Soči

Soči
Сочи

Lidnanznam	Flag
Valdkund	Venäma
Eläjiden lugu (2023)	446,599 ristitud
Pind	176,77 km²
Pämez'	Aleksei Kopaigorodskii (sügüz'ku 2019—)
Telefonkod	+7−862-xxx-xxxx
Avtokod	23, 93, 123
Aigvö	UTC+3 (MSK+0)

Lidnümbrikon administrativižed rajonad:
1. Keskuzrajon (alajagase 12 lidnanlaptaks)
2. Hostan rajon
3. Lazarevskojen rajon
4. Adleran rajon

.

Soči (ven.: Сочи [ˈsotɕɪ], armen.: Սոչի Soči, abh.: Шәача) om Venälaižen Federacijan kaikiš järedamb kurortlidn. Se om Krasnodaran randan kahtenz' lidn eläjiden lugun mödhe. Sijadase Päivlaskmaižen Kavkazan Mustanmeren randištol. Om kaks' meriportad.

Vl 2014 Soči vastsi Tal'veližid Olimpižid vändoid.

Istorii

Eländpunktan aluz om pandud vl 1838. Se sai lidnan statusad vl 1917.

Soči šingotase lebuturizmal i kahtel meriportal.

Geografijan andmused

Lidn om pit'k da kaid formal, vedase pidust' randištod tobjimalaz, 0..1800 m korktusil, 65 m ü.m.t. keskmäižel korktusel. Om kahtendeks pitte lidnaks mail'mas Mehikon jäl'ghe, piduz — 105 km orhal vai 140 km avtotedme.

Klimat om subtropine neps, Kavkazan mäged kaitas mererandad pohjoižiš viluiš tulleišpäi. Voden keskmäine lämuz +14,6 C°, heinkun-elokun +23,7..+24,3 C°, vilukun-uhokun +6,3..+6,5 C°. Ekstremumad oma −13,4 C° (viluku) i +39,4 C° (heinku). Ei voi panda halad semendkus-sügüz'kus. Paneb sadegid 1651 mm vodes, läz tazomäras kuidme, enamba redukus-vilukus (175..178 mm kus), vähemba sulakus-kezakus (95..109 mm kus) i elokus (106 mm).

Tobmuz

Sočin lidnümbrik jagase nelläks administrativižeks rajonaks. Kaik 80 eländpunktad mülüdas lidnümbrikho Sočin ližaks: lidnanvuitte Rusked Pallišt-žilo, 71 küläd, üks' žilo i seičeme aulad. Lidnümbrikon pind — 3502 km².

Edeline lidnan pämez' (mer) om Anatolii Pahomov (viluku 2009 — sügüz'ku 2019).

Eläjad

Vn 2010 Venäman rahvahanlugemižen mödhe lidnan eläjiden lugu oli 343 334 ristitud, lidnümbrikon — 420 589 ristitud. Vl 2017 lidnan eläjiden lugu oli 411 524 ristitud, lidnümbrikon (Sur' Soči) — 492 601 ristitud. Kaik 561 793 eläjad oli lidnümbrikos vl 2023. Kaikiš suremb lidnan i lidnümbrikon ristitišt om nügüd'.

Rahvahad (enamba 0,4 %, lidnümbrik vl 2010): venälaižed — 67,1 %, armenijalaižed — 19,3 %, ukrainalaižed — 2,2 %, gruzijalaižed — 1,9 %, adiglaižed — 1,1 %, grekalaižed — 0,8 %, totarlaižed — 0,5 %, vaugedvenälaižed — 0,4 %, toižed rahvahad — 2,6 %, rahvahuden ozutandata — 4,1 %.

Transport

Avtobusad, maršruttaksid, ezilidnelektrojonused, avtoiden kortom, taksid i koume kervačted oma kundaližeks transportaks lidnas. Kaks' funikulörad oma sanatorijoiden sauptud territorijal. Avtoümbärte 18 km pitte om saudud vspäi 1988. Kaik kuz' päraudtestancijad ratas (Soči, Adler, Lazarevskai, Host, Rusked Pallišt, Loo) i äi raudteplatformid. Nevondkundaližen aigan punolendimiden jonod ühtenzoitiba Sočin lendimportad Sočin keskuzpalanke (maploduiden möndan tukuil torgusen tarh), Rusttanke Pallištonke i Aibg-žilonke. Soči varatoitase londuseližel gazal veimedme Džubgaspäi 172 km pitte, sen tobj pala venub Mustmeren pohjal pidust' randad.

Rahvahidenkeskeine soda- da civiline Soči-lendimport Vitalii Sevastjanov-kosmonavtan nimed (AER / АДЛ / URSS, 12,9 mln passažiroid vl 2022) sijadase läz Soči-päraudtestancijad. Tehtas reisid Venäman äjihe surihe lidnoihe, Kavkazan pälidnoihe (enamba Jerevanha), Keskuzazijan surihe lidnoihe, Päivlaskmaižen Azijan erasihe-se lidnoihe (Dubai, Stambul, Tel' Aviv), Belgradha, Tailandan i Egiptan lebutahoiže.

Galerei

• 
  Lidnan-kurortan Administracijan sauvuz (2014)
• 
  Ph. Vladimiran kafedraline päjumalanpert' Vinmarjanmägel, vn 2011 nägu
• 
  Radisson Park Hotel Sochi-adivpert' vl 2008
• 
  Venäman rahvahidenkeskeine olimpine universitet (2013)
• 
  Soči-Passažirskii-päraudtestancijan sauvuz vl 2006

Tetabad sündnuded

• Mihail Galustän (sünd. 1979) — armenine mez', Venäman jumorist, akt'or i prodüser.
• Ararat Keščän (sünd. 1978) — armenijalaine, Venäman komedijan akt'or da TV-vedai.
• Ašot Keščän (sünd. 1977) — armenijalaine, Venäman režissör da akt'or.
• Grigorii Leps (sünd. 1962) — gruzijalaine, Venäman muzikprodüser, muzikankirjutai da pajatai.

Sebruzlidnad

• Suomenma Espoo, Suomenma (vspäi 1989)
• Estinma Pärnu, Estinma (1994)
• Turkanma Trabzon, Turkanma (1991)
• Kanad Vankuver, Britanine Kolumbii, Kanad (2010)
• Kitai Veihai, Kitai (1996)

Irdkosketused

• Lidnan-kurortan tobmuden portal (sochi.ru). (ven.)
• Lidnan Nevondkundan oficialine sait (gs-sochi.ru). (ven.)