Pallasovk

Pallasovk
Палласовка

Lidnanznam	Flag
Valdkund	Venäma
Eläjiden lugu (2021)	14,966 ristitud
Pind	35,19 km²
Pämez'	Vladimir Gronin (kül'mku 2019—)
Telefonkod	+7−84 492-xx-xxx
Avtokod	34, 134
Aigvö	UTC+3 (MSK+0)

Pallasovk (ven.: Палла́совка) om Venäman lidn da lidnankund Volgogradan agjan pohjoižpäivnouzmas. Se om Pallasovkan rajonan administrativine keskuz.

Etimologii

Pallasovk-raudtestancii sai nimitust saksalaižen Peter Simon Pallas-matkadajan (Peter Simon Pállas, 1741−1811) kanzannimen mödhe. Mez' om biogeografijan alusenpanijoišpäi. Hän oli Venäman valdkundaližen radnikoičijan vll 1767−1810, sai tetabut tedoekspedicijoil Sibiridme i Venäman suvedme.

Istorii

Eländpunktan aluz om pandud vozil 1903−1907 kuti žilo Pallasovk-raudtestancijanno sauvomha da holitamha «Saratov — Astrahan'»-jonod. Kätihe radnikžiloks sömtegimišton edheotandoiden sauvondan jäl'ghe, ratas sijaližel torhudel. Vl 1860 Volgaveren saksalaižiden Nei-Galk-žilo (ven.: село Ней-Галка) oli pandud, se oli kahtes kilometras stancijaspäi, möhemba udesnimitihe Pallasovk-žiloks. Ühtištadihe žiloid Suren sodan jäl'ghe. Anttihe lidnan statusad vn 1967 30. päiväl kezakus.

Pallasovk šingotase sömtegimištol (lihanümbriradai kombinat, leibän edheotand).

Geografijan andmused

Lidn sijadase rajonan pohjoižes, tazangištol, Kaspijanveren alangišton stepiš, Volgan huran Torgun-ližajogen oiktal randal (ven.: Торгу́н 145 km pitte), 33 m ü.m.t. keskmäižel korktusel. Bul'bin-jogi (Бульбин 11 km pitte) lankteb Torgunha oiktalpäi lidnan röunoiš. Van ristikoičeb lidnad.

Matkad Kazahstanan röunhasai om 25 km suvipäivnouzmha orhal, Volgogradhasai om 230 km suvipäivlaskmha orhal vai 285 km avtotedme. Lähembaižed lidnad oma Nikolajevsk i Kamišin 115 km päivlaskmha avtotedme, Krasnii Kut (Saratovan agj) sadas kilometras pohjoižhe raudtel i Novouzensk (Saratovan agj) 100 km pohjoižpäivnouzmha orhal vai 318 km avtol. Raudtestancii om saudud lidnan päivlaskmas, avtote ümbärdab lidnad.

Tobmuz

Pallasovk om lidnankundan üks'jäižeks eländpunktaks.

Lidnan tobmuden pämez' om sen Administracijan pämez'. Edeline lidnan pämez' om Valerii Smirnov (reduku 2009 — reduku 2019). Lidnan Duman ezimez' om Valerii Smirnov vn 2019 sügüz'kuspäi. Edeline Duman ezimez' om Nikolai Borodajev, radoi vn 2019 sügüz'kuhusai.

Eläjad

Vn 2010 Venäman rahvahanlugemižen mödhe lidnan eläjiden lugu oli 16 081 ristitud, rajonan koumandez, vn 2021 — 14 966 ristitud. Vl 2017 kaik 14 940 ristitud elihe lidnas. Kaikiš suremb lidnan ristitišt oli 17..18 tuhad vozil 1989−2002 (18 000 eläjid vll 1996−1998).

Ortodoksižen hristanuskondan kaks' pühäpertid oma avaitud lidnas: ph. Ksenija Piterilaižen jumalanpert' i Venäman Uziden moknikoiden časoun'. Baptizman jumalanpert' om avaitud.

Lapsiden opendusen aluzkundad oma seičeme päivkodid, viž keskškolad (nomer 2, 11, 12, 14, 17), čomamahtoiden škol, lapsiden da norišton sportškol. Pallasovkan maižanduztehnikum om lidnan professionaližen opendusen aluzkundaks.

Irdkosketused

• Lidnan tobmuden sait (paladmin.ru). (ven.)
• Pallasovskan rajonan istoriž-čomamahtoine muzei (pallasovskij.vgr.muzkult.ru). (ven.)