Bogdanovič (lidn)

Bogdanovič
Богданович

Lidnanznam	Flag
Valdkund	Venäma
Eläjiden lugu (2025)	29,574 ristitud
Pind	23 km²
Pämez'	Pavel Martjanov (tal'vku 2017—)
Telefonkod	+7−34 376-xx-xxx
Avtokod	66, 96, 196
Aigvö	UTC+5 (MSK+2)

Bogdanovič (ven.: Богдано́вич) om Venäman lidn Sverdlovskan agjan suves. Se om Bogdanovičun ümbrikon (edel 2025. vot — lidnümbrikon, edel 2006. vot — rajonan) administrativine keskuz da sen pala.

Istorii

Amuine Kašinan (Čudin) lidnut (ven.: Кашинское (Чудское) городище) om tedoiduses vspäi 1884, sijadase vides kilometras pohjoižhe lidnaspäi.

Eländpunktan aluz om pandud vl 1885 kuti Overino-sol'mraudtestancii udel «Jekaterinburg — Tümen'»-raudtel. Sil-žo vodel udesnimitihe raudtestancijad žilonke Venäman imperijan jaugvägiden Jevgenii Bogdanovič-jenaralan (1829−1914) kanzannimen mödhe, hän andoi pakičendoid sauvomha «Kazan' — Tümen'»-raudted varatoitamha Permin agjoid villäl näl'gvoziden aigan kuti Transsiban ezmäine projekt. Žilo sai lidnan statusad vn 1947 19. elokud. Oli alištunu agjan tobmudele oikti vll 1963−2019. Vll 1973−2010 porcellanan järed tegim radoi lidnas.

Bogdanovič šingotase leskusenvastaižmaterialiden tegimel, špaloiden imetamižtegimel, sauvondmaterialiden sarakol (mouckivi, lämuzizoläcijan plitad) i sömtegimištol (lihakombinat, maidtegim), mugažo kombisötken tegim radab.

Geografijan andmused

Bogdanovičun ümbrikon sijaduz agjas vn 2013 kartal

Lidn sijadase ümbrikon keskuzpalan pohjoižes, Kunar-jogen oiktal randal tobjimalaz (ven.: Куна́ра 59 km pitte, Pišman oiged ližajogi, Obin hurapol'ne bassein), 160 m ü.m.t. keskmäižel korktusel. Kurtuguz-järv (vai Kortoguz, 11 km²) zavodiše kudes kilometras lodeheze lidnaspäi.

«Jekaterinburg — Tümen'»-avtote läbitab lidnan suvipalad. Matkad Jekaterinburghasai om kahesakümne kahesa kilometrad päivlaskmha orhal, 94 km avtotedme vai raudtedme. Lähembaine lidn om Suhoi Log kümnes kilometras pohjoižhe orhal, avtol i raudtel.

Eläjad

Vn 2010 Venäman rahvahanlugemižen mödhe lidnan eläjiden lugu oli 30 670 ristitud, ümbrikon kaks' koumandest, vn 2021 — 30 142 ristitud. Kaik 29 311 eläjad oli lidnas vl 2017. Kaikiš suremb lidnan ristitišt oli 35..36 tuh. eläjid vll 1989−2001 (36 700 rist. vl 1996).

Rahvahad (ozutadud rahvahudenke vl 2010): venälaižed — 94,5 %, totarlaižed — 2,1 %, toižed rahvahad — 3,4 %.

Ortodoksižen hristanuskondan ph. Johann-jumalantedomehen (om saudud vll 1993−2019) i ph. Jekaterina-moknikan jumalanpertid oma saudud lidnas. Islaman loičendpert' radab.

Openduz

Lapsiden opendusen aluzkundad oma vižtoštkümne nimitadud i nomeruidud päivkodid (nomer 1, 2, 9..11, 13, 15, 18, 19, 27, 31, 37..39, 45), viž keskškolad (nomer 1..5), Bogdanovičun škol-internat nomer 9, ehtal'ne (avol'jaine) škol, lapsiden sädamižen keskuz, čomamahtoiden škol, čomamahtoine škol, sportškol hokkeiš mäčunke.

Bogdanovičun politehnikum om lidnan professionaližen opendusen aluzkundaks.

Galerei

• 
  Lidnümbrikon administracijan sauvuz (2021)
• 
  Ostrovok-torguindkeskuz (2006 vai 2009, «Sarik»)
• 
  Leskusenvastaižmaterialiden tegimen tulend vl 2010
• 
  Leskusenvastaižmaterialiden tegijoiden kul'turkeskuz (2021)
• 
  Bogdanovič-päraudtestancijan sauvuz vl 2013

Irdkosketused

• Bogdanovičun municipaližen ümbrikon tobmuden sait (gobogdanovich.ru). (ven.)
• Bogdanovičun ümbrikon Duman oficialine sait (дума-богданович.рф). (ven.)