Fresno

Fresno

Lidnanznam	Flag
Valdkund	Amerikan Ühtenzoittud Valdkundad
Eläjiden lugu (2019)	531,576 ristitud
Pind	297,07 km²
Pämez'	Li Brand (viluku 2017—. Lee Brand)
Telefonkod	+1-559
Aigvö	tal'vel UTC−8, kezal UTC−7

Fresnon transportine kart (2010)

Fresno (mugažo anglijan kelel, virktas [ˈfrɛznoʊ], «sarnipu» ispanijaks) om AÜV:oiden lidn Kalifornii-štatan keskuzpalas. Se om AÜV:oiden 34nz' i štatan videnz' lidn eläjiden lugun mödhe.

Istorii

Ende jokuts- i mivok-indejalaižed oliba enambuses lidnan tahondas. Fresnon ümbrik om sätud vl 1856 Kalifornijan kuldsäruläžundan aigan. Eländpunktan aluz om pandud vl 1872 kuti žilo udenno Fresno-stancijanno Suvitün'valdmerižel raudtel. Sai lidnan oiktusid vl 1885.

Fresno šingotase tervhudenkaičendan i opendusen aluzkundoil, sömtegimištol (sidä kesken lihan ümbriradmine), varjoičendsistemiden «Pelco»-kompanijal, turizmal (läz 20 aigtegod vodes, 20 muzejad i kul'turan aluzkundad, rahvahaližed puištod järvidenke ümbrištos). Lidnan territorii om ümbärtud maižanduzrajonal. Valdkundan sodavägiden äiluguižed palakundad baziruišoiš lidnanno.

Geografijan andmused

Lidn sijadase San-Hoakin-jogen alangištos (angl.: San Joaquin Valley), 94 m ü.m.t. keskmäižel korktusel. San-Hoakin-jogi om lidnan pohjoižröunaks. Ühthine pind om 297,07 km², sidä kesken kuivma 296,34 km², vezi 0,73 km².

Klimat om päipaštokaz kuiv. Voden keskmäine lämuz om +17,9 C°, minimaline lämuz oleli −8 C°. Paneb sadegid 292 mm vodes, enamba tal'vkus-keväz'kus (45..56 mm kus).

Eläjad

Vodel 2010 eläjiden lugu oli 494 665 ristitud, ezilidnoidenke — läz 1 mln ristituid. Kaikiš suremb lidnan ristitišt om nügüd'.

Rahvahad augotižlibundan mödhe (2010): evropalaižed — 50,6% (ispanijalaižita 30,0%), ispanijalaižed i latinamerikalaižed — 46,9%, azijalaižed — 12,6%, afroamerikalaižed — 8,3%, indejalaižed — 1,7%, valdmerimalaižed — 0,2%; sidä kesken segoitadud augotižlibundanke — 5%.

Transport

Avtobusad i kiruhavtobusad oma kundaližeks transportaks lidnas da sen ümbrištos. Fresno Area Express-organizacii (FAX) ohjastab kundališt transportad. Raudtestancii radab lidnan keskuses, Fresno-stancii kirhuližel «San Francisko — Los Andželes»-raudtel om sauvomas.

Koume lendimportad oma olmas lidnas: rahvahidenkeskeine soda- da civiline Fresno Josemit-lendimport (FAT, 2 mln passažiroid vl 2019) lidnan päivnouzmaižel röunal, civiline Fresno Čandler-ližalendimport (FCH, penen aviacijan täht tobjimalaz) 2 km suvipäivlaskmha azjaližes keskusespäi, privatine Sjerra Skai Park-lendimport lidnan lodehes.

Irdkosketused

• Lidnan tobmuden oficialine sait (fresno.gov). (angl.)