Sillamäe

Sillamäe

Lidnanznam	Flag
Valdkund	Estinma
Eläjiden lugu (2025)	11,824 ristitud
Pind	11,67 km²
Pämez'	Tinis Kalberg (2013—)
Telefonkod	+372−39-xx-xxx
Aigvö	tal'vel UTC+2, kezal UTC+3

Vn 2012 lidnan kart

Sillamäe (mugažo estikš; saks.: Sillamäggi) om lidn da znamasine meriport Estinman pohjoižpäivnouzmas, mülüb Ida-Virun makundha. Se om valdkundan kümnenz' lidn eläjiden lugun mödhe.

Istorii

Eländpunkt mainitase ezmäižen kerdan vl 1502. Kurortžilo sai lidnan statusad vl 1957.

Vl 1928 saudihe tegint ümbriradamha palabad šoidkived, se oli muretud Toižen mail'man sodan aigan. Vozil 1947−1991 saubaline territorii oli, nimitihe sidä Narv-10-eländpunktaks (est.: Narva-10). NSTÜ:n aigan ümbriradoihe uranan kivendod da koncentratad sen hapandusihe. Jäl'ghe 1990 vot sadas harvoid mametalloid vaiše, vspäi 2011 tegim om amerikaižen Molycorp-korporacijan pala.

Sillamäen ižandusen päsarakod oma harvoiden mametalloiden samine kivendospäi (Molycorp Silmet), meriterminal lähižiden himižedheotandoiden täht (Kohtla-Järve), energetine (lämuzelektrostancii), mugažo betontegim, oludtegim i plastiktegesiden edheotand oma olmas lidnas.

Geografijan andmused

Lidn sijadase Suomen lahten suvirandal i Sitke-jogen lanktendan sihe sijas, 18 m keskmäižel korktusel valdmeren pindan päl. Kaks' vezivaradint om jogel lidnan südäimes.

Matkad Tallidnhasai om 185 km päivlaskmha E20-avtotedme. Lähembaižed lidnad oma Narv-Jogensu kaks'kümnes kilometras pohjoižpäivnouzmha meredme vai avtotedme i makundan Jihvi-keskuz 20 km päivlaskmha avtotedme.

Eläjad

Vn 2011 Estinman rahvahanlugemižen mödhe lidnan eläjiden lugu oli 14 252 ristitud. Kaik 13 481 eläjad oli lidnas vl 2017. Kaikiš suremb lidnan ristitišt oli 20 561 eläjid vl 1989.

Venäkel'žed eläjad oma enambuses lidnas, pol' eläb Venäman rahvahanikusenke heiden keskes.

Ekonomikan da ohjandusen insitut i Sillamäen profškol oma lidnan professionaližen opendusen aluzkundoikš.

Transport

Raudten sortiruindstancii om mereportanno. «Tallidn — Narv»-raudten lähembaine stancii om Vaivar (est.: Vaivara), se sijadase kahtes kilometras suvhe lidnaspäi.

Irdkosketused

• Lidnan tobmuden aluzkundoiden oficialine sait (sillamae.ee). (est.) (angl.) (ven.)