Našvill

Našvill
Nashville

Lidnanznam	Flag
Valdkund	Amerikan Ühtenzoittud Valdkundad
Eläjiden lugu (2023)	687,788 ristitud
Pind	1,362,2 km²
Pämez'	Freddi O'Konnell (sügüz'ku 2023—, Freddie O'Connell)
Telefonkod	+1−615, 629
Aigvö	tal'vel UTC−6, kezal UTC−5

Lidnan transportine kart (2014)

Našvill (angl.: Nashville [ˈnæʃvɪl]), vai Nešvill, om AÜV:oiden lidn Tennessi-štatan keskuzpalan pohjoižes. Se om Tennessin administrativine keskuz da kaikiš suremb lidn eläjiden lugun mödhe, AÜV:oiden 21-nz' lidn eläjiden lugun mödhe. Ristitišt i pind oma ozutadud Deividson-ümbrikon röunoiš, ümbrikon i lidnan ohjastuz om ühthine vspäi 1963.

Istorii

Ende indejalaižiden mectujad čeroki-, čikaso- i šauni-rahvahad eliba Našvillan tahondas. Pit'kan aigan ei olend evropalaižiden žiloid lidnan tahondas, sijaližed indejalaižed pidiba tulijoid agressivižikš. Nügüdläižen eländpunktan aluz om pandud sirdnikoil Virginii-štataspäi vl 1779, nimitihe sodan ripmatomudes Frensis Neš-jenaralan (angl.: Francis Nash) kanzannimen mödhe. Lidnan päkäskuz om vahvištadud vl 1806. Štatan kaikenaigaine administrativine keskuz vspäi 1843.

Našvill šingotase sömtegimištol (konditerižed tegesed), sauvondmaterialiden pästandal, avtosauvomižen tegimil (Nissan, Bridgestone), protestantizman jumalankodikundoiden keskuseks. Muzikaližen «kantri»-stilin pälidn, läz 20 tuhad radnikoid muziksarakos. Tervhudenkaičendan i opendusen aluzkundad (Vanderbil'tan universitet, Tennessi-štatan universitet) oma keskitadud lidnas. Enamba kaiked radnikoid om ottud tervhudenkaičendan sarakho i valdkundaližihe aluzkundoihe. Järedoiden kompanijoiden päfaterad oma lidnan aglomeracijas: Community Health Systems i Dollar General (laukad fiksiruidud arvonke), mugažo neniden mail'man kompanijoiden ofisad: Amazon, Dell, Deloitte, Ernst & Young i Philips.

Geografijan andmused

Lidnan sijaduz valdkundas vn 2008 kartal

Puištod ümbrikon röunoiš (2025)

Lidn sijadase Kamberlend-laivjogen molembil randoil (Ogajon hura ližajogi 1106 km pitte), 117..354 m korktusil, 182 m ü.m.t. keskmäižel korktusel. Ühthine pind om 1362,2 km², sidä kesken kuivma 1305,4 km², vezi otab 56,8 nellikkilometrad.

Klimat om subtropine neps. Keza om päivoikaz, ul'traruskedsinine sädegoičend sase 9..10 semendkus-elokus. Kül'mku-keväz'ku oma pil'vekahad. Voden keskmäine lämuz om +16,0 C°, kezakun-elokun +25,1..+27,1 C°, tal'vkun-uhokun +4,2..+6,3 C°. Absolütine minimum oleskeli −27 C° (viluku), maksimum +43 C° (kezaku). Kezaaigan minimum om +6 C° (kezaku), tal'vaigan maksimum om +29 C° (uhoku). Ei voi panda halad semendkus-sügüz'kus (semendkun minimum om +1 C°). Il'man lämuz voib ületada +30 C° keväz'kus-kül'mkus. Paneb sadegid 1283 mm vodes, läz tazomäras kuidme, enamba sulakus-semendkus (120..128 mm kus), vähemba redukus (85 mm). Paneb 12 sm lunt tal'ven vides päiväs. Kun keskmäine relätivine nepsuz vajehtase 63..74 % röunoiš voden aigan. Tornadod oma paksud kezaaigan, no ned todas lidnale surid murendusid harvoin lujas.

Tobmuz

Lidnan sijaduz Deividson-ümbrikos i Tennessi-štatas vn 2014 kartal

Našvill jagase läz kaks'kümneks susedkundaks (angl.: neighborhood).

Lidnan tobmuden pämez' om mer (angl.: mayor of Metropolitan Nashville). Edeližed merad oma Džon Kuper (John Cooper, sügüz'ku 2019 — sügüz'ku 2023), Devid Braili (David Briley, keväz'ku 2018 — sügüz'ku 2019), Megan Barri (Megan Barry, sügüz'ku 2015 — keväz'ku 2018).

Eläjad

Vn 2010 AÜV:oiden rahvahanlugemižen mödhe lidnan eläjiden lugu oli 601 222 ristitud, vn 2020 — 689 447 ristitud (kaikiš suremb ristitišt). Läz 2,1 mln eläjid om ezilidnoidenke (2020, štatan ühtenz' i 35. sija valdkundas). Edel vn 2017 semendkud štatan kaikiš enamba elänzoittud lidn oli Memfis.

Augotižlibundan mödhe (lidnan eläjad vl 2020): evropalaižed — 53,3 % (ispanijalaižita), afroamerikalaižed — 24,3 %, latinamerikalaižed i ispanijalaižed — 14,0 %, azijalaižed — 3,9 %, indejalaižed — 0,2 %, valdmerimalaižed — 0,1 %, segoitadud augotižlibundanke — 3,8 %, toiženke augotižlibundanke — 0,5 %.

Läz 700 pühäpertid om saudud Našvillas.

Transport

Avtobusad da ezilidnelektrojonused oma kundaližeks transportaks lidnas sen ezilidnoidenke. Jüguzjogiport radab Kamberlendan randal. Raudte radab vaiše jüguiden täht, passažirühtenzoituz tuli lophu vl 1974. Avtorengaz om saudud lidnan keskuzrajoniš ümbri.

Rahvahidenkeskeine civiline Našvill-lendimport (BNA / KBNA, 24,5 mln passažiroid vl 2024) sijadase kaks'toštkümnes kilometras suvipäivnouzmha lidnan keskuzpalaspäi. Tehtas passažirreisid AÜV:oiden äjihe järedoihe lidnoihe, mugažo Londonha, Torontoho i Kankun-kurorthasai (Meksik).

Galerei

• 
  Deividson-ümbrikon Käskuzkund (2015)
• 
  Ouenan menedžmentan škol, privatine Vanderbil'tan universitet (2022)
• 
  Rahvahidenkeskeižen Našvill-lendimportan terminal (Concourse A) vl 2017

Irdkosketused

• Lidnan oficialine sait (nashville.gov). (angl.)