Trinidad da Tobago

Vikipedii-späi
Trinidadan da Tobagon Tazovaldkund
Republic of Trinidad and Tobago
 Flag
 Valdkundznam
Pälidn Port of Spein
Eläjiden lugu (2018) 1,215,527[1] ristitud
Pind 5,131 km²
Trinidadan da Tobagon Tazovaldkund Republic of Trinidad and Tobago
Kel' anglijan
Valdkundan pämez' Pola-Mei Ujiks
Päministr Kit Rouli
Religii hristanuskond, induizm
Valüt Trinidadan da Tobagon dollar (TTD)
Internet-domen .tt
Telefonkod +1−868
Aigvö UTC−4

Trinidad da Tobago (angl.: Trinidad and Tobago [ˈtrɪnɪdæd ... təˈbeɪɡoʊ]), täuz' oficialine nimituz — Trinidadan da Tobagon Tazovaldkund (angl.: Republic of Trinidad and Tobago), om sar'hine valdkund Keskuzamerikas, Kariban meren suves, läz Venesuelan mererandištod. Pälidn om Port of Spein.

Istorii[vajehta | vajehtada tekst]

Vn 1962 elokun 31. päiväl Trinidad da Tobago tedištoiti ripmatomudes Sures Britanijaspäi.

Valdkundan ezmäine Konstitucii oli väges vspäi 1962. Nügüdläine kahtenz' lugul Konstitucii[2] om vahvištadud vl 1976, se om olmas äiluguižidenke vajehtusidenke, vn 2007 versii om väges.

Geografijan andmused[vajehta | vajehtada tekst]

Trinidadan da Tobagon topografine kart.

Trinidad da Tobago sijadase 11 km pohjoižhe Venesuelan randaspäi da 130 km suvhe Grenadinoišpäi. Kaks' merisal'med om Trinidad-saren da Venesuelan keskes: Boka del' Serpiente da Boka del' Dragon. Trinidad- i Tobago-sariden keskes om 30 km.

Valdkundan randad lainištab Atlantižen valdmeren Kariban meri. Randanpird om 362 km.

Trinidad-sar' otab valdkundan territorijan 93%. Molembiden järedoiden sariden mägisel'gad jätkatas Venesuelan mägisel'gid. Valdkundan kaikiš korktemb čokkoim om Aripo-mägi, 940 m kortte valdmeren pindan päl. Sarel jokstas äi ojid da penid jogid.

Londuseližed pävarad oma londuseline gaz, kivivoi da asfal't.

Politine sistem[vajehta | vajehtada tekst]

Trinidadan da Tobagon parlamentan sauvused (Rusked pert', 2008) Port of Speinas.

Ohjandusen form om unitarine konstitucine parlamentine tazovaldkund. Valdkundan pämez' om prezident (angl.: President of the Republic of Trinidad and Tobago). Valičijoiden Kollegii parlamentan Kodiden kaikiš ühtnijoišpäi valičeb händast kerdan vides vodes. Ei sa olda prezidentaks enamba kaht strokud jäl'geten. Päministr (angl. Prime Minister) om valdkundan pämez' faktižešti, hän om vägestunuden partijan lider valičendoiden satusiden mödhe, ned oleskeldas kerdan vides vodes.

Trinidadan da Tobagon parlament om kaks'kodine. Üläkodi om Senat (angl.: Senate), se mülütab 31 ühtnijad (päministran nevondan mödhe — 16 kandidatad, oppozicijaspäi — 6, da ripmatomad kundusen sarakoišpäi — 9), pandas radnikusele prezidentan käsköl. Alakodi om Ezitajiden Kodi (angl. House of Representatives), heid om 41 ristitud, kaik rahvaz valičeb heid videks vodeks. Kaik 15 deputatad ratas Tobagon Suimas.

Käskuzkundaližen tobmuden pä om Arbitražkäskuzkund. Prezident paneb sen päsudijad radsijha.

Parlamentan alakodin ühtnijoiden järgenduseližed valičendad oliba vn 2015 7. päiväl sügüz'kud. Pola-Mei Ujiks radab prezidentan vs 2018 keväz'kun 19. päiväspäi. Kit Rouli om päimistr vs 2015 sügüz'kun 9. päiväspäi.

Administrativiž-territorialine jagand[vajehta | vajehtada tekst]

   Kacu kirjutuz: Trinidadan da Tobagon administrativiž-territorialine jagand.

Trinidad da Tobago jagase Trinidad-saren 14 municipalitetaks (angl. corporation), sidä kesken 5 lidn- da 9 agjmunicipalitetad, i Tobago-sar' ičeohjandusenke.

Eläjad[vajehta | vajehtada tekst]

Trinidadas da Tobagos elädas tribagolaižed. Vn 2014 heinkus valdkundan ristitišt oli 1 223 916 eläjad, se oli kaikiš suremb. Ristitišt poleneb emigracijan tagut.

Augotižlibundan mödhe (2011): indijalaižed — 35,4%, afrikalaižed — 34,2%, toižed segoitadud augotižlibundanke — 15,3%, segoitadud afrikalaižed indijalaižidenke — 7,7%, toiženke augotižlibundanke — 1,2%, märhapanendata — 6,2%.

Uskondan mödhe (2011): protestantad — 32,1%, riman katolikad — 21,6%, induistad — 18,2%, islamanuskojad — 5,0%, Jehovan tundištajad — 1,5%, toižed uskojad — 8,4%, religijatomad — 2,2%, märhapanendata — 11,0%.

Trinidadan da Tobagon kaikiš surembad lidnad (enamba 30 tuh. ristituid vn 2000 rahvahanlugemižen mödhe[3], surembaspäi penembha): Čaguanas, San Fernando, Port of Spein (pälidn), Arim. Lidnalaižiden pala om 53,2% (2020).

Ižanduz[vajehta | vajehtada tekst]

Trinidadan da Tobagon päeksport om nozoltadud londuseline gaz (6nz' sija mail'mas), kivivoi, londuseline asfal't; toine eksport om raud, sahar, kokosad.

Homaičendad[vajehta | vajehtada tekst]

  1. Trinidadan da Tobagon ristitišton endustuz vn 2018 heinkus // Mail'man faktoiden kirj. — Cia.gov. (angl.)
  2. Trinidadan da Tobagon Konstitucijan tekst constituteproject.org-saital. (angl.)
  3. 2000 Census: Total Population by Sex, Sex Ratio and Area. — Cso.gov.tt. (angl.)

Irdkosketused[vajehta | vajehtada tekst]



Pohjoižamerikan valdkundad
Pohjoižamerikan valdkundad
Pohjoižamerikan valdkundad
Amerikan Ühtenzoittud Valdkundad (AÜV) | Antigua da Barbud | Bagaman Sared | Barbados | Beliz | Dominik | Dominikanine Tazovaldkund | Gonduras | Grenad | Gvatemal | Haiti | Jamaik | Kanad | Kostarik | Kuba | Meksik | Nikaragua | Panam | Sal'vador | Sent Kits da Nevis | Sent Lüsii | Sent Vinsent da Grenadinad | Trinidad da Tobago