Anusan rahvahaline rajon

Anusan rahvahaline rajon
Олонецкий национальный район (ven.)
Anuksen kanzalline piiri (livv.)
Aunuksen kansallinen piiri (suom.)

Znam	Flag
Valdkund	Venäma
Administrativine keskuz	Anus (lidn)
Eläjiden lugu (2023)	18,662 ristitud
Pind	3,988,36 km²

Anusan (Olonecan) rahvahaline rajon (ven.: Оло́нецкий национа́льный райо́н, livv.: Anuksen kanzalline piiri, suom.: Aunuksen kansallinen piiri) om Venälaižen Federacijan municipaline ühtnik Karjalan Tazovaldkundan suves.

Administrativine keskuz om Anus-lidn.

Istorii

Rajon om sätud vl 1927, elokun 29. päivän VCIK:an käskön mödhe. Vspäi 1930 enččen Vidlican rajonan territorii mülüb Olonecan rajonha.

Vozil 1941−1944 Suomenman sodaväged oliba rajonas.

Vspäi 2004 rajonan oficialine nimituz om «rahvahaline»-sananke.

Geografijan andmused

Olonecan rahvahaline rajon om Karjalan Tazovaldkundan suvine taho. Pind — 3 988 nellikkilometrad (nell'toštkümnenz' sija tazovaldkundas 18:späi). Mecad da sod ottas territorijan ühesad kümnendest. Kavag'mecad oma enambuses (78 %), sidä kesken pedajikod oma levitadud (53 %).

Om röunoid Venäman nellänke rajonanke:

• päivnouzmas Leningradan agjan Kos'kenaluižen rajonanke;
• suvipäivnouzmas Leningradan agjan Pöudon rajonanke.
• lodehes Karjalan Tazovaldkundan Pit'krandan rajonanke;
• pohjoižes da pohjoižpäivnouzmas Karjalan Tazovaldkundan Präžan rahvahaliženke rajonanke.

Ladog lainištab rajonan suvipäivlaskmaižid randoid läz 120 km pitte.

Reljef om tazo tobjimalaz, om ülüzid pohjoižes i päivnouzmas. Kaikiš korktemb čokkoim om Raudasine-mägi (ven.: Железная) 97 m kortte valdmeren pindan päl. Joged mülüdas Ladogan da Atlantižen valdmeren basseinha. Kaik om 11 joged i 49 järved rajonas.

Klimat om ven pehmed. Heinkun keskmäine lämuz om +16,5 C°, vilukun −9,9 C°. Paneb sadegid 584 mm vodes.

Londuseližed varad oma turbaz, sauvondmaterialad (saved, letked, gravii), mineraline muju (mars-umbr), mec, kala, reskvezi.

Vspäi 2005 rajonan territorii jagase kümneks municipaližeks ühtnikaks: üks' lidnankund da ühesa küläkundad.

Eläjad

Vn 2002 Venäman rahvahanlugemižen mödhe rajonan eläjiden lugu oli 27 034 ristitud, vn 2010 — 23 124 ristitud, vn 2021 — 19 011 ristitud.

Kaik 65 eländpunktad om rajonas (vl 2005), niiden kesken üks' lidn, kahesa külänvuittušt žilod da 56 küläd.

Toižed znamasižed eländpunktad oma Il'jinskii-žilo (2,8 tuh. rist. vl 2013), Vidlic-žilo (1,6 tuh. rist. vl 2013) da Tuks-külä (1,1 tuh. rist. vl 2015).

Irdkosketused

• Anusan rahvahaližen rajonan oficialine sait (olon-rayon.ru). (venäkelel)
• Anusan rahvahaline rajon Karjalan Tazovaldkundan oficialižel gov.karelia.ru-saital. (venäkelel)