Jihvi

Jihvi
Jõhvi
Lidnanznam;	Flag;
Valdkund	Estinma
Eläjiden lugu (2024)	10,880 ristitud
Pind	7,6 km²
Pämez'	Maks Kaur; (sulaku 2019—)
Telefonkod	+372-(0)33
Aigvö	tal'vel UTC+2,; kezal UTC+3

Jihvi (estin kelel: Jõhvi, saks.: Jewe) om Estinman lidn da volost' valdkundan pohjoižpäivnouzmaižes čogas. Lidn om Ida-Virun makundan administrativine keskuz.

Istorii

Eländpunkt mainitase vspäi 1241 Danijan aigkirjas, ezmäi Gevi-nimitusenke. Žilon nimituz oli Jevve Venäman imperijas. Vl 1869 saudihe raudtestancijad, i žilo kändihe tondan bazaks Derpthasai, ei olend raudted sihe vhesai 1876. Jihvi sai lidnan statusad vn 1938 1. päiväl semendkud. Vl 1960−1991 oli alištunu Kohtla-Järve-lidnan tobmudele. Vl 2005 ühtištadihe Jivhi-lidnan tobmut Jihvin volostin administracijanke.

Jihvi šingotase šoidkiven samižel (kaks' kaivust), sömtegimištol (maidtegim, painatosed), sauvondmaterialiden pästandal (šebin' šoidkiven samižespäi, betontegim), logistikal (varažomad), akustiksistemiden tegimel, turizmal (kaks' rahvahidenkeskešt kezafestivalid, koume adivpertid), omblendan i meblin tehmižen edheotandoil, mugažo painuzkodi radab.

Geografijan andmused

Lidnan sijaduz volostiš, makundas i valdkundas vn 2025 kartal

Lidn sijadase volostin keskuzpalas, makundan pohjoižes, Tallidn — Narv raudtel i avtotel.

Matkad Tallidnan keskushesai om 166 km päivlaskmha orhal vai 151 km raudtedme. Lähembaine lidn om Kohtla-Järve, Jihvi sijadase sen rajoniden südäimes i röunatab Ahtme-rajonanke suves.

Tobmuz

Üks'toštkümne küläd i üks' Tammiku-žilo mülüdas Jihvin volostihe lidnan ližaks. Volostin pind om 124 km², ristitišt — 12 056 eläjad (viluku 2019).

Edeline volostin pämez' om Martin Repinskii (26. kezaku 2018 — 4. sulaku 2019).

Eläjad

Vn 2000 Estinman rahvahanlugemižen mödhe lidnan eläjiden lugu oli 12 112 ristitud, vn 2011 rahvahanlugemižen mödhe — 10 775 ristitud. Kaikiš suremb lidnrajoniden ristitišt oli 14 tuhad eläjid vl 1969.

Rahvahad (vl 2000): estilaižed — 33,20 %, venänikad — 53,51 %, toižed rahvahad — 13,29 %.