Gornozavodsk (Permin rand)
Lidnanznam,_Perm_Krai.gif)
| |
| Valdkund | Venäma |
| Eläjiden lugu (2023) | 10,890 ristitud |
| Pind | 17,09 km² |
| |
| Telefonkod | +7−34 269-xx-xxx |
| Avtokod | 59, 81, 159 |
| Aigvö | UTC+5 (MSK+2) |
Sil sanal voib olda toižid znamoičendoid; miše nähta niid, tulgat tänna.
Gornozavodsk (ven.: Горнозаво́дск, perm. komi: Вильпашия кар) om Venäman lidn Permin randan päivnouzmas. Se om Gornozavodskan lidnümbrikon (edel vn 2019 vilukud — rajonan) administrativine keskuz.
Istorii
[vajehta | vajehtada lähtetekst]Pašii-raudtestancii (ven.: Пашия) om eländpunktan aluseks vspäi 1876 «Perm' — Alatagil»-jonol. Sauvoškanzihe cementantegint sijaližen mouckiven löudmižsijanno da Uz' Pašii-žilod (ven.: Новая Пашия) vl 1947, tegim radab vspäi 1955. Vl 1950 kätihe žilod lidnanvuiččeks i nimitihe Novopašiiskii (ven. Новопашийский). Vn 1965 4. päiväl kül'mkud anttihe sile lidnan statusad, nimitihe nügüdläižikš i panihe uden rajonan administrativižeks keskuseks.
Gornozavodsk šingotase cementantegimel[1] läz kaht millionad tonnoid jogavoččen tehmižen mülünke, se pästtab mugažo gipsankivid, sidondsubstancijoid i seinmaterialid. Leibänkombinat radab.
Geografijan andmused
[vajehta | vajehtada lähtetekst]Lidn sijadase 280 m ü.m.t. keskmäižel korktusel, vides kilometras suvhe Vižai-jogespäi (ven.: Вижа́й 125 km pitte, Kaman hurapol'ne bassein).
Matkad Permihesai om 128 km päivlaskmha orhal vai 170 km avtotedme. Lähembaižed lidnad oma Čusovoi koumekümnes kilometras suvipäivlaskmha orhal vai 45 km avtotedme i Gremäčinsk 36 km lodeheze orhal vai 57 km avtol.
Tobmuz
[vajehta | vajehtada lähtetekst]Koiv- (ven.: Койва) i Vižai-žilod raudtestancijanno mülüihe lidnankundha Gornozavodskan ližaks edel 2019. vot. Lidnankundan pind oli 17,09 km².
Lidnan jäl'gmäine pämez' oli Galina Semenova vn 2017 keväz'kuspäi.
Eläjad
[vajehta | vajehtada lähtetekst]Vn 2010 Venäman rahvahanlugemižen mödhe lidnan eläjiden lugu oli 12 057 ristitud, lidnankundan — 12 566 ristitud, rajonan (nüg. lidnümbrik) pol', vn 2021 lidnan — 11 073 ristitud. Kaik 11 477 ristitud elihe lidnas i 11 909 ristitud kaikes lidnankundas vl 2017. Kaikiš suremb lidnan ristitišt oli 15 800 eläjad vl 1996.
Rahvahad (2010): venälaižed — 84,0 %, totarlaižed — 5,6 %, toižed rahvahad — 5,2 %, rahvahuden ozutandata — 5,2 %.
Ortodoksižen hristanuskondan kaks' jumalanpertid[2] oma saudud i avaitud lidnas: Jumalanmaman Počajevon jumalaižen (letihe vodele 2019) i Pühän Jumalanmaman Sündundpäivän (1993).
Lapsiden opendusen aluzkundad oma severz'-se päivkodid, kaks' keskškolad, lapsiden sädamižen pert', čomamahtoiden škol, olimpižen varan sportškol. Gornozavodskan politehnine tehnikum[3] om lidnan professionaližen opendusen aluzkundaks.
Galerei
[vajehta | vajehtada lähtetekst]-
Gornozavodskan lidnankundan administracijan sauvuz vl 2012 -
Pühän Jumalanmaman Sündundpäivän jumalanpert', vn 2007 nägu -
Mouckiven kar'jer lidnas vl 2020 -
Kul'turkeskuz L.I. Beran nimed (2007) -
Pionerskai-ird vl 2020
Homaičendad
[vajehta | vajehtada lähtetekst]- ↑ Gornozavodskan cementantegim akkermann.ru-saital. (ven.) (angl.)
- ↑ Gornozavodskan pühäpertid sobory.ru-saital. (ven.)
- ↑ Gornozavodskan politehnižen tehnikuman sait (gpt-gorn.ru). (ven.)
Irdkosketused
[vajehta | vajehtada lähtetekst] |
Gornozavodsk (Permin rand) Vikiaitas |
| Permin randan lidnad | ||
| Aleksandrovsk | Berezniki | Čaikovskii | Čerdin' | Černušk | Čormoz | Čusovoi | Dobränk | Gornozavodsk | Gremäčinsk | Gubah | Kizel | Krasnokamsk | Krasnovišersk | Kudimkar | Kungur | Lis'v | Nitv | Očor | Ohansk | Os | Perm' | Solikamsk | Usol'je | Vereščagino | ||