Polevskoi

Polevskoi
Полевской

Lidnanznam	Flag
Valdkund	Venäma
Eläjiden lugu (2025)	53,366 ristitud
Pind	57 km²
Pämez'	Konstantin Pospelov (sügüz'ku 2017—)
Telefonkod	+7−34 350-xx-xxx
Avtokod	66, 96, 196
Aigvö	UTC+5 (MSK+2)

Polevskoi (ven.: Полевско́й) om Venäman lidn Sverdlovskan agjan suvipäivlaskmas. Se om Polevskoin municipaližen ümbrikon (edel 2025. vot — lidnümbrikon) administrativine keskuz da pala.

Istorii

Eländpunkt mainitase ezmäižen kerdan kuti Polevskai-külä (ven.: Полевская деревня) vl 1699, no oficialine alusenpanend lugese vodel 1718 baškiralaižiden londan jäl'ghe. Žilon i jogen nimitused oma ühthiženke augotižlibundanke. Vl 1702 löutihe vas'kkivendod i vl 1723 valdkund sauvoi vas'kensuladuztegint lidnusenke Petr I Sur'-imperatoran käskön mödhe. Pigai löutihe raudkivendod seičemes kilometras pohjoižhe tegimespäi, i vspäi 1735 sauvoškanzihe Severskii-raudantegint.

Vl 1924 Polevskoi i Severskii saiba radnikžilon statusad. Vn 1942 27. päiväl keväz'kud anttihe Polevskoi-žilole lidnan statusad, ühtištadihe Severskii-žilonke vn 1946 keväz'kus. Vspäi 1946 lidn alištub agjan tobmudele oikti.

Polevskoi šingotase raudan metallurgijan Severskii-torventegimel i sauvondmaterialiden sarakol (raudbetontegesed, keramine apakut, metalližkonstrukcijad), mugažo leibtegim radab.

Geografijan andmused

Polevskoin ümbrikon sijaduz agjas vn 2018 kartal

Lidn sijadase ümbrikon keskuzpalas, Keskmäižen Uralan päivlaskmaiženno pautkenno, 360 m ü.m.t. keskmäižel korktusel. Pen' Polevai-jogi (ven.: Полевая 16 km pitte) jokseb Üläuiton kal't lidnan suves i lankteb Severuškha sen vezivaradimen sijas (vspäi 1738, lidnan pohjoine, Čusovai-jogen hura randpol', Kamanjogen hurapol'ne bassein). Dumnai-mägi (409 m, ven. Думная) seižub lidnan suvipalas, ende saihe vas'kkivendod läz sidä.

Lidnan raudte om vaiše tegimišton täht, lähembaine Polevskoi-passažirraudtestancii om saudud kahesas kilometras päivnouzmha lidnaspäi Stancionnii-Polevskoi-žilos «Jekaterinburg — Čeläbinsk»-jonol. Matkad Jekaterinburgan röunhasai om nell'kümne kilometrad pohjoižpäivnouzmha orhal, 47 km avtotedme vai raudtedme; keskuzpalhasai — 52 km orhal vai 59 km avtotedme. Lähembaižed lidnad oma Sisert' 36 km päivnouzmha orhal vai 43 km avtol, i Degtärsk 29 km pohjoižhe orhal vai 47 km avtol.

Tobmuz

Kaik üks'toštkümne žilod da kaks' pen't küläd mülüdas municipaližhe ümbrikho Polevskoin ližaks. Ümbrikon pind — 1550,58 nellikkilometrad.

Polevskoin ümbrikon tobmuden pämez' om sen Administracijan pämez'. Edeline Administracijan pämez' om Aleksandr Kovalöv (2013 — sügüz'ku 2017). Kaik rahvaz valičeb ümbrikon pämest i lidnan Duman 20 deputatad nelläks vodeks. Municipaližen ümbrikon Duman ezimez' om Dmitrii Korobeinikov vn 2022 redukuspäi. Edeližed Duman ezimehed oma Il'ja Kočev (reduku 2017 — reduku 2022), Oleg Jegorov (2012 — reduku 2017).

Eläjad

Vn 2010 Venäman rahvahanlugemižen mödhe lidnan eläjiden lugu oli 64 220 ristitud, kaiken ümbrikon — 71 220 ristitud, vn 2021 lidnan — 55 182 ristitud. Vl 2017 kaik 62 259 ristitud elihe lidnas i 70 233 ristitud kaikes lidnümbrikos. Kaikiš suremb lidnan ristitišt oli 70..72 tuhad eläjid vll 1986−2000 (72 400 eläjad vl 1998).

Rahvahad (ozutadud rahvahudenke vl 2010): venälaižed — 91,4 %, totarlaižed — 3,5 %, baškiralaižed — 1,2 %, toižed rahvahad — 3,9 %.

Ortodoksižen hristanuskondan nell' pühäpertid oma kaičenus i saudud lidnas: Eläban Eziauguižen Stroican jumalanpert', phh. Pedroi da Pauloi-apostoloiden jumalanpert', kaks' časounäd.

Openduz

Lapsiden opendusen aluzkundad oma koumetoštkümne nomeruidud päivkodid (nomer 28, 32, 34, 40, 43, 49, 51, 53, 54, 63, 65, 69, 70), kahesa keskškolad (nomer 1, 8, 13, 14, 16..18, 20), keskškol-licei nomer 4 «Intellekt», politehnine licei nomer 21 «Erudit», kaks' sädamižen šingotesen keskust (N. E. Bobrovan nimed i P. P. Bažovan nimed), čomamahtoiden škol, ümbrikon sportškol.

Professionaline openduz tegese Jekaterinburgan aluzkundoiden filiališ: Uralan tegimištoliž-ekonomine tehnikum i Uralan radiotehnine kolledž A. Popovan nimed.

Galerei

• 
  Eläban Eziauguižen Stroican jumalanpert', vn 2022 nägu, Malahovan kukhanke tagamal
• 
  Phh. Pedroi da Pauloi-apostoloiden jumalanpert', vn 2009 nägu
• 
  Severskii-torventegim vl 2011
• 
  Kul'turkeskuz (2009)
• 
  Pertišt (2008)

Irdkosketused

• Municipaližen ümbrikon tobmuden sait (polevsk.midural.ru). (ven.)
• Polevskoin ümbrikon Duman sait (dumapgo.midural.ru). (ven.)