Dobränk

Dobränk
Добрянка
Lidnanznam;	Flag;
Valdkund	Venäma
Eläjiden lugu (2023)	28,545 ristitud
Telefonkod	+7−34 265-xx-xxx
Avtokod	59, 81, 159
Aigvö	UTC+5 (MSK+2)

Dobränk (ven.: Добря́нка, perm. komi: Добрянка) om Venäman lidn Permin randan keskuses. Se om Dobränkan ümbrikon (edel 2025. vot lidnümbrik, edel vn 2019 tal'vkud — rajon) administrativižeks keskuseks da palaks.

Istorii

Eländpunkt mainitase ezmäižen kerdan vl 1623 kuti Domränk-külä (ven.: Домрянка). Sauvoškanzihe vas'kentegint i žilod senno vl 1752. Pigai vajehtihe nimed nügüdläižikš i tegimen profiläd raudan samižhe sijaližen vas'kkivendon vähän lugun tagut. 18. voz'sadan lopuspäi vedihe jarmankoid i toihe lidnalašt kul'turad Permišpäi. Radnikžilo sai lidnan statusad vl 1943. Vll 1954−1956 täuttihe Kaman vezivaradint, i demontiruihe metallurgijan tegint.

Dobränk šingotase järedan Permin GRES:an radol (3,3 GVt, valdkundan nellänz' GRES vägevuden mödhe), mecan ümbriradmižen edheotandoil (mecpilind, mebel'), kivivoin samižen edheotandoil, elektromašiništon pästandal kivivoin da gazan tegimišton täht^[1].

Geografijan andmused

Lidn sijadase ümbrikon suvipäivlaskmas, Kaman vezivaradimen hural randal, penen Dobränk-jogensunno (jogi om 43 km pitte), 130 m ü.m.t. keskmäižel korktusel.

Matkad Permin röunhasai om vižkümne kilometrad suvhe avtol. Toine lähembaine lidn om Čormoz 38 km lodeheze orhal, vezivaradimen oiktal randal, i 203 km avtotedme Permin kal't. Lidnan Dobränk-raudtestancii radab jüguiden täht vaiše.

Tobmuz

Kaik kahesa küläd mülüihe lidnankundha Dobränkan ližaks edel 2020. vot. Lidnankundan pind oli 498,24 km².

Lidnan jäl'gmäine pämez' om Dmitrii Antonov, radoi vn 2016 tal'vkuspäi.

Eläjad

Vl 2010 Venäman rahvahanlugemižen mödhe lidnan eläjiden lugu oli 33 686 ristitud, lidnankundan — 34 198 ristitud, rajonan koume videndest, lidnan vl 2021 — 28 782 ristitud. Vl 2017 kaik 33 083 ristitud elihe lidnas i 33 513 ristitud kaikes lidnankundas. Kaikiš suremb lidnan ristitišt oli 38 400 eläjad vll 2000−2001.

Ortodoksižen hristanuskondan nell' pühäpertid^[2] om avaitud lidnas: koume jumalanpertid (Jumalanmaman Sündundpäivän, ph. Mitrofan Voronežalaižen, Joann-jumalantedomehen) i ph. Aleksandr Nevalaižen časoun'-muštnik (om udessaudud).

Lapsiden opendusen aluzkundad oma nell' päivkodid, aluzškol (kadetine škol), koume keskškolad (nomer 2, 3, 5), čomamahtoiden škol, sportškol. Dobränkan gumanitariž-tehnologine tehnikum^[3] om lidnan professionaližen opendusen aluzkundaks.

Galerei

Kodirandantedištandmuzejan tulend (2012)
Jumalanmaman Sündundpäivän jumalanpert', vn 2012 nägu (om saudud vll 1832−1852)
Ph. Aleksandr Nevalaižen časoun'-muštnik, vn 2012 nägu (om saudud vl 2000)
Lidnan torgusel (2012)
Personaline pertišt vl 2012

Homaičendad

Irdkosketused

Lidnan i sen ümbrikon tobmuden aluzkundoiden sait (dobrraion.ru). (ven.)

Dobränk Vikiaitas

	Permin randan lidnad
	Aleksandrovsk \| Berezniki \| Čaikovskii \| Čerdin' \| Černušk \| Čormoz \| Čusovoi \| Dobränk \| Gornozavodsk \| Gremäčinsk \| Gubah \| Kizel \| Krasnokamsk \| Krasnovišersk \| Kudimkar \| Kungur \| Lis'v \| Nitv \| Očor \| Ohansk \| Os \| Perm' \| Solikamsk \| Usol'je \| Vereščagino

[1] Dobränkan elektromašiništon edheotandan sait (npoetalon.ru). (ven.)

[2] Dobränkan pühäpertid sobory.ru-saital. (ven.)

[3] Dobränkan gumanitariž-tehnologižen tehnikuman sait (dobr-dgtt.ru). (ven.)

[1]

[2]

[3]