Maardu

**Maardu**
Lidnanznam;	Flag;
Valdkund	Estinma
Eläjiden lugu (2025)	16,875 ristitud
Pind	23,4 km²
Pämez'	Vladimir Arhipov; (sulaku 2016—)
Telefonkod	+372-xxx-xxxx
Aigvö	tal'vel UTC+2,; kezal UTC+3

Maardu (mugažo estin kelel) om Estinman lidn valdkundan pohjoižes. Se om Tallidnan päivnouzmaine ezilidn, mülüb Harju-makundha.

Istorii

Eländpunktan aluz om pandud vl 1939 kuti Maardu-radnikžilo otmaha kävutamižhe fosforitan löudmižsijad, nimitihe järven mödhe. Vspäi 1963 oli alištunu Tallidnan tobmudele. Vl 1980 ühtištadihe žilod lidnanvuiččenke Kallavere-žilonke i anttihe lidnan statusad, no jätihe Tallidnas, Maardu oli mülünu sen Merirajonha. Vn 1991 kül'mkun 7. päiväspäi Maardu om olmas eriližeks municipalitetaks, sil aigal mülütihe lidnha Muug-meriportad da lähižid kezakülätahondoid.

Maardu šingotase järedaks Muugan torguindmeriportaks i Iru-elektrostancijal (radab londuseližel gazal i murdoil). Saudud nevondkundaližen aigan himine «Estonofosforit»-kombinat om sauptud Estinman ripmatomuden endištusen jäl'ghe.

Geografijan andmused

Lidn sijadase makundan keskuzpalan päivnouzmas, röunatab Tallidnanke päivlaskmas. Matkad Tallidnan keskuzpalhasai om vižtoštkümne kilometrad. Maardu-järv (1,7 km², pind om 33 m ü.m.t. korktusel) sijadase lidnan suves, Kroodi-oja lähteb sišpäi.

Maardun municipalitet kogoneb neniš rajonišpäi: Kallavere, Kroodi, Kärmu, Muug, Muugan port, Maardu-järven ümbrišt.

Eläjad

Vn 2011 Estinman rahvahanlugemižen mödhe lidnan eläjiden lugu oli 17,524 ristitud. Kaikiš suremb lidnan ristitišt oli 18,150 eläjad vl 2003.

Rahvahad (enamba 0,4 % vl 2011): venänikad — 61,88 %, estilaižed — 24,81 %, ukrainalaižed — 4,91 %, vaugedvenälaižed — 3,77 %, totarlaižed — 0,96 %, suomalaižed — 0,50 %, pol'šanmalaižed — 0,49 %, litvalaižed — 0,47 %, toižed rahvahad i rahvahuden ozutandata — 2,21 %.

Openduz

Lapsiden opendusen aluzkundad (vn 2019 olend) oma nell' päivkodid, Maardun aluzškol (venän kelel), Kallaveren keskškol (estin kelel), Maardun gimnazii (venän kelel, ehtškolanke), Joudan keskuz, Maardun čomamahtoiden škol.

Lähembaižed professionaližen opendusen aluzkundad sijadasoiš Tallidnas.