Luisvill

Luisvill
Louisville

Valdkund	Amerikan Ühtenzoittud Valdkundad
Eläjiden lugu (2019)	617,638 ristitud
Pind	1,030 km²
Pämez'	Greg Fišer (viluku 2011—. Greg Fischer)
Telefonkod	+1−502
Aigvö	tal'vel UTC−5, kezal UTC−4

Lidnan keskuzpalan kart (2008)

Luisvill (angl.: Louisville, virktas [ˈluːǝvǝl] vai [ˈluːiːvɪl], [ˈlʊvəl], britanine [ˈluːivɪl]) om lidn AÜV:oiden päivnouzmas. Se om Kentukki-štatan kaikiš suremb lidn eläjiden lugun mödhe, otab 29. sijad valdkundas sen ozutajan mödhe. Džefferson-ümbrikon administrativine keskuz.

Istorii

Eländpunktan aluz om pandud vl 1778. Nimitihe francižen Lui XVI-kunigahan oiktastuseks. Ühtištuihe lidnad Džefferson-ümbrikonke vl 2003.

Luisvill šingotase tervhudenkaičendan sistemal, «Ford»-kompanijan kahtel avtotegimel, burbon-viskin tehmižel («Brown-Forman», mail'man koumandez) i tabakon kompanijal. Neniden kompanijoiden päfaterad oma saudud lidnas: «Yum! Brands» (kiruhsömän koumen verkon pidai: KFC, Picca Hat, Taco Bell), «Hillerich & Bradsby» (beisbolpalikod), «Papa John’s Pizza», «PNC Financial Services» i «Hilliard Lyons» (finansižed investicijad). Transportižen «UPS»-kompanijan Worldport-keskuz.

Geografijan andmused

Lidn sijadase štatan pohjoižröunanno, Ogajo-jogen hural randal, jogen vezilanktoidenno, 142 m ü.m.t. keskmäižel korktusel. Matkad štatan Frankfort-keskushesai om 60 km päivnouzmha.

Klimat om subtropine, no sä vajehtase teravas. Voden keskmäine lämuz om +14,5 C°, absolütine minimum oleskeli −30 C°. Paneb 1141 mm sadegid vodes, kuidme läz tazomäras (134 mm semendkus, 78 mm sügüz'kus).

Eläjad

Vl 2010 eläjiden lugu oli 597 337 ristitud. Kaik 1,3 mln elädas lidnaglomeracijas (2018, 46. sija AÜV:oiš), se mülütab kahesa ümbrikod Kentukkiš i nell' ümbrikod lähižes Indianas.

Pühäpertid i religijan kundad: katoline jumalankodikund — 163 jumalanpertid, baptizman 147 kundad, AÜV:oiden presviterianižen jumalankodikundan päfater, seičemenden päivän adventistoiden kund, kuz' islaman mečetid, viž sinagogad, üks' induistine pühäpert'.

Irdkosketused

• Lidnan ohjandusen oficialine sait (louisvilleky.gov). (angl.) (+ äikel'ne avtomatine känduz)