Gubah

Gubah
Губаха
	Lidnanznam;
Valdkund	Venäma
Eläjiden lugu (2023)	22,915 ristitud
Pind	42,97 km²
Pämez'	Nikolai Lazeikin; (tal'vku 2016—)
Telefonkod	+7−34 248-xx-xxx
Avtokod	59, 81, 159
Aigvö	UTC+5 (MSK+2)

Gubah (ven.: Губа́ха, perm. komi: Губаха) om Venäman lidn Permin randan päivnouzmas. Se om Gubahan lidnümbrikon administrativine keskuz.

Istorii

Eländpunktan aluz om pandud vl 1755 samha raudkivendod, vspäi 1825 — kivihil't-ki. Vl 1879 raudte läbiti lidnad, i kivihilen samine ližadui lujas. Kätihe Gubah-žilod lidnanvuiččeks vl 1928. Vspäi 1936 koksanhimine tegim radab. Ühtištadihe Gubahad lähižidenke žiloidenke da anttihe lidnan statusad vl 1941.

Vl 2012 ühtištuihe lidnümbrikho lidnad rajonanke. Vl 2022 ližatihe Gremäčinskan lidnümbrikod sihe.

Gubah šingotase himižel^[1] i koksanhimižel^[2] tegimil (organižen himijan levitadud substancijad), mouckiven samižel, mugažo mecan ümbriradmižen edheotandad i Kizelan GRES № 3 ratas lidnas.

Geografijan andmused

Lidn sijadase Kos'v-jogen randoil (Kaman hura ližajogi), 300 m ü.m.t. keskmäižel korktusel.

Matkad Permihesai om 120 km suvipäivlaskmha orhal vai 210 km avtotedme. Lähembaižed lidnad oma Gremäčinsk 36 km suvhe orhal vai 44 km avtotedme i Kizel 25 km pohjoižhe orhal vai avtol.

Tobmuz

Lidnanvuiččed Ugleural'skii- (9 109 rist. vl 2017) i Širokovskii-žilod (3 220 rist. vl 2017), nell' muite žilod i kaks' raudtestancijad mülüdas lidnümbrikho Gubahan ližaks. Lidnümbrikon pind oli 1009,5 km² edel 2023. vot, sid' 2334 km². Vspäi 2023 Gremäčinsk-lidn i sen enččen lidnümbrikon eländpunktad (kuz' žilod) mülüdas Gubahan lidnümbrikho mugažo.

Lidnümbrikon pämez' om sen Administracijan pämez'. Konstantin Porollo radab Gubahan lidnümbrikon Duman ezimehen vn 2021 redukuspäi, om valitud tošti lidnümbrikoiden ühtištusen jal'ghe.

Eläjad

Vn 2010 Venäman rahvahanlugemižen mödhe lidnan eläjiden lugu oli 28 111 ristitud. Vl 2017 kaik 20 289 ristitud elihe lidnas i 34 586 ristitud kaikes lidnümbrikos. Kaikiš suremb lidnan ristitišt oli 36 858 eläjad vl 1989 nügüdläižiš röunoiš.

Rahvahad (2010): venälaižed — 89 %, totarlaižed — 6,9 %, ukrainalaižed — 1,1 %, toižed rahvahad — 3 %.

Ortodoksižen hristanuskondan koume jumalanpertid^[3] oma avaitud lidnas. Islaman pühäpert' radab lidnas 2000-nziš vozišpäi.

Professionaližen opendusen aluzkundad oma Uralan medicinine kolledž^[4] i Uralan himiž-tehnologine kolledž^[5], molembiden päfaterad sijadasoiš Gubahas.

Galerei

Jumalanmaman Vladimiran jumalaižen pühäpert', vn 2008 nägu (om saudud vll 1990−1996)
Jumalanmaman «Kaikiden gorähižiden ihastuz»-jumalaižen pühäpert', vn 2008 nägu (om saudud vll 2001−2007)
Himine «Metafraks»-tegim vl 2009
Gubahan koksanhimine tegim vl 2015
Leninan prospekt vl 2012

Homaičendad

↑ Himižen «Metafraks»-tegimen sait (metafrax.ru). (ven.) (angl.)
↑ «Gubahinskii koks»-edheotandan sait (gkoksugol.ru). (ven.)
↑ Gubahan pühäpertid sobory.ru-saital. (ven.)
↑ Uralan medicinižen kolledžan sait (chusmed.ru). (ven.)
↑ Uralan himiž-tehnologižen kolledžan sait (ухтк59.рф). (ven.)

Irdkosketused

Lidnümbrikon tobmuden aluzkundoiden oficialine sait (gubakhaokrug.ru). i sen vanh versii (old.gubakhaokrug.ru, edel vn 2020 uhokud). (ven.)

Gubah Vikiaitas

	Permin randan lidnad
	Aleksandrovsk \| Berezniki \| Čaikovskii \| Čerdin' \| Černušk \| Čormoz \| Čusovoi \| Dobränk \| Gornozavodsk \| Gremäčinsk \| Gubah \| Kizel \| Krasnokamsk \| Krasnovišersk \| Kudimkar \| Kungur \| Lis'v \| Nitv \| Očor \| Ohansk \| Os \| Perm' \| Solikamsk \| Usol'je \| Vereščagino

[1] Himižen «Metafraks»-tegimen sait (metafrax.ru). (ven.) (angl.)

[2] «Gubahinskii koks»-edheotandan sait (gkoksugol.ru). (ven.)

[3] Gubahan pühäpertid sobory.ru-saital. (ven.)

[4] Uralan medicinižen kolledžan sait (chusmed.ru). (ven.)

[5] Uralan himiž-tehnologižen kolledžan sait (ухтк59.рф). (ven.)

[1]

[2]

[3]

[4]

[5]