Artömovskii

Artömovskii
Артёмовский

Lidnanznam	Flag
Valdkund	Venäma
Eläjiden lugu (2025)	28,546 ristitud
Pind	47 km²
Pämez'	Konstantin Trofimov (reduku 2020—)
Telefonkod	+7−34 363-xx-xxx
Avtokod	66, 96, 196
Aigvö	UTC+5 (MSK+2)

Artömovskii (ven.: Артёмовский) om Venäman lidn Sverdlovskan agjan suves. Se om Artömovskijan lidnümbrikon administrativine keskuz da pala vspäi 2004.

Istorii

Vspäi 1864 nügüdläižen lidnan territorijal ezmäine eländpunkt oli tetab kuti Jegoršino-žilo (ven.: село Егоршино). Vl 1871 löutihe kivihil't žilos kaivod süveten. Sauvoškanzihe kaivuzid, i vl 1925 ühtištadihe kaivajiden žiloid Artömovskii-radnikžilho.

Vl 1938 Artömovskii-radnikžilo da Jegoršino-žilo oliba ühtenzoittud Artömovskii-lidnaks. Raudtestancijan nimi om Jegoršino tähäsai. Vl 1960 Artömovskii kändihe lidnaks agjan alištusenke.

Artömovskii šingotase Jegoršinon radiotegimel, mašinansauvomižen «Ventprom»-tegimel, Artömovskijan LEK:al, raudbetontegesiden tegimel i leibänkombinatal.

Geografijan andmused

Artömovskijan ümbrikon sijaduz agjas vn 2013 kartal

Lidn sijadase lidnümbrikon keskuzpalas, Keskuralan päivnouzmaižil pautkil, Bobrovk-jogen randal (ven.: Бобровка 46 km pitte, Irbitan hura ližajogi), 180 m ü.m.t. keskmäižel korktusel.

Matkad Jekaterinburghasai om 118 km suvipäivlaskmha avtotedme. Lähembaine lidn om Rež koumekümnes kilometras päivlaskmha orhal, raudtedme vai avtol.

Klimat om ven kontinentaline. Ekstremumad oma −46,7 C° (tal'vku) i +38,4 C° (heinku, eloku). Mahusen kül'mehtusen süvüz om 150 sm vai sen enamba.

Tobmuz

Kaik 20 žilod da kuz' küläd mülüdas lidnümbrikho Artömovskijan ližaks, kaikiš järedamb om lidnanvuitte Bulanaš-žilo (12 504 rist. vl 2010). Lidnümbrikon pind — 2027,4 km², mülüb agjan Päivnouzmaižhe ohjastuzümbrikho.

Edeline lidnümbrikon pämez' (Administracijan pämez') om Andrei Samočernov (viluku 2017 — eloku 2020). Lidnümbrikon Duman ezimez' om Vladimir Arsenov vn 2021 sulakuspäi. Edeline Duman ezimez' om Konstantin Trofimov (viluku 2017 — kül'mku 2020).

Eläjad

Vn 2010 Venäman rahvahanlugemižen mödhe lidnan eläjiden lugu oli 33 160 ristitud, lidnümbrikon — 60 230 ristitud, vn 2021 lidnan — 28 943 ristitud. Vl 2017 kaik 30 933 ristitud elihe lidnas i 56 592 ristitud kaikes lidnümbrikos. Kaikiš suremb lidnan ristitišt oli 43 100 eläjad vl 1992.

Ortodoksižen hristanuskondan koume jumalanpertid oma avaitud lidnas.

Openduz

Lapsiden opendusen aluzkundad oma kaks'toštkümne nomeruidud päivkodid (nomer 1..4, 6, 10, 15, 21, 23, 25, 32, 33), seičeme keskškolad (nomer 1, 2, 3, 6, 10, 12, 56), licei nomer 21, lapsiden ližaopendusen Favorit-keskuz, čomamahtoiden škol, čomamahtoine škol nomer 24, sportškol nomer 25.

Artömovskijan tarkoiktan ladimensauvomižen kolledž om lidnan professionaližen opendusen aluzkundaks.

Tetabad ristitud

Sündnuded

• Aleksei Aidarov (sünd. 1974) — Vaugedvenäman i Ukrainan biatlonist.
• Al'bert Potapkin (sünd. 1968) — Nevondkundaližen Ühtištusen i Venäman rokmuzikan vändai.

Elänuded

• Aleksandr Mišarin (sünd. 1959) — Venäman valdkundaline šingotai i ohjandai, Sverdlovskan agjan kahtenz' lugul gubernator (2009−2012).

Irdkosketused

• Lidnümbrikon tobmuden sait (artemovsky66.ru). (ven.)
• Artömovskii-lidnümbrik Sverdlovskan agjan oficialižel midural.ru-saital. (ven.)