Kudrovo

Kudrovo
Кудрово
Valdkund	Venäma
Eläjiden lugu (2023)	64,904 ristitud
Pind	8 km²
Telefonkod	+7−812-xxx-xxxx
Avtokod	47
Aigvö	UTC+3 (MSK+0)

Kudrovo (ven.: Ку́дрово, suom.: Väärämäki — «Värmägi») om lidn Leningradan agjan Vsevoložskan rajonan suvipäivlaskmas. Sijadase Piterin päivnouzmaiženno röunanno, mülüb Zanevkan lidnankundha.

Istorii

Vintegimed Piterin ümbrištol mainitadas lidnan sijas 19. voz'sadan augotišespäi Värmägi-usadibanke (ven.: Косая гора), usadiban pert' om likvidiruidud vl 2013. Nevondkundaližen aigan Kudrovo-kolhoz, sid' sovhoz, oliba olmas vll 1928−1950.

Saudas ut Kudrovo-lidnad läz endišt Kudrovo-küläd, lidnan aluz om pandud vn 2006 lopus. Vn 2008 uhokus om zavodidud «Uz' Okkervil'»-eländfartalan sauvondad, vn 2009 sügüzespäi letihe «Seičeme pälidnad»-eländfartalan.

Vn 2018 28. päiväl kezakud Kudrovo sai lidnan statusad Leningradan agjan № 46-oz-käskusen mödhe 18.06.2018-dataspäi.

Kudrovo šingotase betontegimel^[1], specialižen radsoban pästandal, varažomil.

Geografijan andmused

Lidn sijadase Piterin Rengazavtotenno, sen ümbrusen südäimes, pohjoižhe «Kol»-avtotrassaspäi (R-21). Om röunatud Piterin Nevan rajonal päivlaskmas, raudtesarakon taga. Okkervil'-jogi (Nevan oigedpol'ne bassein) läbitab lidnan pohjoižpalad. Matkad lidnankundan Janino-1-keskushesai om kuz' kilometrad pohjoižpäivnouzmha, Vsevoložsk-rajonkeskushesai om 14 km pohjoižpäivnouzmha orhal vai 21 km avtotedme. Lähembaižed lidnankundan eländpunktad oma Zanevk-külä kahtes kilometras pohjoižhe i Novosergijevk-külä 2 km päivnouzmha.

Kaik om 21 irdad lidnas.

Eläjad

Vn 2010 Venäman rahvahanlugemižen mödhe Kudrovo-külän eläjiden lugu oli 137 ristitud. Vl 2017 kaik 13 501 ristitud oli registriruidud sen aigan küläs. Lidnan ristitišt oli 31 577 eläjad vl 2019, 60 791 eläjad vl 2021. Kaikiš suremb lidnan ristitišt om nügüd'.

Ortodoksižen hristanuskondan koume jumalanpertid^[2] oma saudud lidnas vspäi 2013: Ioann-jumalantedomehen i Jumalanmaman «Ihastuz da tüništuz»-jumalaižen kaks' pühäpertid.

Kaik läz kümned päivkodid i koume keskškolad oma avaitud lidnas. Professionaližen opendusen aluzkundad ratas lähižes Piteriš. Gatčinan pedagogine kolledž avaidab palakundad lidnas vn 2023 kezal.

Transport

Avtobusad ühtenzoittas lidnad Piterinke. Lähembaine metrostancii om Ulica Dibenko, sen üks' vestibülišpäi om ühtes kilometras päivlaskmha lidnan röunaspäi orhal vai kahtes..nelläs kilometras avtoteidme.

Metropoliten (vozile 2025−2027) linijan ekspluataciženke deponke i tramvai oma vaiše planoiš.

Galerei

Lämoipalonvastaine palakund (2021)
Istorine Kudrovo-külä, vn 2013 nägu
Ph. Ioann-jumalantedomehen jumalanpert', vn 2021 nägu
«Seičeme Pälidnad»-mikrorajonan uded sauvondad vl 2015
Keskškol nomer 1 (2021)
«Mega»-torguindkeskuz (2020)
Fontan Evropan torgul vl 2020

Homaičendad

↑ Kudrovon betontegimen sait (kudrovo.lpbeton.ru). (ven.)
↑ Kudrovon pühäpertid sobory.ru-saital. (ven.)

Irdkosketused

Lidnan i lidnankundan tobmuden oficialine sait (zanevkaorg.ru). (ven.)

Kudrovo Vikiaitas

	Leningradan agjan lidnad
	Boksitogorsk \| Bugri \| Gatčin \| Ivangorod \| Kamennogorsk \| Kingisepp \| Kiriši \| Kirovsk \| Koltuši \| Kommunar \| Kos'kenaluine \| Kudrovo \| Lug \| Lüban' \| Murino \| Nikol'skoje \| Otradnoje \| Pikalövo \| Primorsk \| Priozersk \| Pöud \| Sertolovo \| Slanci \| Sosnovii Bor \| Svetogorsk \| Säs'stroi \| Šlissel'burg \| Tel'manan lidn \| Tihvin \| Tosno \| Uz' Ladog \| Viipur \| Visock \| Volhov \| Volosovo \| Vsevoložsk

[1] Kudrovon betontegimen sait (kudrovo.lpbeton.ru). (ven.)

[2] Kudrovon pühäpertid sobory.ru-saital. (ven.)

[1]

[2]