Zarečnii (Sverdlovskan agj)

Zarečnii
Заречный

Lidnanznam	Flag
Valdkund	Venäma
Eläjiden lugu (2025)	28,230 ristitud
Pind	29,27 km²
Pämez'	Andrei Zaharcev (tal'vku 2016—)
Telefonkod	+7−34 377-xx-xxx
Avtokod	66, 96, 196
Aigvö	UTC+5 (MSK+2)

Sil sanal voib olda toižid znamoičendoid; miše nähta niid, tulgat tänna.

Zarečnii (ven.: Заре́чный) om Venäman lidn Sverdlovskan agjan suves. Se om municipaližen Zarečnii-ümbrikon (edel 2025. vot — lidnümbrikon) administrativine keskuz da pala.

Istorii

Eländpunktan aluz om pandud vn 1955 2. päiväl heinkud kuti Zarečnii-žilo sauvomha da holitamha Belojarskan LES:an. Se oli Komsomolan ühtnijoiden sauvomine. Vl 1957 vajehtihe projektad i sauvoškanzihe ezmäižen tegimištoližen nevondkundaližen AES:an. Ühtenz' energoblok om pästtud töhö vl 1964, kahtenz' — vl 1967, koumanz' — vodel 1980, nellänz' om rados vspäi 2016. Vl 1992 lidnanvuitte žilo sai lidnan statusad.

Zarečnii šingotase Belojarskan AES:al (energii, izotopad) i sauvondmaterialiden tehmižel (polipropilentorved, rosttumatoi metalline vanutez), mülüiden pästandal kivivoin samižen da ümbriradmižen täht, mugažo meblin i oluden edheotandad ratas.

Geografijan andmused

Municipaližen Zarečnii-ümbrikon sijaduz agjas vn 2018 kartal

Lidn sijadase ümbrikon suvipäivnouzmas, Pišm-jogen üläjoksmusen (ven.: Пышма́ 603 km pitte, Tur-jogen oiged ližajogi) Belojarskan vezivaradimen päivnouzmaižel hural randal (om täuttud vodele 1963, 38 km²), 240 m ü.m.t. keskmäižel korktusel.

Lidnan raudte radab vaiše juguiden täht, lähembaine Muranitnii-raudtestancii, 5. km i 11. km-seižutezplatformad oma kahtes kilometras päivnouzmha lidnaspäi. Matkad Jekaterinburgan röunhasai om koumekümne kilometrad päivlaskmha orhal vai 41 km avtotedme, keskushesai — 43 km orhal vai 54 km avtol. Lähembaižed lidnad oma Asbest 34 km pohjoižhe orhal vai avtol, i Aramil' Kol'covo-lendimportanke 29 km päivlaskmha orhal vai 44 km avtotedme.

Tobmuz

Mezenskoje-žilo (vspäi 1612, 1457 rist. vl 2010) da koume pen't küläd mülüdas ümbrikho Zarečniijan ližaks. Lidnümbrikon pind — 299,3 km².

Municipaližen ümbrikon tobmuden pämez' om sen Administracijan pämez'. Edeline Administracijan pämez' om Jevgenii Dobrodei, radoi vn 2016 keväz'kuhusai. Lidnan Duman ezimez' om Andrei Kuznecov vn 2019 uhokuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 26 820 ristitud, lidnan ümbrikon — 29 765 ristitud, vn 2021 lidnan — 28 112 ristitud. Kaik 27 617 ristitud elihe lidnas i 31 207 ristitud kaikes ümbrikos vl 2017. Kaikiš suremb lidnan ristitišt oli 29 800 eläjad vll 1998−2000.

Rahvahad (ozutadud rahvahudenke vl 2010): venälaižed — 93,9 %, totarlaižed — 1,7 %, ukrainalaižed — 1,4 %, toižed rahvahad — 3,0 %.

Ortodoksižen hristanuskondan koume jumalanpertid oma avaitud lidnas: puine Mikulai-čudonsädajan (letihe vl 1993), kivine Jumalanmaman Katken (om saudud vll 2010−2016) i Aleksii Moskvalaižen (2001−2005). Protestantizman (vižkümnenden päivän uskojiden) «Päzutand»-pühäpert' om saudud Zarečnijas.

Openduz

Lapsiden opendusen aluzkundad oma koumetoštkümne nimitadud päivkodid, kuz' keskškolad (nomer 1..4, 7, Mezenskoje-žilon nomer 6), lapsiden sädamižen keskuz, muzikškol, čomamahtoine škol, kaks' sportškolad («Desantnik» i «Atom»).

Uralan tehnologine kolledž (MIFI:n filial) i Belojarskijan äiprofil'žen tehnikuman (lidnanvuitte Belojarskii-žilo) palakund oma lidnan professionaližen opendusen aluzkundoikš.

Galerei

• 
  Belojarskan vezivaradim (2016)
• 
  Belojarskan AES:an nell' energoblokad vl 2015
• 
  Tahov-adivpert' čehan radnikoiden täht (2005)
• 
  Torguindkeskuz (2005)

Irdkosketused

• Municipaližen ümbrikon tobmuden sait (gorod-zarechny.ru). (ven.)