Pervoural'sk

Pervoural'sk
Первоуральск

Lidnanznam	Flag
Valdkund	Venäma
Eläjiden lugu (2021)	119,365 ristitud
Pind	66 km²
Pämez'	Igor' Kabec (semendku 2018—)
Telefonkod	+7−3439-xxx-xxx
Avtokod	66, 96, 196
Aigvö	UTC+5 (MSK+2)

Pervoural'sk (ülähän) i Revd (alahan) Man kaimdajaspäi edel 2006. vot

Pervoural'sk (ven.: Первоура́льск) om Venäman lidn Sverdlovskan agjan suvipäivlaskmas. Se om agjan nellänz' lidn eläjiden lugun mödhe, Pervoural'skan lidnümbrikon administrativine keskuz da pala.

Istorii

Eländpunktan aluz om pandud vl 1732 kuti Vasil'jevsko-Šaitanskii-žilo ühtennimiženno raudtegimenno, tegim radoi sijaližel kivendol. Vl 1920 pästaškanzihe Uralan ezmäižid raudtorvid, udesnimitihe žilod nügüdläižikš sen-žo voden sügüz'kul. Anttihe Pervoural'sk-žilole lidnan statusad vn 1933 20. päiväl kezakud. Vspäi 1963 Pervoural'sk alištub agjan tobmudele oikti.

Pervoural'sk šingotase sauvondmaterialiden järedoil tegimil (torved, leskusenvastaižed tegesed) i sömtegimištol (leibkombinat, maidtegim), mugažo pästtas hroman ühtnendoid i ühthekeitandan mašiništod, tegesid poliuretanaspäi i kaivuzmašiništod kivivalamižel.

Geografijan andmused

Lidnan shematine kart (2004)

Lidn sijadase Keskmäižen Uralan päivlaskmaižil pautkil, 283 m ü.m.t. keskmäižel korktusel. Se seižub Sur' Šaitank-jogen randoil (ven.: Большая Шайтанка, 17 km pitte), jogi sädab vezivaradint-«uitod» i lankteb Čusovai-jogehe oiktalpäi (Kamanjogen hurapol'ne bassein). Matkad Jekaterinburgan röunhasai om 30 km päivnouzmha orhal, 34 km avtotedme vai raudtedme; keskushesai — 43 km orhal vai 47 km avtotedme. Lähembaine lidn om Revd ani suvhe.

Eläjad

Vn 2010 Venäman rahvahanlugemižen mödhe lidnan eläjiden lugu oli 124 528 ristitud, lidnümbrikon viž kudendest. Kaikiš suremb lidnan ristitišt oli 144 tuhad eläjid vll 1991−1993.

Rahvahad (2010, ozutadud rahvahudenke): venälaižed — 88,1%, totarlaižed — 6,6%, baškiralaižed — 1,7%, toižed rahvahad — 3,6%.

Ortodoksižen hristanuskondan viž jumalanpertid oma olmas lidnas, mugažo Jumalannägundan päjumalanpert' om sauvomas vspäi 2015. Islaman «Sabr»-pämečet' om avaitud vl 2004.

Galerei

• 
  Kolonn Pervoural'skan lidnümbrikos Evropan i Azijan röunal (2012)
• 
  Lidnan läžundkodin korpusad, vn 2002 nägu
• 
  Pervoural'skan Novotrubnii-tegim vl 2006 (torved)
• 
  Pervoural'skan LEK vl 2017
• 
  Pervoural'skan metallurgine tehnikum (2002, huralpäi)
• 
  Innovacine kul'turkeskuz (2019, om saudud vl 2016)
• 
  «Start»-jäpert'kulu (2002)
• 
  Ujundbassein Vezisportansuguiden pert'kulus (2002)
• 
  Avtoiden gaztäutmižen kompressorstancii vl 2014
• 
  Pervoural'sk-päraudtestancii vl 2006

Irdkosketused

• Pervoural'skan lidnümbrikon Duman oficialine sait (prvduma.ru). (ven.)
• Pervoural'skan lidnümbrikon Administracijan oficialine sait (prvadm.ru). (ven.)