Volhov (lidn)

Volhov
Волхов

Lidnanznam	Flag
Valdkund	Venäma
Eläjiden lugu (2024)	37,539 ristitud
Pind	108,21 km²
Pämez'	Alisa Arutünän (sügüz'ku 2019—)
Telefonkod	+7−81 363-xx-xxx
Avtokod	47
Aigvö	UTC+3 (MSK+0)

Volhov (ven.: Во́лхов, suom.: Olhava) om Venäman lidn da järed raudtesol'm Leningradan agjan keskuses. Se om Volhovan rajonan administrativine keskuz da kaikiš suremb lidn.

Istorii

Eländpunktan aluz om pandud vl 1918 kuti Volhovstroi-žilo sauvomha Volhovan GES (saudihe vozil 1918−1926). Vl 1933 ühtištadihe sidä lähižen Zvank-radnikžilonke da raudtestancijanke da anttihe lidnan statusad. Vspäi 1940 lidn om olmas nügüdläiženke nimenke.

Volhovan ižandusen päsarakod oma himine tegimišt, gidroenergetik da sömtegimišt, mugažo alüminijantegim da mebel'fabrik oma olmas.

Geografijan andmused

Lidn sijadase rajonan suvipäivlaskmas, Olhavanjogen molembil randoil, 33 m ü.m.t. keskmäižel korktusel. Volhov-1 sijadase jogen hural (päivlaskmaižel) randal, Volhov-2 — oiktal (päivnouzmaižel) randal.

Matkad Piterihesai om 141 kilometrad päivlaskmha.

Tobmuz

Volhov om lidnankundan üks'jäižeks eländpunktaks.

Lidnankundan tobmuden pämez' om sen Deputatoiden nevondkundan ezimez'. Edeline nevondkundan ezimez' om Vitalii Napsikov (sügüz'ku 2014 — sügüz'ku 2019).

Eläjad

Vn 2010 Venäman rahvahanlugemižen mödhe lidnan eläjiden lugu oli 47 182 ristitud (rajonan ristitišton pol'), vn 2021 — 38 511 ristitud. Kaik 45 195 eläjad oli lidnas vl 2017. Kaikiš suremb lidnan ristitišt oli 51 tuhad eläjid vl 1987 i vl 1998.

Rahvahad (enamba 0,4 % vn 2010 Venäman rahvahanlugemižen mödhe): venälaižed — 93,4 %, ukrainalaižed — 1,0 %, armenijalaižed — 0,8 %, čiganalaižed — 0,8 %, azerbaidžanlaižed — 0,5 %, vaugedvenälaižed — 0,5 %, toižed rahvahad — 1,7 %, rahvahuden ozutandata — 1,3 %.

Erased igähižed rahvahad: karjalaižed — 20 rist. (0,04 %), suomalaižed — 10 rist. (0,02 %), estilaižed — 8 rist. (0,02 %), vepsläižed — 7 rist. (0,01 %).

Ortodoksižen hristanuskondan nell' pühäpertid oma avaitud lidnas: ph. Ondrii Ezikuctud päjumalanpert' (puine, om letud vodele 2019), Mikoi-arhangelan jumalanpert' (kivine variant om saudud vl 1820, ližasaudud vl 1913, oli sauptud vll 1938−1994) i kaks' časounäd.

Lapsiden opendusen aluzkundad oma kaks'toštkümne päivkodid, keskškolad, lapsiden sädamižen pert', čomamahtoiden škol. Volhovan äiprofil'ne tehnikum om lidnan professionaližen opendusen aluzkundaks. Enzne Volhovan politehnine tehnikum om mülütadud sihe vn 2021 sulakus.

Transport

Avtobusad i taksid oma kundaližeks transportaks lidnas. Kaik koume sildad om avaitud Olhavas päliči lidnan südäimes: avtotesild, raudtesild da sild jaugnikoiden täht.

Ezilidnelektrojonused ühtenzoittas Piterinke. Volhovan raudtesol'men koume stancijad: Volhovstroi-1, Volhovstroi-2, Murmanskan Verai (ven.: Мурманские Ворота). Novooktäbr'skai-platform radab mugažo.

Galerei

• 
  Lidnan da rajonan administracijan sauvuz (vn 2018 fotokuva)
• 
  Mihail-arhangelan jumalanpert', vn 2019 nägu
• 
  «Metahim»-tegim vl 2019
• 
  «Gazovik»-sporttervehtamižkompleks (2011)
• 
  Volhovan päraudtestancijan sauvuz vl 2011 (Volhovstroi-1)
• 
  Volhovan GES:an padosein i alabjef vl 2009

Irdkosketused

• Volhov-lidnankundan da Volhovan rajonan Deputatoiden Nevondkundoiden oficialine sait (volsov.ru). (ven.)
• Volhov-lidnan da Volhovan rajonan ohjastusen oficialine sait (volkhov-raion.ru). (ven.) (angl.)
• Volhov-lidnan endevanh informacine sait (volkhov.ru). (ven.) (om täuttud vn 2016 elokuhusai)