Kamišlov

Kamišlov
Камышлов

Lidnanznam	Flag
Valdkund	Venäma
Eläjiden lugu (2025)	26,915 ristitud
Pind	51,75 km²
Pämez'	Aleksei Polovnikov (viluku 2017—)
Telefonkod	+7−34 375-xx-xxx
Avtokod	66, 96, 196
Aigvö	UTC+5 (MSK+2)

Kamišlov (ven.: Камышло́в) om Venäman lidn da lidnümbrik Sverdlovskan agjan suves. Se om Kamišlovan rajonan administrativižeks keskuseks mugažo, ei mülü sihe.

Istorii

Eländpunktan aluz om pandud sirdanikoil-manmehil vl 1668 kuti Kamiševskai-slabad. Vll 1668−1679 saudihe Kamišenskii-lidnust kaičemha ümbrištod kalaidajiden heimoiden londoišpäi. Vspäi 1687 nimitihe Kamišlovskai-slabad (ven.: Камышловская слобода). Vl 1763 Sibirin trakt läbiti žilod, i vl 1781 se sai lidnan statusad. 18.-19. voz'sadoil koume jarmankad oleskeliba Kamišlovas joga vot, lidn oli Uralantaguižen villän da jauhon torguindan keskuseks. Vspäi 1885 Transsiban raudtestancii radab. Vspäi 1963 lidn alištub agjan tobmudele oikti.

Kamišlov šingotase elektrotehnižel tegimel (raudten avtomatik) i «Uralizolätor»-tegimel (elektrotehnižen porcellanan tehmine), sauvondmaterialiden tegimil (raudbetonplitad, apakut, savič), nahkan ümbriradmižen fabrikal i specialižen soban omblendfabrikal, sömtegimištol (maidtegim, leibänkombinat).

Geografijan andmused

Lidn sijadase ümbärdajan rajonan keskuzpalas, Pišm-jogen keskjoksmusen hural randal (ven.: Пышма́ 603 km pitte, Turan oigedpol'ne bassein, Obin hurapol'ne bassein) i sen penel Kamišlovk-ližajogel (ven.: Камышло́вка 18 km pitte), 95 m ü.m.t. keskmäižel korktusel.

Matkad Jekaterinburghasai om 120 km päivlaskmha orhal, 130 km avtotedme vai raudtedme. Kamišlov om Jekaterinburg — Tümen' keskustal, Transsib i R351-avtote ühtenzoittas niid, matkad Tümenihesai om 180 km päivnouzmha. R351-avtote («Sibirin trakt») ümbärdab lidnad pohjoižespäi. Lähembaižed lidnad oma Bogdanovič nell'kümne üks' kilometrad päivlaskmha-suvipäivlaskmha orhal, 44 km Sibirin traktal vai raudtel, i Suhoi Log 42 km päivlaskmha orhal vai 55 km avtotedme.

Tobmuz

Kamišlovan lidnümbrikon sijaduz agjas vn 2018 kartal

Kamišlov om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez'. Edeline Administracijan pämez' om Mihail Čuharev, radoi vn 2016 heinkuhusai. Lidnümbrikon Duman ezimez' om Tat'jana Čikunova vn 2012 keväz'kuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 26 870 ristitud, vn 2021 — 27 117 ristitud. Kaik 26 538 eläjad oli lidnas vl 2017. Kaikiš suremb lidnan ristitišt oli 33 462 eläjad vl 1989.

Rahvahad (ozutadud rahvahudenke vl 2010): venälaižed — 96,8 %, toižed rahvahad — 3,2 %.

Ortodoksižen hristanuskondan viž pühäpertid oma kaičenus i saudud lidnas: Pühän Jumalanmaman Katken päjumalanpert' (om letud vl 1821), ühtennimine naižjumalankodi sijadase siš vspäi 1998, mugažo koume jumalanpertid i časoun' oma avaitud.

Openduz

Lapsiden opendusen aluzkundad oma lidnümbrikon kümne nomeruidud päivkodid (nomer 1, 2, 4, 5, 12..14, 16, 92, 170), viž keskškolad (nomer 1, 3, 6, 7, 58), licei nomer 5, lapsiden sädamižen pert', horeografine škol, čomamahtoine škol, kaks' čomamahtoiden školad (nomer 1 i 2), lapsiden da norišton sportškol.

Professionaližen opendusen aluzkundad: Kamišlovan pedagogine kolledž, Kamišlovan tegimišton da transportan tehnikum, Kamišlovan gumanitariž-tehnologine tehnikum.

Galerei

• 
  Lidnan administracijan sauvuz (2019)
• 
  Pühän Jumalanmaman Katken päjumalanpert', vn 2006 nägu
• 
  Lauk vl 2019 (ende Terentjev-torgovanan pert')
• 
  Lidnan kirjišt (2001)
• 
  Kamišlov-päraudtestancijan sauvuz vl 2019

Irdkosketused

• Lidnümbrikon Administracijan sait (gorod-kamyshlov.ru). (ven.)
• Lidnümbrikon Duman sait (kamdumago.ru). (ven.)