Frolovo

Frolovo
Фролово
Lidnanznam;	Flag;
Valdkund	Venäma
Eläjiden lugu (2021)	35,661 ristitud
Pind	60 km²
Pämez'	Vasilii Dankov; (2008—)
Telefonkod	+7−84 465-xx-xxx
Avtokod	34, 134
Aigvö	UTC+3 (MSK+0)

Frolovo (ven.: Фро́лово) om Venäman lidn da lidnümbrik Volgogradan agjan keskuzpalas. Se om ümbärtud Frolovon rajonan territorijal, oli sen administrativižeks keskuseks vodhesai 2014.

Istorii

Eländpunkt mainitase ezmäižen kerdan Ližinskii-futoraks (ven.: Лыжинский, Ližin-kanzannimen mödhe) vl 1859, i Frolov-futoraks kahtes kilometras sišpäi. Vozil 1868−1871 saudihe raudted Caricinhasai läz nenid futorid, nimitihe stancijad jogen mödhe (Arčad, nüg. Arčed). Žilo stancijanno šingotaškanzihe, lähižiden futoriden elo mugažo, i niiden territorii ühtenzoitihe aigan mändes. Nimitaškanzihe Frolovo vai Frolovskii-futor 20. voz'sadaspäi. Vl 1936 futor sai lidnan statusad, vl 1976 kätihe sidä lidnaks agjan alištusenke.

Frolovon ižandusen päsarakod oma sömtegimišt, sauvond, raudteižandusen i gazanveimen kohenduz da holituz, sauvondmaterialiden pästand (lämuzizoläcii^[1] i metalližkonstrukcijad), kivivoin, londuseližen gazan i mouckiven samine, mugažo terasen valamižtegim radab. «Sebruz»-gazanveimen kompressorstancii om läz lidnad.

Geografijan andmused

Lidn sijadase Arčed-jogen randoil (ven.: Арчеда́ 162 km pitte, Medvedic-jogen hura ližajogi, Donan hurapol'ne bassein), 110 m korktusel valdmeren pindan päl.

Matkad Don-jogehesai om 30 km suvhe, Volgogradhasai — 145 km suvipäivnouzmha avtotedme. Lähembaine lidn om Mihailovk 50 km lodeheze.

Tobmuz

Frolovo om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez' vn 2019 kül'mkuspäi, ende oli Duman ezimez'. Vasilii Dankov radab Administracijan pämehen vn 2019 kül'mkuspäi. Edeline Administracijan pämez' om Igor' Lukjanskov, radoi vn 2019 kül'mkuhusai. Lidnümbrikon Duman ezimez' om Aleksandr Matuškin vn 2021 tal'vkuspäi. Edeližed Duman ezimehed oma Vasilii Melišnikov (kül'mku 2019 — tal'vku 2021), Vasilii Dankov (radoi vn 2019 kül'mkuhusai).

Eläjad

Vn 2010 Venäman rahvahanlugemižen mödhe lidnan eläjiden lugu oli 39 449 ristitud. Kaik 37 377 eläjad oli lidnas vl 2017. Kaikiš suremb ristitišt oli 43 400 eläjad vozil 1996−1998.

Rahvahad (enamba 0,4 % vl 2021): venälaižed — 95,9 %, čiganalaižed — 0,8 %, armenijalaižed — 0,7 %, toižed rahvahad — 1,9 %, rahvahuden ozutandata — 0,7 %.

Ortodoksižen hristanuskondan viž pühäpertid^[2] oma saudud lidnas vspäi 1982: Sündun Jumalannägundan päjumalanpert' (om letud vodele 2009), kaks' jumalanpertid i kaks' časounäd.

Frolovon biznesan kolledž^[3] om lidnan professionaližen opendusen aluzkundaks.

Transport

Avtobusad oma kundaližeks transportaks lidnas da sen ümbrištos.

Arčed-raudtestancii (ven.: Арчеда́) sijadase lidnan keskuzpalas. «Kaspii»-avtote (R-22 vai E119, Moskv — Astrahan') ümbärdab lidnad päivlaskmas.

Galerei

Villän varažomad vl 2013
Jumalanmaman Sündundan jumalanpert', vn 2006 fotokuva vai sen aigemba
Frolovon terasen valamižtegim vl 2021
Raudten poliklinik (2013)
Arčed-päraudtestancijan sauvuz da torg senno vl 2010

Homaičendad

Irdkosketused

Lidnümbrikon tobmuden sait (frolovoadmin.ru). (ven.)

Frolovo Vikiaitas

	Volgogradan agjan lidnad
	Dubovk \| Frolovo \| Kalač Donal \| Kamišin \| Kotel'nikovo \| Kotovo \| Krasnoslobodsk \| Leninsk \| Mihailovk \| Nikolajevsk \| Novoanninskii \| Pallasovk \| Petrov Val \| Serafimovič \| Surovikino \| Žirnovsk \| Urüpinsk \| Volgograd \| Volžskii

[1] Frolovon lämuzizoläcijan edheotandan sait (nivola-frolovo.ru). (ven.)

[2] Frolovon pühäpertid sobory.ru-saital. (ven.)

[3] Frolovon biznesan kolledžan sait (frolovo-kb.ru).

[1]

[2]

[3]