Krasnovišersk

Krasnovišersk
Красновишерск

Lidnanznam
Valdkund	Venäma
Eläjiden lugu (2023)	14,164 ristitud
Pind	18,57 km²
Telefonkod	+7−34 243-xx-xxx
Avtokod	59, 81, 159
Aigvö	UTC+5 (MSK+2)

Krasnovišersk (ven.: Краснови́шерск, perm. komi: Вишера кар) om Venäman lidn Permin randan pohjoižes. Se om Krasnovišerskan ümbrikon (edel vn 2020 vilukud rajonan) administrativižeks keskuseks.

Istorii

Eländpunktan aluz om pandud vl 1894 kuti Vižaih-žilo (ven.: посёлок Вижаиха) da metallurgijan tegim. Vl 1930 sauvoškanzihe cellülozbumagašt kombinatad (pästli bumagad i puapakoid, vspäi 2006 ei ole rados) i udesnimitihe žilod nügüdläižikš, kävutihe türmatud mehiden töid. Krasnovišersk sai lidnan statusad vn 1942 2. päiväl heinkud.

Saihe diamantoid lidnanno (vl 2014 «Uralalmaz»-edheotand tuli bankrotnendale torhuden surihe varoihe kacmata). Krasnovišersk šingotase mecpilindan edheotandoil i mectorhuden vendal Solikamskan bumagkombinatannoks, mramoran ümbriradmižel sijaližes torhudespäi, sadas kivivoid lidnan ümbrištos i hil't koivuspäi amuižel mahtusel.

Geografijan andmused

Lidn sijadase ümbrikon suvipalan päivlaskmas, Višer-jogen (ven.: Ви́шера, perm. komi: Висьӧр 415 km pitte, Kaman hura ližajogi) hural randal, 130 m ü.m.t. keskmäižel korktusel.

Matkad Permihesai om 270 km suvhe orhal vai 310 km avtotedme. Lendimport om saudud lidnan päivlaskmaižel röunal, ei ole rados. Lähembaine lidn om Čerdin' 33 km päivlaskmha orhal vai 63 km avtotedme. Lähembaine raudtestancii sijadase Solikamskas 105 km suvhe.

Klimat om ven kontinentaline, tal'v om pit'k. Voden keskmäine lämuz om −0,3 C°, kezakun-heinkun +14,5..+17,1 C°, elokun +12,8 C°, tal'vkun-uhokun −14,0..−15,6 C°. Il'man keskmäine vozne relätivine nepsuz om 74,9 %.

Tobmuz

Kaik nell' žilod da kaks' küläd mülüiba enččehe lidnankundha Krasnovišerskan ližaks. Lidnankundan pind oli 30,5 km².

Lidnankundan tobmuden pämez' oli sen Duman ezimez'. Lidnan Dum om likvidiruidud vn 2020 kezakus, Nadežda Antipina oli sen jäl'gmäižen pämehen (kül'mku 2017 — reduku 2019). Lidnankundan Administracii om likvidiruidud vn 2018 tal'vkus, Gennadii Loparev radoi sen jäl'gmäižen pämehen (reduku 2015 — reduku 2017).

Eläjad

Vn 2010 Venäman rahvahanlugemižen mödhe lidnan eläjiden lugu oli 16 099 ristitud, lidnankundan — 16 603 ristitud, rajonan seičeme ühesandest. Vn 2021 rahvahanlugemižen mödhe lidnan ristitišt oli 14 460 eläjad. Vl 2017 kaik 15 587 ristitud elihe lidnas i 15 919 ristitud kaikes lidnankundas. Kaikiš suremb lidnan ristitišt oli 19 400 eläjad vll 1996−2000.

Ortodoksižen hristanuskondan phh. Pedroin i Pauloin jumalanpert' (letihe vll 1890−1896) om avaitud lidnas.

Lapsiden opendusen aluzkundad oma kaks' nimitadud päivkodid (ühesa sauvust ühtheverzin), aluzškol (nomer 4), kaks' keskškolad (nomer 1 i 8), specialine (korrekcine) škol-internat, ližaopendusen keskuz B.B. Protasovan nimed, čomamahtoiden škol. Solikamskan tehnologižen kolledžan Krasnovišerskan filial (edel vn 2024 elokud erigoittud Uralan tegimištoline tehnikum) om lidnan professionaližen opendusen aluzkundaks.

Galerei

• 
  Znam lidnan röunal (2009)
• 
  Adivpert', vn 2012 nägu
• 
  Mecpilindan edheotand vl 2012
• 
  «Fortuna»-lauk (2012)
• 
  Lidnümbrikon kul'turkeskuz (2012)
• 
  Enččen Višeran cellülozbumagaižen kombinatan tulend vl 2012

Irdkosketused

• Lidnan da sen lidnümbrikon tobmuden sait (красновишерск-адм.рф). (ven.)
• Krasnovišerskan da sen rajonan kirjištsisteman sait (krasnovish-biblio.ru). (ven.)