäivän jumalanpert' (Belokrinickii-sebr), vn 2020 nägu
• 
  Očoran keskškol nomer 3 (2020)
• 
  Očoran kodirandantedištandmuzei A. Necvetaevan nimed (2014)

Irdkosketused

• Lidnankundan lehtpoled Očoran ümbrikon oficialižel ocherskiy.ru-saital. (ven.)