Mustvee

**Mustvee**
Lidnanznam;	Flag;
Valdkund	Estinma
Eläjiden lugu (2024)	1,153 ristitud
Pind	5,7 km²
Telefonkod	+372−77x-xxxx
Aigvö	tal'vel UTC+2,; kezal UTC+3

Mustvee (mugažo estin kelel, «must vezi») om Estinman lidn valdkundan päivnouzmas. Mülüb Jigevan makundha, sen kaikiš penemb lidn koumespäi, Mustveen volostin keskuz da pala.

Istorii

Eländpunkt mainitase dokumentoiš ezmäižen kerdan vl 1493. Žilo sai lidnan statusad vl 1938. Vll 1950−1959 lidn oli Mustveen rajonan keskuseks. Kadoti municipalitetan statusad vn 2017 reforman jäl'ghe.

Mustvee šingotase valdkundaližen büdžetan aluzkundoil, kala- i mecižandusen edheotandoil, kalatesen turizmal, portal. Edel 2005. vot omblendceh radoi. Kaks' muzejad oma avaitud: kodirandan (sidä kesken vanhuskolaižiden) i veskoiden.

Geografijan andmused

Lidn sijadase makundan pohjoižpäivnouzmas, Peipusjärven lodehližel randal, Mustvee-jogen lanktendanno sihe.

Matkad Tallidnhasai om 140 km lodeheze orhal vai 173 km avtotel, Tartuhusai om vižkümne koume kilometrad suvhe orhal vai 59 km avtotedme. Lähembaine lidn om makundan Jigev-keskuz (raudtestancijanke) 34 km päivlaskmha-suvipäivlaskmha orhal vai 38 km avtotedme.

Klimat om ven. Keza om päivoikaz lujas, tal'vaig om pil'vekaz lujas da pimed. Voden keskmäine lämuz om +5,8 C°, kezakun-elokun +14,9..+17,6 C°, tal'vkun-keväz'kun −1,5..−5,0 C°. Ekstremumad oma −39,6 C° (tal'vku) i +33,8 C° (heinku). Kezaaigan minimum om −2,8 C° (kezaku), tal'vaigan maksimum om +11,9 C° (uhoku). Ei voi panda halad heinkus vaiše (minimum +1,0 C°). Paneb sadegid 633 mm vodes, enamba kezakus-elokus (68..78 mm kus) i redukus (62 mm), vähemba uhokus-sulakus (32..37 mm kus). Kun keskmäine relätivine nepsuz vajehtase 79..90 % röunoiš päiči sulakus-kezakus (72..75 %).

Tobmuz

Kaik üks' lidn, kaks' žilod da 54 küläd alištudas Mustveen volostin (est.: Mustvee vald) tobmudele vn 2017 redukun 24. päiväspäi. Volostin pind — 615,68 km².

Lidnan jäl'gmäine pämez' om Maks Kaur (Max Kaur), radoi vll 2013−2017.

Eläjad

Vn 2011 Estinman rahvahanlugemižen mödhe lidnan eläjiden lugu oli 1,358 ristitud, vl 1989 — 1,990 ristitud. Kaikiš suremb Mustveen registriruidud ristitišt oli edel lidnan statusan sandad: 2,893 eläjad vl 1897 i 2,841 eläjad vl 1934. Kaik 5,469 ristitud elihe Mustveen volostiš vl 2019.

Rahvahad (lidnalaižed, vl 2011): estilaižed — 41,5 %, venänikad — 55,2 %, toižed rahvahad — 3,3 %.