Las Vegas

**Las Vegas**
Lidnanznam;	Flag;
Valdkund	Amerikan Ühtenzoittud Valdkundad
Eläjiden lugu (2022)	656,274 ristitud
Pind	367,53 km²
Pämez'	Šelli Berkli; (tal'vku 2024—,; Shelley Berkley)
Telefonkod	+1−702, +1−725
Aigvö	tal'vel UTC−8,; kezal UTC−7

Las Vegas (mugažo anglijan i ispanijan kelil, virkmine: angl. [lɑːs ˈveɪɡəs], isp. [laz ˈβeɣas] «kazvateližed alangištod») om Amerikan Ühtenzoittud Štatoiden lidn Nevad-štatan suvipäivnouzmas. Oficialine anglijankel'ne nimituz — City of Las Vegas, oficialižetoi — muite Vegas. Se om štatan kaikiš suremb lidn, Klark-ümbrikon (20 880 km²) administrativine keskuz.

Vegas om azartvändoiden da bobuštusiden pälidn mail'man znamoičendanke, om saudud da radab enamba 80 kazinod i severz'-se tuhoid vändhonusid. Äiluguižed adivpertid da massižen aigtegon sauvused tehtas lidnad AÜV:oiden sajiden, prezentacijoiden i reklaman kompanijoiden znamasižeks sijaks.

Istorii

Eländpunktan aluz om pandud vn 1905 15. päiväl semendkud i hätken aigan oli järedaks raudtestancijaks (nügüd' ei ole passažirühtenzoitust). Vspäi 1911 om lidnan statusanke. Vn 1931 19. päiväl semendkud Nevad-štatan tobmuz laski azartvändoid sen kaikedme territorijadme. Ühtenaikte Guveran padoseinän lendand lidnanno varatoiti Vegasad vedel, i se šingotaškanzi.

Geografijan andmused

Lidnan sijaduz štatas i valdkundas vn 2015 kartal

Lidn sijadase rahvahatoman Mohave-man keskuses, 610 m ü.m.t. keskmäižel korktusel, läz Mid-vezivaradint. Vezi otab 0,14 nellikkilometrad lidnan pindas. Matkad štatan administrativižhe Karson Siti-keskushesai om 526 km lodeheze orhal, Nevadan südäitukuižhe poligonhasai — 100 km pohjoižhe.

Klimat om subtropine letetazangišton, päivoikaz vodes läbi, kezal eriližešti. Voden keskmäine lämuz om +21,2 C°, kezakun-sügüz'kun +28,7..+34 C°, tal'vkun +9..+11,9 C°. Ekstremumad oma −13 C° (viluku) i +47 C° (kezaku-eloku). Kezaaigan minimum om +6 C° (sügüz'ku), tal'vaigan maksimum om +31 C° (uhoku). Ei voi panda halad semendkus-sügüz'kus (semendkun minimum om +3 C°). Il'man lämuz voib ületada +25 C° miččel taht kul. Paneb sadegid 106 mm vodes, enamba uhokus (20 mm), kuivamb sezon oleskeleb sulakus-kezakus (8 mm pordos). Lumi katab ümbärdajid mägid kaikuččel tal'vel, no oleleb lidnas harvoin lujas. Kun keskmäine relätivine nepsuz vajehtase 16 % (kezaku)..45 % (tal'vku, viluku) röunoiš.

Tobmuz

Lidnan tobmuden pämez' om mer (angl.: Mayor of Las Vegas). Valitas händast nelläks vodeks, voib toštta strokud kahtišti. Edeližed lidnan merad oma Kerolin Gudman (Carolyn Goodman, edeližen meran ak, heinku 2011 — tal'vku 2024), Oskar Gudman (Oscar Goodman, kezaku 1999 — heinku 2011).

Eläjad

Vn 2010 AÜV:oiden rahvahanlugemižen mödhe lidnan kaikenaigaižiden eläjiden lugu oli 583 756 ristitud, vn 2020 — 641 903 ristitud. Kaikiš suremb lidnan ristitišt oli 648 224 eläjad vl 2017 i om nügüd'. Enamba 2,2 mln ristituid elihe lidnaglomeracijas vl 2020 (oli 1,9 mln vl 2010).

Augotižlibundan mödhe (lidnan eläjad vl 2020): evropalaižed — 40,44 % (ispanijalaižita), latinoamerikalaižed i ispanijalaižed — 33,31 %, afroamerikalaižed — 12,33 %, azijalaižed — 7,01 %, valdmerimalaižed — 0,65 %, indejalaižed — 0,36 %, segoitadud augotižlibundanke — 5,30 %, toiženke augotižlibundanke — 0,60 %.

Transport

Avtobusad oma kundaližeks transportaks lidnas RTC Transit-kompanijan ohjandusen al. Monorel'san jono radab vspäi 1995 (seičeme stancijad, 6,3 km ted). Raudte om sätud vemha jüguid vaiše.

Kaik koume lendimportad oma saudud lidnas. Rahvahidenkeskeine civiline lendimport Nevadan Garri Rid-senatoran nimed^[1] (LAS / KLAS, 56 mln passažiroid vl 2022) om kaikiš suremb niiden keskes, sijadase kahesas kilometras suvhe lidnan keskuzpalaspäi Paradais-ezilidnas. Tehtas reisid AÜV:oiden äjihe lidnoihe, Meksikan, Kanadan i Päivlaskmaižen Evropan surihe lidnoihe, Päivnouzmaižen Azijan i Keskuzamerikan pälidnoihe. Toižed kaks' lendimportad ratas privatižen da penen aviacijan täht.

Galerei

Lidnan tobmuden sauvuz (2012, Las Vegas City Hall)
Kaičijan angelan päjumalanpert' (riman katoline), vn 2018 nägu
Las Vegas Strip vl 2010
Modan ozutandan moll (Fashion Show Mall) i 64-žiruine Trump Tower (om vaumitud vl 2008) vl 2012
Smit Center-koncertzal i Discovery-muzei lapsiden täht (2014, «Avaiduz»)
Rahvahidenkeskeine lendimport Garri Ridan nimed suvižes Paradais-ezilidnas vl 2012

Homaičendad

↑ Rahvahidenkeskeižen Garri Rid-lendimportan sait (harryreidairport.com). (angl.) (isp.) (kit.) (jap.) (port.) (saks.) (fr.) (kor.) (Tagalog) (arab.)

Irdkosketused

Lidnan tobmuden oficialine sait (lasvegasnevada.gov). (angl.) (isp.) (kit.) (Tagalog) (kor.) (vjetn.) (tail.) (amhar.)
Lidnan turizman sait (visitlasvegas.com). (angl.) (saks.) (isp.) (fr.) (ital.) (port.) (jap.) (kor.) (kit.)

Las Vegas Vikiaitas

	AÜV:oiden järedad lidnad
	Enamba 3 mln. eläjid	Los Andželes \| Nju Jork
	1—3 mln. eläjid	Čikago \| Dallas \| Filadel'fii \| Finiks \| Hjuston \| San Antonio \| San Diego \| San Hose
	750 tuh. eläjid — 1 mln.	Džeksonvill \| Fort Uert \| Indianapolis \| Kolumbus \| Ostin \| San Francisko \| Šarlott
	Enamba 500 tuh. eläjid	Al'bukerke \| Baltimor \| Boston \| Denver \| Detroit \| El' Paso \| Fresno \| Las Vegas \| Luisvill \| Memfis \| Miluoki \| Našvill \| Oklahoma Siti \| Portlend \| Sakramento \| Sietl \| Tuson \| Vašington

[1] Rahvahidenkeskeižen Garri Rid-lendimportan sait (harryreidairport.com). (angl.) (isp.) (kit.) (jap.) (port.) (saks.) (fr.) (kor.) (Tagalog) (arab.)

[1]