Kallaste

**Kallaste**
Lidnanznam;	Flag;
Valdkund	Estinma
Eläjiden lugu (2024)	651 ristitud
Pind	2,3 km²
Telefonkod	+372-xxx-xxxx
Aigvö	tal'vel UTC+2,; kezal UTC+3

Kallaste (mugažo estin kelel; ven.: Ка́лласте, edel 1923. vot Кра́сные го́ры) om Estinman lidn valdkundan päivnouzmaiženno röunanno. Se om valdkundan kaikiš penemb lidn eläjiden lugun mödhe, Tartun makundan pala.

Istorii

Nügüdläižen eländpunktan aluz om pandud pagenuzil Uz'lidnan maišpäi vanhuskolaižil 18. voz'sadal kuti kalanikoiden külä Kokor-maižanduzusadiban sijas (est. Kokora). Kallas znamoičeb «rand» estikš. Kätihe lidnanvuiččeks žiloks (est. alevik) vl 1921. Žilo sai lidnan statusad vl 1938. Vll 1950−1959 se oli Kallasten rajonan keskuseks.

Kallasten ristitud elädas kalanpüdandal i turizmal (kaks' adivpertid).

Geografijan andmused

Lidn sijadase makundan pohjoižpäivnouzmaižes čogas, Peipusjärven päivlaskmaižel randal. Toril-oja (est.: Torila) jokseb lidnan pohjoižes.

Matkad Tallidnhasai om 162 km lodeheze orhal vai 198 km avtotel. Matkad volostin Alatskivi-žilo-keskushesai om kuz' kilometrad suvhe orhal vai avtotedme, makundan Tartu-keskushesai om 40 km suvipäivlaskmha orhal vai 47 km avtotedme.

Tobmuz

Vll 1991−2017 lidn oli ümbärtud Alatskivi-volostil. Vn 2017 redukuspäi Kallaste kadoti municipalitetan statusad i mülüb surenzoittud Peipsiääre-volostihe.

Edeline lidnan pämez' om Gennadi Kulkov (2015−2017).

Eläjad

Vl 2000 kaik 1 195 eläjad oli lidnas. Vn 2011 Estinman rahvahanlugemižen mödhe lidnan eläjiden lugu oli 1 000 ristitud. Kaikiš suremb lidnan ristitišt oli 1,5..1,6 tuhad eläjid vll 1922−1970 (1 668 rist. vl 1959).

Rahvahad (2000): venänikad — 72,91 %, estilaižed — 21,14 %, toižed rahvahad — 5,95 %.