Mine sisu juurde

Gremäčinsk

Vikipedii-späi
Gremäčinsk
Гремячинск
 Lidnanznam
 Flag
Valdkund Venäma
Eläjiden lugu (2023) 8,100 ristitud
Pind 65 km²
Gremäčinsk Гремячинск
Telefonkod +7−34 250-xx-xxx
Avtokod 59, 81, 159
Aigvö UTC+5 (MSK+2)


Gremäčinsk (ven.: Гремя́чинск, perm. komi: Гремячӧй кар, tot.: Гремячинск) om Venäman lidn Permin randan päivnouzmas. Mülüb Gubahan lidnümbrikho vspäi 2023, ende oli Gremäčinskan rajonan da sen lidnankundan i sid' Gremäčinskan lidnümbrikon (2018−2022) administrativižeks keskuseks.

Istorii[vajehta | vajehtada tekst]

Eländpunktan aluz om pandud vl 1942 samha kivihil't kaivuziden da Baskai-žilon randtestancijanno (ven.: Баская) ühtištusel, kävutihe ottud plenha saksalaižiden saldatoiden töid. Lidnanvuitte žilo sai lidnan statusad vl 1949. Kivihilen samižen jäl'gmaižed kaivuded oma upotadud 1990-nzil vozil.

Gremäčinsk-lidn šingotase mecan ümbriradmižel kombinatal (koivuine faner, latofleks) da edheotandoil (pilindmaterialad), mugažo sömkombinat i leibkombinat ratas.

Geografijan andmused[vajehta | vajehtada tekst]

Enččen Gremäčinskan lidnümbrikon (rajonan) sijaduz randas (2010)

Lidn sijadase Sur' Gremäčai-jogen randoil (ven.: Большая Гремячая 17 km pitte, Kaman hurapol'ne bassein), 340 m ü.m.t. keskmäižel korktusel.

Matkad Permihesai om 105 km suvipäivlaskmha orhal vai 170 km avtotedme. Lähembaižed lidnad oma Gornozavodsk 36 km suvipäivnouzmha orhal vai 57 km avtotedme, Čusovoi 32 km suvhe vai 47 km avtotedme i raudtedme, Gubah 35 km pohjoižhe vai 42 km avtol i raudtedme. Baskai-raudtestancii sijadase «Čusovoi — Solikamsk»-jonol lidnan lodehes, kudes kilometras keskuzpalaspäi.

Tobmuz[vajehta | vajehtada tekst]

Baseg-raudtesara (Басег, 14 rist. vl 2010) i Zagotouk-žilo (посёлок Заготовка, 2 rist. vl 2010) mülüiba lidnankundha Gremäčinskan ližaks.

Lidnankundan Dum om likvidiruidud vn 2019 sulakus, likvidirui Valentin Hramov vn 2018 sügüz'kuspäi. Jäl'gmäine Duman ezimez' oli Mihail Šlik, radoi vn 2018 sügüz'kuhusai. Lidnankundan Administracii om tühjitadud vn 2020 redukus, likvidacižen laudkundan ohjandai oli Ilona Simukova vn 2019 vilukuspäi. Vladimir Hmelevskoi (sügüz'ku 2013 — kül'mku 2018) radoi lidnankundan i sen Administracijan jäl'gmäižen pämehen.

Lidnümbrikon tobmuden pämez' oli sen Administracijan pämez'. Gremäčinskan lidnümbrikon Administracii om likvidiruidud vn 2024 vilukule. Marija Jepihina radoi sen likvidatoran vn 2022 heinkuspäi. Aleksei Grebenščikov radoi Administracijan edeližen pämehen (kül'mku 2019 — heinku 2022). Lidnümbrikon Dum oli likvidiruidud vn 2023 kezakus, sen ezimehil radoiba: Mihail Šlik (kezaku 2021 — reduku 2022, sid' oli Duman likvidatoran), Jurii Mende (tal'vku 2019 — kezaku 2021).

Eläjad[vajehta | vajehtada tekst]

Vn 2010 Venäman rahvahanlugemižen mödhe lidnan eläjiden lugu oli 10 752 ristitud, lidnankundan — 10 768 ristitud. Vn 2021 rahvahanlugemižen mödhe Gremäčinskan ristitišt oli 8 360 eläjad, vn 2002 — 13 237 eläjad. Kaikiš suremb lidnan ristitišt oli 38 014 eläjad vl 1959. Vl 1989 kaik 20 977 ristitud elihe lidnas, vl 2017 — ühesa tuhad ristituid. Ristitišt poleni Kizelan kivihil'basseinan kaivuziden likvidacijan tagut.

Rahvahad (2002): venälaižed — 70 %, totarlaižed — 16 %, toižed rahvahad — 14 % (enamba ukrainalaižed, udmurtalaižed, saksalaižed).

Ortodoksižen hristanuskondan Jumalanmaman Kazanin jumalaižen jumalanpert'[1] om saudud lidnas vspäi 1992.

Lapsiden opendusen aluzkundad oma kaks' päivkodid, koume keskškolad (nomer 3, 11, 20), korrekcine škol-internat (nomer 8), lapsiden sädamižen pert', čomamahtoiden škol. Čusovoin industrialižen tehnikuman filial om lidnan professionaližen opendusen aluzkundaks.

Homaičendad[vajehta | vajehtada tekst]

  1. Gremäčinskan pühäpertid sobory.ru-saital. (ven.)

Irdkosketused[vajehta | vajehtada tekst]


Permin randan lidnad
Aleksandrovsk | Berezniki | Čaikovskii | Čerdin' | Černušk | Čormoz | Čusovoi | Dobränk | Gornozavodsk | Gremäčinsk | Gubah | Kizel | Krasnokamsk | Krasnovišersk | Kudimkar | Kungur | Lis'v | Nitv | Očor | Ohansk | Os | Perm' | Solikamsk | Usol'je | Vereščagino