Jigev

Vikipedii-späi
Jigev
Jõgeva
 Lidnanznam
 Flag
Valdkund Estinma
Eläjiden lugu (2018-01-01) 5,143 ristitud
Pind 3,86 km²
Jigev Jõgeva
Pämez' Raivo Meitus
(heinku 2016—)
Telefonkod +372-xxx-xxxx
Aigvö tal'vel UTC+2,
kezal UTC+3


Vn 2012 lidnan kart.

Jigev (est.: Jõgeva) om Estinman lidn valdkundan päivnouzmas. Se om Jigevan makundan pälidn da kaikiš suremb lidn.

Istorii[vajehta | vajehtada tekst]

Eländpunkt mainitase ezmäižen kerdan Pol'šanman kodieloiden aigkirjas vl 1601 kuti pol'š.: Hoff Jagiwa, vll 1582−1622 Estinma oli alištunu pol'šan kunigahan tobmudele. Pen' žilo šingotaškanzi Laisholm-raudtestancijaks «TallidnTartu»-keskustal (linni vaumitud vodele 1876). Žilo sai lidnan statusad vl 1938, raudtestancii om udesnimitadud lidnan nimen kartte.

Toižen mail'man sodan aigan lidnan koume videndest oli pandud mantazole. Vll 1950−1991 lidn oli Jigevan rajonan keskuseks.

Jigevan ižandusen sarakod oma puižiden pertiden tehmine («Valmeco»), sijaližen maižanduzprodukcijan ümbriradmine (leibänedheotand, voitegim, rapsan edheotand), omblend («Skineks»-nahkkompanijan ceh), turizm (Estinman Pakaine-Dedan koditahond, Betti Al'ver-runokirjutajan muzei, vozne baikerparad, lebukeskused), mugažo koivunfaneran tegim om sauvomas.

Geografijan andmused[vajehta | vajehtada tekst]

Lidn sijadase Pedj-jogen oiktal randal tobjimalaz (122 km pitte, Emajogen hura ližajogi, Peipusjärven bassein). Matkad Tallidnhasai om 120 km lodeheze orhal, 150 km avtotedme vai raudtedme. Matkad Tartuhusai om 50 km suvipäivnouzmha-suvhe orhal i kaikil teil.

Heinkun lämuz +17,2 C°, uhokun — −5,8 C°, voden keskmäine lämuz om +5,3 C°. Estinman kaikiš lujemb pakaine om fiksiruidud neciš lidnas: −43,5 C° edel 1981 vot (vl 1940) i −36,7 C° vll 1981−2010. Paneb sadegid 688 mm vodes, enamba kaiked kezakus-elokus i redukus (71..93 mm kus).

Seičeme žilod da 85 küläd alištudas Jigevan volostin (est.: Jõgeva vald) tobmudele vs 2017 redukun 24. päiväspäi. Volostin pind — 1040 km².

Eläjad[vajehta | vajehtada tekst]

Vn 2011 EÜ:n rahvahanlugemižen mödhe lidnan eläjiden lugu oli 5 501 ristitud. Kaikiš suremb lidnan ristitišt oli 7 035 eläjad vl 1989. Kaik 13 679 ristitud elihe Jigevan volostiš vl 2018.

Rahvahad (lidnalaižed, enamba 0,35% vl 2011): estilaižed — 91,55%, venänikad — 5,89%, ukrainalaižed — 1,15%, vaugedvenälaižed — 0,40%, suomalaižed — 0,35%, toižed rahvahad — 0,66%.

Lidnan edeline pämez' oli Aare Olgo (2013−2016), nüg. Jigevan volostin nevondkundan ezimez'.

Galerei[vajehta | vajehtada tekst]

Irdkosketused[vajehta | vajehtada tekst]