Pokrov (lidn, Venäma)

Pokrov
Покров
	Lidnanznam;
Valdkund	Venäma
Eläjiden lugu (2021)	17,747 ristitud
Pind	19 km²
Pämez'	Oleg Kisläkov; (reduku 2015—)
Telefonkod	+7−49 243-xx-xxx
Avtokod	33
Aigvö	UTC+3 (MSK+0)

Pokrov (ven.: Покро́в «kate» vai «kaičend») om Venäman lidn Vladimiran agjan päivlaskmas. Mülüb Petuškan rajonha lidnankundaks, sen kaikiš suremb lidn.

Istorii

Eländpunkt mainitase ezmäižen kerdan vl 1506 kuti külä läz Antonii Pokrovskijan jumalankodid. Vozil 1678−79 se sai partiarhan Pokrovskoje-žilo-nimed. Pokrovskijan jumalankodi oli olmas vhesai 1711, tühjitadud. Vspäi 1778 kätihe žilod lidnaks nügüdläiženke nimenke i vahvištihe ezmäšt pertišton šingotesen planad.

Pokrovan ižandusen päsarakod oma sömtegimišt (järed šokoladfabrik i pränikoiden tehmine), biopreparatoiden i raudbetontegesiden pästand, mugažo juvelirine^[1] i elektromehanine tegimed ratas, omblendfabrik om saudud.

Geografijan andmused

Lidn sijadase penen Ščitkanjogen randal (ven.: Щитка kahesa kilometrad pitte, lankteb Vol'ganjogehe) vides kilometras Kläz'man randaspäi, sen hural randpolel, 125 m ü.m.t. keskmäižel korktusel. Pokrov om ümbärtud penil järvil da pedaimecoil.

Matkad Petuškad-lidnhasai om 18 km päivnouzmha, Vladimirhasai — 81 km päivnouzmha. Lähembaižed järedad lidnad sijadasoiš Moskvan agjas: Jegor'jevsk 60 km suvhe orhal, Orehovo-Zujevo 20 km suvipäivlaskmha i Noginsk 45 km päivlaskmha orhal.

Tobmuz

Pokrov om lidnankundan üks'jäižeks eländpunktaks.

Lidnankundan pämez' om sen Deputatoiden nevondkundan ezimez'. Edeline lidnan pämez' om Andrei Mägkov, radoi edel vn 2015 redukud. Lidnan Administracijan pämez' om Denis Rogov vn 2022 tal'vkuspäi, tegi sen pämehen velgusidme mugažo vn 2018 elokus-tal'vkus. Edeline lidnan Administracijan pämez' om Oleg Kotrov (tal'vku 2018 — kül'mku 2022).

Eläjad

Vn 2010 Venäman rahvahanlugemižen mödhe lidnan eläjiden lugu oli 17 756 ristitud. Kaik 17 308 eläjad oli lidnas vl 2017. Kaikiš suremb lidnan ristitišt oli 17..18 tuhad eläjid vozil 2010−2017 i 2021.

Ortodoksižen hristanuskondan Jumalanmaman Katken jumalanpert' om saudud lidnas 16. voz'sadaspäi (kivine vspäi 1672), sen ližaks om koume tošt jumalanpertid i časoun'^[2]. Eläban Eziauguižen Stroican päjumalanpert' om kaičenus vaiše paloin. Jumalanmaman Tulendan Pühäpertihe sar'hine naižjumalankodi om väges vspäi 1991 (mez'jumalankodi vll 1708−1919), sijadase lidnan lodehližel röunal.

Socialiž-gumanitarine kolledž^[3] (Pokrov) om lidnan professionaližen opendusen aluzkundaks.

Transport

Federaline «Volg»-avtote (M7) läbitab lidnad. Avtobusstancii radab trassan teverel.

Pokrov-raudtestancii sijadase nelläs kilometras suvipäivnouzmha lidnan keskusespäi «Moskv — Vladimir»-raudtekeskustal.

Galerei

Pokrovan kodirandantedištandmuzei (2013)
Jumalanmaman Katken jumalanpert', vn 2009 nägu
Šokoladfejan muštpacaz vl 2011
Jumalanmaman Tulendan Pühäpertihe sar'hine naižjumalankodi, vn 2011 nägu
Pokrov-päraudtestancijan sauvuz vl 2010

Homaičendad

↑ Pokrovan juvelirtegimen sait (pokrovgold.ru). (ven.) (+äikel'ne avtomatine känduz)
↑ Pokrovan pühäpertid sobory.ru-saital. (ven.)
↑ Pokrov-lidnan Socialiž-gumanitarižen kolledžan sait (college-pokrov.ru). (ven.)

Irdkosketused

Municipaližen «Pokrov-lidn»-ühtnikan tobmuden aluzkundoiden oficialine sait (pokrovcity.ru). (ven.)

Pokrov (lidn, Venäma) Vikiaitas

	Vladimiran agjan lidnad
	Aleksandrov \| Gorohovec \| Gus' Hrustal'nii \| Jur'jev Pol'skii \| Kameškovo \| Karabanovo \| Kiržač \| Kol'čugino \| Kosterövo \| Kovrov \| Kurlovo \| Lakinsk \| Melenkad \| Murom \| Petuškad \| Pokrov \| Radužnii \| Sobink \| Strunino \| Sudogd \| Suzdal' \| Vladimir \| Väznikad

[1] Pokrovan juvelirtegimen sait (pokrovgold.ru). (ven.) (+äikel'ne avtomatine känduz)

[2] Pokrovan pühäpertid sobory.ru-saital. (ven.)

[3] Pokrov-lidnan Socialiž-gumanitarižen kolledžan sait (college-pokrov.ru). (ven.)

[1]

[2]

[3]