Lesnoi (lidn)

Lesnoi
Лесной
Lidnanznam;	Flag;
Valdkund	Venäma
Eläjiden lugu (2025)	47,994 ristitud
Pämez'	Sergei Čerepanov; (keväz'ku 2017—)
Telefonkod	+7−34 342-xx-xxx
Avtokod	66, 96, 196
Aigvö	UTC+5 (MSK+2)

Lesnoi (ven.: Лесно́й «meclidn») om Venäman sauptud lidn Sverdlovskan agjan päivlaskmas. Se om Lesnoin lidnümbrikon administrativine keskuz da päpala.

Lidn om aidoitud i ümbärtud ogakahal vanuimel kaikiš polišpäi, tulend tegese pästandbumagoiden mödhe kudes kontrol'punktas päliči vaiše (nomer 1, 2, 3, 5, 7, 8).

Istorii

Eländpunktan aluz om pandud vn 1947 6. päiväl kezakud kuti uranan izotopoiden erigoitmižen tegim da Gornii-žilo senno. Om saudud türmatud mehil. Žilo sai lidnan statusad vn 1954, i vhesai 1994 sen oficialine nimi oli Sverdlovsk-45.

Lesnoi šingotase uranan izotopoiden erigoitmižen da utilizacijan «Elektrohimpribor»-kombinatal^[1] (Rosatom), se-žo edheotand tegeb mašiništod atomelektrostancijoiden, geofizikan i kivivoin samižen täht, metalližkonstrukcijoid, andmusiden ümbriradmižen sijaližid keskusid. Toižed edheotandad: mašiništon tegim varažomiden täht, leibän i maidon pästandan edheotand.

Geografijan andmused

Lidn sijadase Keskmäižen Uralan päivnouzmaižil pautkil, Tur-joginiškon (Obin hurapol'ne bassein) i sen huran Sur' Imennai-ližajogen (ven.: Большая Именная 51 km pitte) huril randoil, ned ühthejokstas Alaturan vezivaradimhe-«uitho», 192 m ü.m.t. keskmäižel korktusel. Alatur- i Mir-raudtestancijad oma lähembaižed passažiroiden täht, sijadasoiš Alatur-lidnan territorijal.

Matkad Jekaterinburghasai om 206 km suvhe orhal vai 237 km avtotedme. Lähembaižed lidnad oma Alatur ani päivnouzmas (pit'k röun senke) i Kačkanar kuz'toštkümnes kilometras lodeheze orhal, 30 km avtol vai 42 km raudtedme. Tegimišton zon sijadase pidust' kaiked raudted Kačkanarhasai.

Tobmuz

Kaik nell' pen't žilod mülüdas lidnümbrikho Lesnoin ližaks, surembad oma Tajožnii (1218 rist. vl 2010) i Čaščavit (Чащавита, 634 eläjad sil-žo vodel), penembad oma Bušujevo (14 rist.) i Jolkino (kaikenaigaižeta ristitištota vl 2020). Lidnümbrikon pind — 359,4 km².

Lidnümbrikon tobmuden pämez' om sen Administracijan pämez'. Sergei Čerepanov radab lidnan Administracijan pämehen vn 2017 keväz'kuspäi. Edeline Administracijan pämez' om Jurii Ivanov, radoi vn 2017 keväz'kuhusai. Lidnümbrikon Duman ezimez' om Tat'jana Potapova vn 2017 kül'mkuspäi. Edeline lidnan Duman ezimez' om Viktor Grišin, hän oli radnikusel vn 2017 kül'mkuhusai.

Eläjad

Vn 2010 Venäman rahvahanlugemižen mödhe lidnan eläjiden lugu oli 50 363 ristitud (lidnümbrikon 96 procentad), lidnümbrikon — 52 476 ristitud, vn 2021 lidnan — 48 261 ristitud. Vl 2017 kaik 49 149 ristitud elihe lidnas i 51 035 ristitud kaikes lidnümbrikos. Kaikiš suremb lidnan ristitišt oli 54 500 eläjad vozil 1996 i 2001.

Rahvahad (ozutadud rahvahudenke vl 2010): venälaižed — 94,7 %, totarlaižed — 1,9 %, ukrainalaižed — 1,1 %, toižed rahvahad — 2,3 %.

Ortodoksižen hristanuskondan kaks' pühäpertid ratas lidnas: ph. Simeon Üläturalaižen jumalanpert' i Jumalanmaman «Korbehtoitmatoi penzaz»-jumalaižen^[2] puine pühäpert'.

Openduz

Lapsiden opendusen aluzkundad oma vižtoštkümne nimitadud i nomeruidud päivkodid (nomer 2, 4, 6, 9, 15, 17..24, 28, keskškolan nomer 67 školanedeline palakund), kahesa keskškolad (nomer 64, 67, 71..76), licei, škol nomer 1 adaptiruidud programidenke (edel vn 2015 redukud specialine (korrekcine) škol nomer 69), ehtal'ne škol nomer 62, lapsiden sädamižen keskuz, muzikškol, čomamahtoiden škol, horeografine škol, sportškol (edel 2020. vot lapsiden da norišton üks'borcuindoiden sportškol).

Professionaližen opendusen aluzkundad: äiprofil'ne tehnikum O. Teröškinan nimed^[3] i üläopendusen koumen aluzkundan filialad (Moskv — «MIFI»^[4], Jekaterinburg — Uralan federaline universitet, Uralan ekonomikan, ohjastusen da oiktusen institut).

Galerei

Memorial Suren sodan ühtnijoile (2007)
Skver Gagarinan nimed lidnan keskuzpalas, vn 2007 heinkun nägu
Lidnan kul'turkeskuz (2007)
Keskškol nomer 72 (2008)
Lapsiden muzikškol Kirovan irdal (2008)

Homaičendad

Irdkosketused

Lidnümbrikon oficialine sait (gorodlesnoy.ru). (ven.)

Lesnoi (lidn) Vikiaitas

	Sverdlovskan agjan lidnad
	Alapajevsk \| Alasald \| Alasergid \| Alatagil \| Alatur \| Aramil' \| Artömovskii \| Asbest \| Berözovskii \| Bogdanovič \| Degtärsk \| Irbit \| Ivdel' \| Jekaterinburg \| Kačkanar \| Kamensk Uralal \| Kamišlov \| Karpinsk \| Kirovgrad \| Krasnoturjinsk \| Krasnoufimsk \| Krasnoural'sk \| Kušv \| Lesnoi \| Mihailovsk \| Nevjansk \| Novoural'sk \| Pervoural'sk \| Polevskoi \| Rež \| Revd \| Serov \| Severoural'sk \| Sisert' \| Sredneural'sk \| Suhoi Log \| Zarečnii \| Talic \| Tavd \| Turinsk \| Uz' Läl' \| Verhoturje \| Volčansk \| Üläpišm \| Üläsald \| Ülätagil \| Ülätur

[1] «Elektrohimpribor»-kombinatan sait (ehp-atom.ru). (ven.)

[2] Lesnoi-lidnümbrikon pühäpertid sobory.ru-saital. (ven.)

[3] Äiprofil'žen tehnikuman O. Teröškinan nimed sait (poly.profiedu.ru). (ven.)

[4] Tehnologine institut — «MIFI»-universitetan filialan sait (mephi3.ru). (ven.)

[1]

[2]

[3]

[4]