Vsevoložsk

Vikipedii-späi
Vsevoložsk
Всеволожск
 Lidnanznam
 Flag
Valdkund Venäma
Eläjiden lugu (2023) 78,849 ristitud
Pind 62,26 km²
Vsevoložsk Всеволожск
Pämez' Angelina Pligun
(sügüz'ku 2014—)
Telefonkod +7−81 370-xx-xxx
Avtokod 47
Aigvö UTC+3 (MSK+0)


Vsevoložsk (ven.: Все́воложск, suom.: Seuloskoi) om Venäman lidn Leningradan agjas, Piterin da Ladogan keskes, Piterin pohjoižpäivnouzmaine ezilidn. Se om Vsevoložskan rajonan administrativine keskuz da kaikiš suremb lidn, mugažo municipaližen «Vsevoložsk-lidn»-ühtnikan keskuz.

Istorii[vajehta | vajehtada tekst]

Eländpunktan aluz om pandud vl 1892 kuti žilo Räbovo-raudtestancijanno. Vspäi 1895 Vsevoložskai-raudtestancii (ven.: Всеволожская) om avaitud pol'tošt kilometras Räbovo-raudtestancijaspäi, se om lidnan päraudtestancii nügüd'. Pavel Vsevoložskii (1839−1898) lugese lidnan alusenpanijaks, sikš miše ühtni sauvomižhe akcioneraks arvoimiženke nimitada pandud hänen mal raudtestancijad ičeze kanzannimen mödhe, no Räbovo-stancii jäi ičeze nimenke.

Suren Tatanman sodan aigan Elonte oli läbitanu žilod.

Vl 1963 Vsevoložskii-radnikžilo kändihe lidnaks, alištihe sidä agjan tobmudele oikti, no lidnan ispolkomale alištuiba molembad lidn da rajon.

Vsevoložskan ižandusen päsarakod oma renghanpäližiden tehmine (Nokian Tyres), metallkonstrukcijoiden i avtoiden metallpaloiden tehmine, eländkodiden sauvond, bumagpakuitesen tehmine, sömtegimišt, kirjoiden pästand, torguind da logistik. Kebnavtoiden pästandan tegim (Ford Motors — Ford Sollers Vsevoložsk-edheotand) radoi vll 2002−2019 i om konservacijas.

Geografijan andmused[vajehta | vajehtada tekst]

Lidn sijadase Lubj-jogen molembil randoil (ven.: Лу́бья 26 km pitte, Piteriš Lupp, ven.: Лу́ппа, Ohtan hura ližajogi), 11..68 m ü.m.t. korktusil. Matkad Piterin keskushesai om 28 kilometrad suvipäivlaskmha, lidnan röunaspäi Piterin röunhasai om nell' kilometrad.

Kaik koume pen't žilod mülüdas lidnankundha Vsevoložskan ližaks. Lidnankundan pind — 172,05 km².

Eläjad[vajehta | vajehtada tekst]

Vozil 1959−1992 radnikžilon ristitišt oli 27..33 tuhad röunoiš. Vn 2002 Venäman rahvahanlugemižen mödhe lidnan eläjiden lugu oli 45 310 ristitud, lidnan vl 2010 — 59 704 ristitud, lidnankundan vl 2010 — 60 018 ristitud. Kaikiš suremb lidnan ristitišt oli 79 038 eläjad vl 2021. Rajonan ristitišton videndez eläb Vsevoložskas. Vl 2017 kaik 70 292 ristitud elihe lidnas i 70 523 ristitud kaikes lidnankundas.

Rahvahad (enamba 0,4 % vl 2010): venälaižed — 90,7 %, ukrainalaižed — 2,5 %, armenijalaižed — 1,0 %, vaugedvenälaižed — 0,7 %, totarlaižed — 0,5 %, toižed rahvahad — 2,3 %, rahvahuden ozutandata — 2,3 %.

Erased igähižed rahvahad: suomalaižed — 92 rist. (0,15%), estilaižed — 21 rist. (0,03%), karjalaižed — 19 rist. (0,03%), vepsläižed — 5 rist. (0,01% vähemba)[1].

Ortodoksižen hristanuskondan üks'toštkümne pühäpertid[2] oma saudud lidnas: ühesa jumalanpertid i kaks' časounad. Baptizman loičendpert' om avaitud.

Vsevoložskan agrotegimištoline tehnikum[3] (edel 2012. vot maižandusen kolledž) om lidnan professionaližen opendusen aluzkundaks.

Transport[vajehta | vajehtada tekst]

Avtobusad da ezilidnelektrojonused oma kundaližeks transportaks lidnan südäimes. Lähembaine metrostancii om Ladožskaja (38 minutad maršruttaksil).

Irinovkan raudte läbitab lidnad Piterin Suomenman päraudtestancijaspäi, om koume raudestancijad lidnas, sen lopstancijad oma Ladoganjärv ühtel tel i lidnanvuitte Morozovan nimed žilo rajonan suvipäivnouzmas toižel tel.

Galerei[vajehta | vajehtada tekst]

Homaičendad[vajehta | vajehtada tekst]

  1. Национальный состав и владение языками, гражданство населения Ленинградской области (Leningradan agjan rahvahaline mülükund, ristitišton kel'mahtod da rahvahanikuz.) / Стат. сборник. Часть 1. — СПб.: Петростат, 2013. — 266 lp. — Lpp. 33−34. (ven.)
  2. Vsevoložskan pühäpertid sobory.ru-saital. (ven.)
  3. Vsevoložskan agrotegimištoližen tehnikuman sait (vsevshk.ru). (ven.)

Irdkosketused[vajehta | vajehtada tekst]



Leningradan agjan lidnad
Boksitogorsk | Gatčin | Ivangorod | Kamennogorsk | Kingisepp | Kiriši | Kirovsk | Koltuši | Kommunar | Kos'kenaluine | Kudrovo | Lug | Lüban' | Murino | Nikol'skoje | Otradnoje | Pikalövo | Primorsk | Priozersk | Pöud | Sertolovo | Slanci | Sosnovii Bor | Svetogorsk | Säs'stroi | Šlissel'burg | Tihvin | Tosno | Uz' Ladog | Viipur | Visock | Volhov | Volosovo | Vsevoložsk